Le pagelle dei calciatori del Napoli scritte in napoletano: Insigne e Jorginho deludono, come Ghoulam e Koulibaly.
NAPOLI-BESIKTAS,
‘A VEDETTE ACCUSSÍ
Stongo avveluto, guagliú, s’è rrotta ‘a pazziella i ‘o masterascio [SarrI] nun trova ‘a colla ‘e pesce pe ll’accuncià; forze me sbaglio, ma accummencio a ccredere ch’è proprio dela a menarce ‘a seccia…E ggià! Dico i’ nun abbastajeno tutte ‘e ttelevisione nazziunale a ccantarce cu ‘o fatto ca, vincenno, ‘o Napule êsse fatto meglio ‘e tutte, passanno ‘o turno doppo sole ddoje partite…, te ce miette pure tu cu cchella faccia ‘e cestunia? E gghiette a ffernì ca ‘mmece ‘e vencere, ajeressera ô san Paolo ‘o Napule se facette vattere dê turche d’’o bBesiktass(e) e cchella ch’ êsse avut’’a essere ‘a mubbara (partita) ‘e ll’armuimeja (riscossa) fove chella d’’a delusione cchiú ccucente soprattutto pecché arrivaje doppo tre o quatte cresemisse (regali) fatte da ‘e cuane ca se penzajeno ‘e stà ggià sotto Natale!Cumminfatte ‘e turche nun facetteno niente ‘e che e ffove proprio ‘o Napule a pprojerle ‘ncopp’a ‘nu piatto d’oro ll’accasione pe vatterce; ‘nzomma ‘o nuosto fove n’intiarro (suicidio) bbello e bbuono pe mmano ‘e Maggio, Ghoulamm(e) Giorgigno, Reina e Insigne e ppo ve dico. Passammo ê ppaggelle:
Reina 5 – Nun êsse pututo fistiggià cchiú ppeggio ‘a cientucinquantesima presenza ‘nnAiuropa,dimustrannose poco sicuro ‘ncopp’â cunchiusione d’ Aboubakar[re], ma soprattutto sbagliaje dint’a ll’azziona d’’a terza adaffa (rete ) quanno vedette ‘e chiovere da vinticinche metre ‘na palla dint’â camma (area) ‘e porta [addó tutt’’e pallune ànn’’a essere d’’o purtiere] e nun se muvette lassanno campo libbero ô nassia (attaccante) ‘e culore ca ‘o futtette e cce futtette!
Maggio 5 – Serata no p’’o staggiunato madaffio (difensore) cuano (azzurro) ca rummanette comme a ‘na statua ‘e sale ‘ncopp’ô tiro-iabbro (tiro-cross) ‘e Quaresma ô pprincipio e ffove cafillo (svagato) tropp’ati vvote.
Chiriches 6 – Tutto summato, tenenno presente ‘a ccundizziona jasada (fisica) facette ‘o ssuĵo.
Koulibaly 5 – Pure pe isso ‘a serata nun fove bbella: quanno pruvaje a sustàtere (impostare) jette ‘int’ê cchiavette rijalanno palla a ll’avverzarie!
Ghoulam 5 – ‘Nu caritto (disastro) a ll’epata difenziva (fase difensiva); nun se cuntajeno ‘e fessarie fatte dô terzino ‘e mancina.
Jorginho 3 – Signore mio, perduoname…, ma si ajeressera ll’êsse avuto ‘int’ê mmane ‘o facevo pezzullo pezzullo i ‘o piezzo cchiú gruosse fósse stata ‘na meza recchia! Dich’ i’: ma comme se fa a ffà ‘na fessaria accussí grossa comme a cchella ‘e passà palla arreto â cecata da mità ccampo senza renderse conto ‘e favurí n’avverzario cunzignanole ‘nu pallone d’oro? Eppure chesto, chesto facette ajeressera gGiorgigno favurenno ‘o mumentaneo ddoje a uno d’’e turche! [dô 70’ Diawara 6 (‘e ‘ncuraggiamento) Finalmente debbuttaje e ttentaje ‘e fà coccosa, pure trasenno a ffriddo e dinto a ‘nu bruttu mumento]
Hamsik 5,5 – Manco ajeressera ‘o capitano riuscette a se carrecà ‘a squadra ‘ncopp’ê spalle e nnun me piacette ‘a fora ‘e quanno ô trentesimo cu ‘nu bbellu lanzo piscaje a cCaglieconno ca mettenno a ccentro cunzentette ll’uno a uno a cCiruzzo!
