Napoli-Inter, le pagelle in lingua: tutti promossi, voti eccellenti per Reina, Koulibaly, Albiol e Sarri. Ma il migliore è Zielinski.
Napoli-Inter, le pagelle in lingua
Biancale, fuja-fuje, trezziole e bbotte a mmuro, guagliú ! ‘O Napule ‘a truvato ‘a muntazzimma (divisa) justa: chella d’’a Maronna ‘e ll’Arco! E ccu cchella ‘ncuollo cu ‘a sustanziosa nichemata (vittoria) cunquistata ajeressera ô san Paolo contr’a cchella bbanda ‘e profuche ammaistrate da chella faccia ‘e cestunia ‘e pioli, turnaje a ffà ‘o Napule saitanno (dominando) e nnun cuncedenno niente a ll’avverzarie pe mmodo ca cuquistaje tre ppunte ‘mpurtante assaje p’’a crassifica e pe ll’aracco (morale).
Nichemata (vittoria) sustanziosa [ch’êsse pututa essere pure cchiú llarga si Lorenzigno ‘na vota e Marekiaro n’ata nunn’avesseno sciupato ddoje bboni ppalle, nichemata ] venuta doppo ‘na mubbara (partita) ca nun tenette storia e cca ggià doppo seje minute d’’o primmo ajone (tempo) se mettette ‘ncopp’ô tunnajo (binario) justo cu ‘o primmo stuco (gol)’e Zelinski ca sbluccaje ‘a sibbacca (match) e ddoppo poco cu cchillo ‘e Marekiaro ca mettette súbbeto ‘nchiaro ‘e ccose comme steveno e cqua’ fòsse ‘a zuppa ca s’ammenestava e ppe cchilli quatto profuche ‘nteriste fove notte e nnun ce stette niente ‘a fà pure pecché ‘e ppochi vote ca tentajeno ‘e fà coccosa truvajeno ‘o muro ‘e Koulibalý e ssocie o ‘e mmane ‘e Reina e s’êtten’’a fà cchiú ddinto ‘e dint’ô prozo, accumincianno ‘a pioli ca s’era dato ‘nu punio ‘mpietto dicenno ca ‘o san Paolo era ‘o campo ‘e cunquista soja! E ffove quase naturale ca arrivate ô 50’ pure Lorenzigno participasse â festa mettenno dinto ‘nu pallone suojo e mmo sperammo ca ‘a festa d’ajeressera nun fernesse súbbeto, ma cuntinuasse nsi’ a mmaggio ancòra â faccia d’’e ssecce,[comme a ggiggino-uocchie stuorte, ca pure ajeressera era presente ‘ncopp’ê bbemate (spalti)] e dde chi ce vo’ male comme a cchillu cestariello ‘e ll’ armuillacco (telecronista) ‘e SKY e ll’arbitro Rizzoli e dd’’a chenca soja mannate a rromperce ‘o pasticciotto, ma ca pure lloro s’êtten’’a fà cchiú ddinto ‘e dint’ô prozo!
Passammo ê ppaggelle:
Reina 7 – Finalmente pur’isso nce mettette ‘a firma soja sotto a granna nichemata (vittoria) d’ajeressera; ‘o purtierone nuosto almaturraje (blindò) ‘o doje a zzero cu dduje ‘mpurtante tacculle (interventi) ‘ncuoll’a Icardi e ce assicuraje ‘o tre a zzero, mantenenno acrata (inviolata) ‘a porta, fermanno ‘nterra cu ‘na mana sola ‘nu tentativo maligno ‘e Candreva. Bravo!
Hysaj 6,5 – S’’a vedette ‘e bbella fermanno a pPerisiccio;nun facette nisciunu prano (errore) e ssapette sempe chello ch’êv’’a fà. Avette’ascí pe ‘nu ‘mpiccio d’armaddia (problema fisico).
[dô 62’ Maggio 6 – Urdinaria amministrazziona pe almaturrà (blindare) ‘o maslaio (vantaggio)]
Albiol 7 – Quanno nun ce steva ce n’accurgettemo e ce ‘o chiagnettemo, e mo ch’è tturnato s’è ffatto súbbeto apprezzà ajeressera quanno sotto a isso Icardi facette palla corta. ‘Nu capolavoro a ll’arrancua (ripresa) quanno, ringrazzianno a mMiranda, cunfezziunaje ll’jusaida (l’assist) pe lLorenzigno.
Koulibaly 7 – ‘A solita trancara (muraglia) ca nun facette passà a nnisciuno!
