Troppo vicina a mme steva ‘a barriera / Tacconi m’era miso annanze ‘o muro
mentre penzavo: “Comme ‘a veco nera!” / “Passala chiano, ‘cca, statte sicuro”
– dicette Diego a Eraldo: ” ‘O tengo a tiro”. / Pecci po’ assecondaje chella pazzia
e me facette fa’ nu miezo giro / ca quasi po’ chiammavo ‘a Polizia.
‘O père unico ‘o munno m’allisciaje / comme puteva fa’ accussì sol’ isso.
Lieve comme nun ero stata maje / io accumminciaje a vulà c”o sguardo fisso.
Comm’era bella ‘a coppa chella schiera / comme a surdate vinti, bianchi e nnire.
Era nu pianufforte la barriera / e io c”o sunavo senza fa’ sentire.
Saglievo troppo. Insieme alle paure: / ‘na forza misteriosa m’acalaje.
Vinsi la gravità, e la Juve pure / e tutta ‘a gente attuorno arrevutaje.
M’emozionai pur’io, pallone e bbuono, / Napule era accussì, vuleva ‘o sfizio.
Ma chella punizione ‘e Maradona / sulament’ io ‘o ssapevo: era l’inizio.
Il Ciuccio
