Cunchiusione? ‘E nuoste ascetteno scummate ‘e sanco e subbissate ‘e sische mmeretate
Sto’ avveluto guagliú e mme mancano ‘e pparole pe ccuntareve d’’o Napule nuosto; ‘na cosa però v’’a dico: i’ ancòra nun ce pozzo credere, ma ‘a pazziella s’è rrotta e pe ll’accuncià s’ànn’’a piglià, primma ‘e sùbbeto, quatto o cinche piezze nuove ‘e trinca e cchi ‘o ssape si ‘a facenna s’acconcia! E vv’’o ddico pecché ‘o fatto s’è ffatto overamente serio; cumminfatte ajere ‘mmerzo ‘e sseje quanno ô san Paolo arrivajene ‘e mmurtadelle d’’o zincaro, nujaute ‘ntribbuna-divano ce fóssemo aspettate ‘e vedé ‘nu Napule pure meglio ‘e chillo visto ‘nCiampionsa, ‘na scuatra ‘ncrifata i attrezzata p’affuzzà(vincere) ‘na mubbara (partita), cosa da fa assulutamente pe nnun perdere ata strata ‘ncrassifica… e ‘mmece, ‘mmece vedettemo ‘na scuatra arrangiata ca fove cacchia addirittura d’abbuscà.
Vuje capite che triato, a cche stato stammo?! Però nun ce facettemo maraviglia datose ca oramaje simmo abbituate a vvedé ‘a scuatra d’’o Ciuccio rejere sí e nno n’ajone (tempo), ‘o primmo e ppo sbracà a ll’arrancua e cchesto succedette pure ajere quanno durante ô primmo ajone, pure senza fà cape d’angiule, ‘e nuoste tentajeno, a ccapa sotto, d’affuzzà e arrivate ô 41’, quanno proprio pareva ca ‘o pallone nun vulesse trasì, Lorenzigno -finalmente – centraje ‘o parlà ‘nfaccia d’’a porta d’’e mmurtadelle, ma truvaje pure ‘e mmane d’’o purtiere ca rafaddaje (respinse) però ‘o ffacette justo ‘ncopp’ê piere d’’o Spetaccuso ca pe ffurtuna nosta, nun sbagliaje e rriuscette a ssignà purtannoce ‘mmeizo (in vantaggio)
‘Assa fa ô Cielo! ‘Ntribbuna-divano ce penzajemo: mo chiste vatteno ‘o fierro ch’è ccaudo e nne fanno d’’e mmurtadelle carne p’’e ppurpette…; chi t’’o ddà?! Turnate ‘ncampo a ll’arrancua (ripresa) ‘o Napule quase sparette e vvedettemo ‘na scuatra scunchiusunata, senza ficre(idee) ca affannava, nunn’era periculosa e nnun faceva ê mmurtadelle manco ‘nu cellechio sott’ê scelle e ttutto chesto mentre ‘e guagliune d’’o zincaro pigliaveno pappaviento nsi’ ô 58′ quanno dint’ô ‘mbruoglio d’’a ‘mbrugliata, doppo ‘nu tiro ‘e squina (corner), SkovOlsen(ne) avette ‘o pallone bbuono i ‘o piazzaje ê spalle ‘e Pastacrisciuta. Russimmo (pareggio)!
“E cche saciccio, penzajemo, proprio nun s’affuzza (vince) cchiú? Chesta è ‘na maledizziona smaledetta!” Maje lamentarse; lla ‘o ppeggio êv’ancòra ‘a vení e ccumminfatte arrivaje a ll’80’ quanno Sansone apprufittanno ‘e ‘na sbandata cumplessiva d’’a trasera (difesa)[ asasa (soprattutto) d’’o ‘Ntontero…] trasette dint’â muntaca (area di rigore) nosta cumme a n’aco saccurale dint’a ‘nu matarazzo ‘e lana e da poche passe futtette a Ppastacrisciuta ca nun ce putette fà niente.
E cce ‘o pigliajemo dint’ê rine pecché dint’ê minute ca rummanetteno ce fove justo ‘o tiempo ‘e vedé ‘o Spetaccuso ‘e signà ‘o doje a ddoje annullato da ll’ucummo datose ca ‘a varra [ca a Ppasqua lle cunzola ‘a zia moneca] ‘ncucciaje ‘o mammuoccelo nuosto cu ll’ógne ‘e ‘nu pere ‘nnattasallulo (in fuorigioco). Cunchiusione? ‘E nuoste ascetteno scummate ‘e sanco e subbissate ‘e sische mmeretate. A ‘stu punto aggi’ ‘a fà ‘e ppaggelle; p’’a verità ‘e mmettesse a ttutte quante 4 accummincianno da ll’ucummo Pasqua ca, mannato a rromperce ‘o saciccio, nun ce vulette dà dduje ricure, uno quanno ‘ncopp’a ‘nu tiro d’’o Turco ‘o ciappunese d’’e murtadelle, dint’â muntaca soja rafaddaje (respinse) ‘a palla cu ‘nu guveto, e ll’ato quanno ‘o ‘Ntontero fove stisodint’â muntaca arrunzato da ‘nu zambero d’’o zincaro e nnisciuna d’’e ddoje vote spiaje coccosa â varra…, però pe nnun fà piglià collera a nnisciuno, ‘e ffaccio:
OSPINA[Pastacrisciuta] 6 Nun tenette itimme (colpe) ‘ncopp’a ll’addaffe (reti) e avette ‘a fà ‘na sola parata ‘mpignativa ‘ncopp’a ‘nu tiro ‘e Sansone ca Chitelassa êva tavuillato (deviato).