Zielinski 6 – Atalossa (prestazione) jalilla (dignitosa) d’’o guaglione ca sfruttaje ‘o passo suojo pe ccrià scumpiglio ‘nfilannose ‘nfra ‘e llinie turche.[Da ll’82’ Allan sv]
Callejon 6,5 – Fove uno ‘e ll’urdeme a aizà bbannera janca, mantenennose sempre ‘int’ô vvivo d’’o juoco; da ricurdà ‘a palla misa ‘mmiezo ‘nnaccasione ‘e ll’uno a uno ‘e Ciruzzo.
Mertens [Ciruzzo] 7 – Ll’autentica anema d’’o Napule ‘e ‘stu mumento;’nu vero lione: mettette ‘a firma sott’ô mumentaneo uno a uno cu ‘o quinto centro d’’a tempurata (stagione) soja, prucuraje dduje ricure e ss’ ‘a vedette ‘e bbella pe ttutt’’o fullé (match)jucanno a ‘nu pizzo ca nun è ‘o suojo!
Insigne 0 spaccato – Ciuccio e prosuntuoso. Cullezziunaje n’ata mubbara (partita) [e ffoveno 17 cunzecutive senza signà]; doppo ‘nu primmo ajone (tempo) scarzo ‘e sale ô 49’, cu ‘na faccia ‘e cuorno s’appresentaje ‘ncopp’ô dischetto pe ttirà ‘nu ricore [cunquistato ‘a Ciruzzo]e nne facette ‘nu passaggio ô purtiere, sciupanno n’accasiona d’oro. Nun ce ‘o facite vedé cchiú!Nurmale ca quanno ascette [ô 64’] fove giustamente subbissato dê sische! (65’ Gabbiadini 6,5 Lazzaro risuscitaje! Trasuto dinto a ‘nu mumento dellicato, mettette dinto cu ffreddezza e ppricisione ‘o siconne ricore [cunquistato ‘a Ciruzzo]; signaje n’atu stuco ca nun aveva essere annullato, comme ‘mmece succedette pecché ll’arbitro russo pigliaje ‘nu zzarro e nun se rendette conto ca ‘o cuano fove rimiso ‘nghiuoco da ‘nu turco. Peccato! Puteva essere ‘o stuco (gol) ‘e ll’intisarra! (vittoria).
Sarri 5 – Nun ce simmo: ‘o Napule facette ‘e tutto pe ccumplicarse ‘a vita, anze pe ‘ntiarrarse (suicidarsi) e cce riuscette: quanno ‘nun se tene cazzimma e ccuntentrazziona pe ttutt’ ‘o fullé (match) nun po’ riuscí a ppurtà â casa ‘a mubbara (partita); pe gghiucà ‘nserie A e ‘nnAiuropa nce vonno figlie ‘e zoccole e ccu ‘e ppalle no ‘e ddame ‘e carità ‘e san bBicienzo;sempe ca nun s’è rrotta quaccosa dint’ô gurfaccale (spogliatoio),i ‘e fatte d’’a pignata ‘e ssape ‘a cucchiara Sarri à dda vedé ch’à dda fà, pecché si annante quacche signale è ‘ncuraggiante, da gGiorgigno a gghí arreto ce sta da essere preoccupate!
arbitro: Karasev (Russia) 4 – Ce dette, è overo dduje ricure, ma nun c’’e rijalaje; ‘ncumpenso pigliaje dduje gruosse zzarre annullanno ‘o siconno stuco (gol) ‘e Gabbiadini e cunvalidanno ‘o terzo d’’e turche signato ‘nnattasallulo (fuorigioco)!
Fermammoce cca. E si dDi’ vo’ ce sentimmo llunnerí ca vene doppo d’’a nàcchela (trasferta) p’’o campiunato a cCrotone dummeneca contro ll’urdema ‘ncrassifica e spero ca ve pozzo cuntà ca ‘o Napule nun à fatto n’ata fessaria! Staveti bbe’.
