ilNapolista

Dalle e ddalle, ‘o cucuzziello addeventa tallo, ‘e gghiastemme d’’e cciucciuvettole ce cuglietteno

Dalle e ddalle, ‘o cucuzziello addeventa tallo, ‘e gghiastemme d’’e cciucciuvettole ce cuglietteno

Stongo avvilito, guagliú e mme chiagne ‘o core p’ ‘o pareggio casalinco d’ajeressera contro ll’ucrainema i’ nun me riesco manco a m’arraggià pecché, v’ ‘o ggiuro, quase me ll’aspettavo cumfromme venette a ssapé [da chillu cestariello d’’o tele crrunista Mediasette] ca ‘ntribbuna ce steveno assettate chelli ddoje ciucciuvettole ‘e oriali e pparrucchino-conte ca nun saccio che ccacchio jeveno ascianno ‘a Napule; penzaje súbbeto ca aveva raggione ‘o si’ prevete quanno diceva:” I’ nun ce crero, ma ‘a suttana se ne cade!” E ccumminfatte ‘o Napule nun riuscette a vvencere e ce avettemo cuntentà ‘e ‘nu pareggio scartellato ca mo ce complica nun poco ‘o cammino verz’â finale ‘e Varzavia.

M’aspettavo ‘e vedé ‘nu Napule spumuso(pimpante), sumillante (brioso) e cuncentrato cu gghiucature ca fosseno scise ‘ncampo dicise a vvencere e a ffarlo largo pe nchiudere ‘a prattica subbeto e ppe puterese cuncentrà ‘ncopp’ô riesto ‘e ll’antraffe (gare) ‘e campiunato. ‘Mmece chi t’’o ddà? Soprattutto durante ô primmo ajone vedette a ‘nu Napule abburrito (noioso) e nnieto (nonotono) ca jette a sbattere ‘nfacci’ô muraglione d’ ‘a trasera (difesa) ucraina aizanno porvera, malamente urchestrato ‘a ‘nu Giorgigno ca nun ne ‘ncarrava meza mentre tutte ll’ate ggiravano a vvacante senza zuco nè ccunnimma. E accussíêttem’ ‘aspettà ‘o 49° p’avé ‘a ggioja ‘e vedé ‘o stuco (gol) ‘e Lopezzo ca mettette a ffrutto, cu ‘na granna cabbesera (incornata), ‘nu tiro ‘e squina [uno d’’e tante]d’Insigne. Da chillu mumento po accumminciaje ll’antraffa (partita) privata ‘nfra ‘o Pipita e ‘o purtiere Boiko ca se mettette a ffà ‘o fenomeno e lle fermaje [nun saccio comme] tre o quatto cunchiusione. Dalle e ddalle, ‘o cucuzziello addeventa tallo, ‘e gghiastemme d’’e cciucciuvettole ce cuglietteno e a ll’uttantesimo ‘o Napule avette ‘a suppurtà ‘a moffa (beffa) d’’o pareggio d’’o Dnipro  signato cu dduje jucature ‘nnurzo’e cose (in fuori gioco) cu sulo quacche ccecate, comme a ll’arbitro ungherese i ‘o signalinie suojo, nun avesse visto. ‘Nzomma ‘e fatte accussí jetteno e mmo ‘a finale ‘e Varzavia è ‘nu poco cchiú lluntano pecché ggiovedí ca vene ô Dnipro ‘ncasa soja ll’avasta ‘o zzero a zzero pe spezzarce ‘e passe, a mmeno che – comme à ditto don Rafele – ‘o Napule nun s’arricorda d’essere ‘o Napule e vva ‘nnUcraina a ffà ‘na guapparia. Ce voglio credere! Passammo ê ppaggelle:

ANDUJAR 6: ‘nsustanza, se guardaje ll’antraffa (partita) senza pavà ‘o bbiglietto.

MAGGIO 5,5: Appressuraje(spinse) cchiú ppoco ‘e chello ch’êsse avut’ ‘a fà.

ALBIOL 6: mettette ‘a musarola a cchi capitaje; nun tenette sfarma ‘ncopp’ô stuco (gol) d’ ‘o Dnipro pecché cumannaje a mmestiere ‘a linia ‘e trasera e ffoveno arbitro e signalinie a ffarce ‘o trave ‘e fuoco.

BRITOS 6: sulo uno o duje sfregazze (sbavature)

GHOULAM 5: bbunariello quanno appressuraje (spinse), ma a ddifennere lassaje a ddesiderà.

LOPEZ 6,5: Quacche prano (errore) ‘e reclaggía (impostazione) durante ô primmo ajone, ma po se rascettaje (riscattò) cu ‘o stuco (gol) ca sbluccaje ‘o fullè (gara).

(dô 70° GARGANO 6: Trasette e ricuperaje quacche bbuonu pallone.)

JORGINHO 4,5: soprattutto durante ô primmo ajone nun ne ‘ncarraje meza e ffacette   troppi prane (errori) ‘e reclaggía (impostazione) sbaglianno troppi pasiglie (passaggi) pure facile! Nun capisco pecché don Rafele nun ‘o sostituette; anze nun capisco pecché ‘o facette jucà!

CALLEJON 5: Nun fove isso e nun riuscette a ffarese nè vvalé, nè nnutà!

(dô 77° GABBIADINI s.v. Trasette troppo tarde pe ffà coccosa!)

Hamsik 6: ‘e stima, ma êsse avuto ‘a fà cchiú assaje spicialmente sotto porta, ‘mmece spisso arretraje a ppiglià palla e a nciarmà coccosa.

INSIGNE 6,5: Durante ô primmo ajone fove ll’unico a ddà quacche preoccupazziona ô Dnipro. (da ll’82° MERTENs s.v.)

HIGUAIN 5,5: perdette ‘a brica (duello) perzunale cu Boyko, dimustranno ‘e nun essere particularmente ‘nserata.

BENITEZ 5 S’êv’ ‘a vencere e nun se vincette i ‘a sfarma (colpa) fove pure d’’a soja ca se ‘nfessette a mmettere ‘ncampo a gGiorgigno e ppo nun ‘o sostituette comme vedette ‘a mala parata.Ata sfarma grossa chella ‘e avé fatto tarde ‘e cagne.

arbitro MOEN (norvegese) 2 Mecco sulo ‘o nomme, ma s’êsse avut’ ‘a chiammà szmètte (mmunnezza) isso e ‘a chenca soja!

E cu cchesto ve saluto e si dDi’ vo’ ce sentimmo ‘a prossima vota ciové doppo d’’o fullé (match) ‘e campiunato ca mo nun me ricordo contro chi è

Staveti bbe’

R Bracale Brak

ilnapolista © riproduzione riservata