MAKSIMOVIC[‘O ‘Ntontero]4,5 S’arrangiaje a ffà ll’udí(terzino) ‘e dritta senza faticà troppo i ô niajo (nel finale) jette ‘int’ê chiavette e perdette ‘nu bruttu pallone ca addivintaje chillo ‘e ll’addaffa (rete) ‘e Sansone.
MANOLAS[Chitelassa] 5,5 Me dispiace, ma nun pozzo fà a mmeno ‘e dicere ca doppo ‘na mubbara(partita) ‘e sustanza, arrivato a ll’80’, ‘naccasione d’’o stuco (gol) ‘e Sansone sbagliaje ‘o muvimento a ssaglí e nnun mettette ‘a pezza nicessaria â fessaria d’’o ‘Ntontero.
KOULIBALY[‘O Ggialante] 5,5 Me chiagne ‘o core, ma nun lle pozzo perdunà ll’armaradeja(opposizione)troppo moscia aDzemaili [ca facette ‘na granna jucata] ‘nnaccasione ‘e ll’addaffa (rete)’e Sansone; sfurtunato quanno ‘e capa mannaje ‘a palla lla addó se truvaje SkovOlsen(ne).
DI LORENZO 6 Êtt’’a jucà a mmancina e ppure si faticaje a ttruvà ‘o tiempo justo, ma fessarie nun ne facette.
RUIZ[Anema Longa] 5,5 Peccato ca cuntinua a sbaglià troppi demme (appoggi) mettenno ‘nnarsubbatta (in difficoltà) ‘a scuatra, ma dà sempe spettaculo quanno tocca palla.
ELMAS[‘O Turco] 6 Facette ‘o ssuĵo senza fà cape d’angiulo;cercaje pure ‘a porta.
[dô 65′ MERTENS[Ciruzzo] 5 Me chiagne ‘o core, ma ll’aggi’’a ‘a dicere, ca ô niajo (finale) se magnaje ‘nu stuco (gol) retissante (clamoroso)mannanno ‘ntribbuna ‘na palla d’oro avuta a ccentro d’’a muntaca (area di rigore); me dètte ‘a ‘mpressione ca fósse trasuto senza ggenio.
ZIELINSKI 5,5 Mubbara (partita) senza zuco e ccunnimma d’’o pulacco ca nun riuscette maje a ttruvà ‘a porta pure si cunchiudette spisso da luntano. Peccato.
Lorenzo INSIGNE 6 ‘E pusitivo ca finalmente centraje ‘o parlanfaccia d’’a porta custringenno ‘o purtiere a rafaddà (respingere) e da chello nascette ll’addaffa (rete) d’’o Spetaccuso. Però p’’o riesto nun facette ato i a ll’arrancua (ripresa) sparette proprio.
LOZANO 5,5 Accumminciaje bbunariello signanno pure, ma steva ‘nnattasallulo (fuorigioco) e ll’ucummo (arbitro) nun sbagliaje e ce annullà ‘o stuco (gol); cuntinuaje cercanno strata a ddritta e ccurrenno assaje; all’arrancua (ripresa) dette ‘na palla d’oro a Cciruzzo ca però ‘a sciupaje. P’’o riesto mancaje ‘e cuncretezza dinto a ll’urdimi sidice metre. Peccato.
[da ll’82’ YOUNES[‘O Mmerecato] s.v. – Sulo pochi minuti p’’o terisco ca nun po’ ppiglià zifo (voto)
LLORENTE 5,5 êttemo aspettà ca Lorenzigno centrasse ‘o parla’nfaccia d’’a porta cu ‘a raffadda (respinta) d’’o purtiere pe vvederelo ‘e signà sbluccanno ‘a facenna, ma po facette poco ato nsi’ a ll’85’ quanno se facette cogliere cu ll’ógne ‘e ‘nu pere ‘nnattasallulo (fuorigioco) e ssuccedette chello ca ggià v’aggiu ditto; ‘nzomma troppo muttacuppione (discontinuo).
all.: ANCELOTTI[‘O Jancone] 4,5 E ll’aggiu trattatoPresentaje ‘na scuatra senza cegna (grinta),senza cazzimma e ssenza azzaje (rabbia)ca s’arrennette troppo ampressa ‘nnante ê pprimme arsubbatte (difficoltà)e gghiucaje a bbienetenne; ora mo ll’arnassa (vittoria) ‘ncampiunato manca ‘a mano a vvavella e nun se spieca ‘a faracca (differenza) ‘e juoco ‘nfra Ciampionsa e Ccampiunato. Chi sa’ che nce sta sotto!
‘E ll’ucummo (arbitro) v’aggiu ggià ditto e ppirciò abbelute e scunfurtate facimmo punto cca.
Mo, si ‘o Cielo ‘o vvo’ ce sentimmo p’’a ‘Mmaculata doppo d’’o sibbacco (match) ca ‘o Napule ‘mmerz’ê sseje ‘e sapato sette va a gghiucà a Udine, speranno ‘e nun turnà cu ‘na vranca ‘e mosche ‘mmano. Staveti bbe’.