Io sono borbonico
ma Marchisio ha sbagliato

Possibbile ca ‘ncopp’ô NAPOLISTA nisciuno parla d’ ‘o fatto ‘e Marchisio ca cantanno ll’inno taliano à ditto ROMA LADRONA?… Si permettete ‘o ffaccio io ca nun so’ leghista, so’ borbonico e spernacchio cu piacere ‘a bandiera e ll’inno ‘e Mameli ca a ppietto a ll’inno borbonico ‘e Paisiello è ‘na marcetta ‘nzipeta e  ffessa  scritta  ‘a ‘nu capobanda ca nun cunusceva manco ‘a museca, mentre ‘e pparole surpassate, spanfiose,schiassïate, albagiose (tronfie) e ridicule fujeno ‘a Mameli  futtute a ‘nu povero prevete ‘e campagna… Dunche  i’ so’ borbonico e spernacchio cu piacere ‘a bandiera e ll’inno ‘e Mameli, ma Marchisio, no! Nun à dda sputà dint’ô piatto addó magna e si sta cu ‘a nazziunale ‘e ll’Italia…, s’ à dda fa ‘nculo a cantà ll’inno accussí comm’è o si no(si nun le va) se ne stesse â casa ca ce fa ‘nu favore; isso è ‘o solito jucatore italiano (pe gghionta ‘e ruotolo pure juventino) ‘mbruglione, simulatore, provocatore e viulento (accussí comme ‘e vvo’ Lippi!). Se ne stesse â casa e se levasse ‘a ‘nante ê piede ca Cigarini è ciento vote meglio d’isso!…, ma siccomme sta cu ‘o Napule nun vène chiammato. Fosse pe mme, pe chello ca à fatto,a Marchisio  ll’avesse apprimma pigliato a pacchere e ppo cacciato a ccauce ‘nculo…., ma pe ffà chesto nce avessero vuluto diriggente e allenatore fatte a uommene cu cu ‘e ppalle, no a nnacchennelle!