Genoa-Napoli 1-2, ‘a vedette accussì

Lassa fà ô Cielo, guagliú! Tre ppunte r’oro, anze d’armasse (diamante) chille afferrate p’’e capille ajeressera a ll’87’ dô Ciuccio ‘ncopp’ô campo d’’e Crifune doppo ‘nu sibbacco (match) difficile,sufferto e cumbattuto e ppe bbona parte jucato sott’ô patapato ‘e ll’acqua tanto ca ll’arbitro Abbisso fove custretto ô 58’ a suspendere ‘o sibbacco  (scontro) mannanno ‘e jucature ‘int’ô curfatto(spogliatoio) e ffarele turnà ‘nu quarto d’ora doppo quanno se turnaje a gghiucà ‘mmiez’â lota i ê lavarune ‘e chillu campo ‘e patane ch’è Marassi. E pperò  ‘o Napule ô niajo (alle fine) riuscette a ppurtarese â casa ‘e tre ppunte cu ttutto ca ‘o campo pesante nun ggiuvaje â munavara (manovra) marfuffa (avvolgente) d’’e cuane (azzurri) ca jute sotto ô 20’ martellajeno ‘a trasera d’’e Crifune, pure fallenno cchiú n’accasione, i apprimma adderezzareno ‘a varca ô 62’ cu Anema longa [trasuto ô 46’ ô posto ‘e n’addurmuto Zielinski] e ppo, finalmente a ll’87’vincetteno ‘o sibbacco (match), cumme s’ammeretajeno, cu ‘na  daffimarma (autorete) ‘e    Biraschi, pressato dô Masto, accurcianno – p’’o mumento –  a ttre ppunte ll’armafaja (distanza) cu ‘a vecchia zoccola  ca stasera se va a  scuntrà a mMilano cu ‘a scuatra ‘e Gattuso.

Nun dammoce ponie ‘mpietto e ppassammo ê ppaggelle:

Ospina [Pastacrisciuta] 6 – Urdinaria iddarra (amministrazione) p’’o culunbiano assaje attiento quann’ascette e ca nun tenette nisciun’ itimma (colpa) ‘ncopp’ô stuco (gol) pigliato.

Hysaj [Meza Cucchiara] 5 – Me dispiace, ma ll’atalossa (prestazione) ‘e Meza Cucchiara ajeressera fove scadente assaje e sse purtaje ‘ncopp’â cuscienza ll’esserse, ô 20’, scurdato ‘e Kouamé ca da duje passe ‘e capa futtette a pPastacrisciuta!  [Da ll’81’ MALCUIT [‘O Tignuto] 6  Trasuto troppo tarde  facette ‘o ssujo aunennose ô festino d’’e cuane ca a ll’87’ truvajeno ‘o musavo (vantaggio)].

Albiol  [‘O Masto] 5.5 – Miezu zifo (voto) mancante pe bbia ‘e quacche sfregazzo (sbavatura), ma senza cunsequenzie; p’’o riesto però dètte sicurtà (sicurezza) â sezziona (reparto) e ffove isso ca pressanno a bBiraschi ‘o custringette â daffimarma (autorete)!

Koulibaly  [‘O Ggialante] 7 – Pure ajere facette annore ô contranomme suĵo cu ccierti tacatamme (anticipi) aille (monumentali) e‘ntaiscionne ‘nzurea (recuperi in velocità),apprufittanno pure d’’o   campo pesante.

Mario Rui 6 – Êsse avut’’a fà ‘e cchiú arreto, ma ‘o seje nce ‘o mecco pe ccomme appressuraje (spinse) cu ccarattere.

Callejon [Peppe ‘a ‘nguenta] 6.5 – Se facette apprezzà pe ccomme cupuliaje (dialogò) ‘nzurea (in velocità), truvanno ‘a cata (il taglio ) cchiú munazippo (adatto).

Allan [‘O ‘Ncrifato] 6.5 – Ô ssolito luttaje cu ‘o sanco a ll’uocchie  saglienno ‘e tuono a ll’arrancua (nel secondo tempo) propio quanno ‘o Napule avette cchiú nicessità ‘e ‘nu punto d’isciaratanno ‘e ll’armidanno  (riferimento del centrocampo).

