Se facette jettà fora arraddanno (reagendo) cu ‘na sbrazzata contro n’avverzario ca, pigliannolo p’’o cuollo, s’’o steva carrianno ‘nterra. Ll’ucummo (arbitro) êsse jettato fora a ttutte e dduje
Eccuce cca guagliú. Cumme ‘o Cielo à vuluto ce simmo ‘ntise n’ata vota e vve pozzo parlà ‘e chello ca ajeressera succedette ô Maradona addó ‘o Ciuccio mettette sotto ‘o Venezia, ma sulo pe ddoje a zzero cu ppoca suddisfazziona d’’a tribbuna divano ca se fósse aspettata ‘na sbrasata d’’e cuane (azzurri)ca ll’êsse permiso ‘e piazzarse ‘ncimma â crassifica ‘nzieme â Bbisciona. E ‘mmece ‘mmece c’êttemo accuntentà ‘e stà – cu ‘e tre ppunte pigliate – ô quarto posto arreto a Roma, Lazzio e Bbisciona. ‘Nzomma ‘a primma jurnata ‘e campiunato ce lassaje cu ‘a vocca ‘mpastata e amara giacché nce attucaje, p’affuzzà (vincere),d’aspettà ll’arrancua (ripresa) e vedé ca ‘o capitano, sotto ll’ora, sbagliaje ‘nu ricore,tirannolo ‘na chiaveca cu ttutto ‘o cuorpo spustato a gghí arreto pe ccuje ‘o pallone s’aizaje e ‘mmece ‘e jí ‘mporta jette a fferní ‘ncopp’a ll’asteco d’’o palazzo ‘e facciaffronte. Però po – pe ffurtuna – ô 62’ ‘ncarraje ‘o siconno ricore purtannoce ‘nventajo (in vantaggio) i ‘o Turco unnice minute doppo ce rijalaje ‘o doje a zzero e accussí fenette ‘o sibbacco (match) d’affitaja (apertura); ll’amaro ca ce ‘ntussecaje ‘a vocca fove ‘a fessaggine ‘e Caromecosta, ca – pesce ‘e cannuccia – se facette jettà fora arraddanno (reagendo) cu ‘na sbrazzata contro n’avverzario ca, pigliannolo p’’o cuollo, s’’o steva carrianno ‘nterra. Ll’ucummo (arbitro), però casticaje sulo ‘o nuosto…êsse jettato fora a ttutte e dduje, poco male, ma accussí a ppigliarlo dint’ô prozo fovemo sulo nuje, ca mo perdimmo a Ccaromecosta allimmeno pe ‘nu paro ‘e jurnate [Genoa e Vvecchia zoccola]; vuó vedé ca pure st’ucummo sta ‘ncopp’ô stato paca d’Agnelli? Tutto po’ essere, ma nun voglio farme diebbete cu ‘a vocca.
Passammo ê ppaggelle.
MERET 6,5 Êtte ‘a fà poco, ma ‘o ffacette bbuono.
DI LORENZO 6,5 Se facette appezzà asasa (soprattutto) ‘int’ê primme quarantacinche minute, po a ll’arrancua (ripresa) se ne scennette, però dô mancino suĵo nascette ll’azziona d’’o ricore signato dô capitano.
KOULIBALY[‘o Ggialante] 7 Ô ssolito ce mettette bbannia (fisicità) e ccajada (leadership) e nnun ‘a facette bbona a nnisciuno; ô niajo (nel finale) se chiammaje ll’applavuso levanno a Fforte ‘na palla periculosa a ‘nu metro dâ porta.
MANOLAS[Chitelassa] 6,5 Mettette ‘a musarola a Fforte e ccu perzunalità, scennette quanno fove pussibbile.
RUI 6,5 Attaccaje poco, ma quanno ‘o ffacette fove ‘nu periculo p’’e lacunare cumme ‘nnaccasione d’’o primmo ricore [chillo sbagliato].
RUIZ [Anemalonga] 5 Spisso arrancaje a vvacante, sarvannose sulo p’’a qualità ca tene, ma – a ppietto a ll’ate – se vedette ca nun fove ‘nserata. [Dô 72’ GAETANO 6 – Trasette facenno ‘o ssuĵo senza esaggerà.]
LOBOTKA 6 Riggia pulita cu ttanta attenzione a ffarese truvà ô posto justo mustrannose priciso e assenziale.
ZIELINSKI 6 Sulo quacche bbuonu giadillo (spunto) cca e lla; êtte ascí doppo mez’ora pe ‘nu ‘mpiccio â coscia ‘e dritta. [Dô 35’ ELMAS [‘O Turco] 7 Trasette subbeto ‘int’ô juoco i ‘o cumpurtamento suĵo pusitivo ffove premiato cu n’addaffa (rete) overo bbella!]
POLITANO 6,5 Se ne scennette a ll’arrancua, ma p’’e primme quarantacinche minute fove ‘o pierno ‘e ll’azzione d’’o Napule annante e spisso ‘ncupertura.[Dô 72’ LOZANO 7 Pe mme êsse avut’’a trasí assaje primma, cu isso ‘ncampo ‘e ccose jetteno assaje meglio, doppo pochi siconne da ch’era trasuto participaje pusitivamente a ll’azziona ‘e ll’addaffa d’’o Turco.]
OSIMHEN [Caromecosta] 5 Ce mettette subbeto ggenio, cegna (grinta) e azzaja (rabbia) e avette cchiú ‘e n’accasione, però che fessaria farse jettà fora !
INSIGNE 6,5 Sbagliaje ‘nu ricore tirannolo ‘na chiaveca, ma po se facette perdunà signanno chillo ‘e ll’uno a zzero e ppo fove prutacunista ‘e n’addà (prova) da overo zaimmo (leader) purtannose ‘a scuatra ‘ncopp’ê spalle dint’ô mumento cchiú cumplicato quanno n’ato se fósse abbattuto. Però êsse pututo e avuto fà ‘e cchiú. [Da ll’85’ PETAGNA s.v.]
all. SPALLETTI 6 ‘o Napule affuzzaje (vinse) ‘a primma e isso s’accuntentaje. Sbagliaje a nun fa trasì subbeto a Llozano quanno Caremecosta ne fove cacciato.
arb: AURELIANO 4,5 E vv’aggiu ditto ‘o ppecché.
E bbasta accussí, mo si ‘o Cielo ‘o vvo’ ce sentimmo lunnerí ca vene pe ccuntareve che succere dummeneca ‘mmerz’ê sseje e mmeza a Genova contro ê lucale grifune. Staveti bbe’. Raffaele Bracale Brak