Hamsik [Marekiaro] 6 – È overo ca faticaje a ttruvà ‘a pusizziona, ma ‘o capitano ‘e riffe o ‘e raffe riuscette a ffunziunà; peccato ca avette poca cullabburazziona.

Zielinski 5 – Me dispiace, ma ajeressera nun me piacette: nun sulo nun sfruttaje ‘na bbona accasione avuta durante ô primmo ajone (primo tempo), ma po’  nun ‘ncarraje ‘nu ‘nzertamiento (inserimento) e nnun cullabburaje cu ‘o capitano.

[Dô 46’ Fabian Ruiz [Anema longa] 7.5 – Trasette spaccanno ‘o sibbacco (match) e ffove isso ca facette ‘nu granne muvimento pe ppigliarese ‘a palla ‘e Ciruzzo e adderezzà ‘a varca ô 62’. Pe mme ‘o Jancone ll’êsse ‘a tené cchiú pprisente. È gghiucatore ‘e tarriffo (lusso).

Milik [sant’Arcadio] 5.5 -Miezu zifo (voto) mancante pe ‘nu nassio (attaccante) bravo ‘e capa ca nunn’avette ‘na palla auta e ffove custretto a ggirà a vvacante;à sempe ditto ca vulesse jucà ‘nchietta cu cCiruzzo e nnunn’è maje accuntentato!

[Dô 46’ Mertens [Ciruzzo] 7  – Cunfermaje ajeressera, cu cchello ca facette,  d’attraverzà ‘nu granne mumento; p’’o sette ca ll’aggiu dato avasta ‘o tacco sciarmante  (geniale) ca servette a mmettere Anema longa ‘ncundizziona ‘e tirà e ssignà.

Insigne [Lorenzigno] 7 – Partecipaje a ttutte ll’azzione cchiú ppericulose d’’o Napule; peccato ca quanno cercaje ‘a porta nun signaje, ma cugliette ‘o palo.

all. Ancelotti [‘O Jancone] 6.5 – Nichemata (vittoria), cegna (grinta) e fforza ‘e carattere p’’e jucature suoje ca jucajeno meglio ‘e ll’avverzarie pure ‘ncopp’a ‘nu campo ‘nfamo, ma ‘o Jancone à dda fà coccosa pe risolvere ‘o prubblema ‘e ll’accasione sprecate e ppenzo ch’êss’’a sfruttà meglio a cquacche gghiucatore e accuntentarne quacche ato!

arb. Abisso 5.5  – Chisto ce porta bbuono: tre mubbare (partite) arbitrate, tre nichemate (vittorie)noste, ma ajeressera me parette ca cchiú ca arbitrà cumme a ‘nu ‘ngrese,  durmesse cu ‘a zizza ‘mmocca e nnun vedesse troppi ccose scurdannose ‘e siscà quanno ‘e crifune abbiajeno a ffà ‘e capuzzielle, chiavanno mazzate da cecate!’Ncarraje però ô 58’ a suspennere pe ‘nu quarto d’ora ‘o sibbacco (match) i a ffarlo  po cumpletà dànnoce ‘o canzo ‘e vencere!

E ffermammoce cca dicenno ca ‘o Ciuccio s’ammeretaje ‘e vencere nun sulo p’ ‘a (rimonta),ma pure p’’e ttante accasione criate, ca s’êsseno però, cunchiurere signanno assaje cchiú d’’e ddoje purpette cunzignate ô Crifone. So’ ssicuro però ca chesto succede ô san Paolo ggià dummeneca 25 all’ora d’’a tiella quanno, doppo ‘na semmana ‘e priatorio p’’a nazziunala[ca chi se ne fotte?…], se torna a gghiucà e cce veneno a ttruvà ‘e pariente lasche ‘e chella zoccola ‘e Giulietta  e ll’âmm’’a  ‘ntummà ‘e mazzate. Si succede v’’o cconto, si ‘o Cielo ‘o vvo’, llunnerí vintiseje.

Staveti bbe’!