Ghoulam 6,5 – Vincette ‘a tarra (confronto) cu Candreva e sse levaje ‘o sfizzio ‘e sfottere a hHandanoviccio cu ‘na mazzata dô lemmeto.
Zielinski 8 – Che bbellu jucatore! Me rummanette senza parole pe ll’atalossa (prestazione) soja ca fove eccezziunale: nun aveva ancòra signato ‘ncampionato i ajeressera nun sulo sbluccaje ‘a sibbacca (match) cu ‘na bbella addaffa (rete), bbella soprattutto p’’o muvimento fatto pe ttruvarese a ll’appuntamento cu ‘o pallone ‘e Peppe ‘a ‘nguenta,ma cunfezziunaje jusaide (l’assist), lanze a zzuco ‘e caramelle e ffacette da sciascia (schermo) a ll’epata difaja (in fase difensiva).Ma ch’ato à dda fà ‘stu guaglione?!
Diawara 7+ – E nnun me so’ muzzecato ‘a lengua! Tène diciannove anne e ffove ‘o padrone ‘e ll’armidanno (centrocampo) facenno vedé ‘e surece verde a cchillu scatobbio o comme cacchio se chiamm’isso chillu mammone ‘nterista ca inutilmente cercaje ‘e cuntrastarlo!
Hamsik 7,5 – ‘O capitano facette‘a sibbacca (match) ca m’aspettavo da uno comm’è isso ch’è ‘nu vero eparco (leader): se mettette ‘a scuatra ‘ncopp’ê spalle, accumminciaje a ll’azziona ‘e ll’uno a zzero, , signaje ‘na granna addaffa (rete),chella ‘e ll’ammanna (sicurezza) e súbbeto doppo se divertette a ffà alliccà ô musso a ttutte ‘e musciaidde (spettatori) cu gghiucate ‘e qualità. Peccato ca Handanoviccio lle levaje ‘o sfizzio d’’a pareglia (doppietta).Cuntentammoce; cu cchillo d’ajere foveno cientoquatto, quanto a cchille ‘e Cavani! [dô 76’ Rog 6 – Facette vedé ca ‘a stoffa ce sta!]
Callejon [Peppe ‘a ‘nguenta] 6,5 – Miezu zifo (voto) ‘e cchiú pe ll’jusaida (assist) ‘e capa fatto a zZielinski, priciso i a ttiempo e ssenza truvarese ‘mpusizziona d’attasallulo (off side)comme dicette chella lota ‘e pioli ch’è n’ècchese juventino “e ò détto tutto”!P’’o riesto facette chello ch’aveva ‘a fà e bbasta i avanza!
Gabbiadini 6,5 – Ajeressera, finalmente se decidette a ppartecipà ô juoco, cupuliaje (dialogò) cu ‘e cumpagne, facette ‘e muvimente juste e ccercaje ‘nu paro ‘e vote pure ‘a porta truvanno, pe gghiella nosta ô purtiere Handanoviccio ca lle dicette ‘e no. Però ‘a strata è cchella justa e ddale e ddalle ‘o cucuzziello addiventa talle e pprimma o doppo ‘o stuco (gol) nun po’ mmancà!
Insigne (Lorenzigno) 7,5 – Miezu zifo (voto) ‘e cchiú p’’o muvimento fatto pe llibberarse dê troppi cane ca lle steveno ‘ncuollo, spustannose ‘mmiez’â camma (area) pe gghí a recogliere ‘o bbassurero (suggerimento) d’Albiollo e menarlo dinto signanno ‘o quarto stuco (gol) dint’ a ttre mmubbare partite ‘e campiunato, tanto pe ddimustrà ‘e nun stà‘nnàzzema (crisi) o d’averela oramaje superata,ritruvanno cunfianza (fiducia) e ccegna (grinta). [dô 58’ Giaccherini 6 – Trasette justo pe ffà risciatà ô cumpagno, dàtose ca marterí ca vène se va a lLisbona, ma ‘a sibbacca (match) era già a ddeposito]
All. Sarri 7 – Quanno se vence, vence pe pprimmo pure ‘o mutarribbo (allenatore) ca ajere fove a ll’ardezza d’’a scuatra soja Il Napoli ca jucaje bbuono e mmettette sotto a cchille profuche ‘e ll’Interre cu ‘na railla (partenza)ca ‘e ffacette cacà sotto.Vedette migliurata pure ll’epata difaja ( fase difensiva) i ‘a nichemata d’ajeressera fove certamente ‘nu bbuon’ arcabbanno (viatico) p’’a nacchèlla (trasferta) ‘e Lisbona addó se decide ‘o mustabballo (futuro)’nCiampionsa!
E fermammoce cca. ‘O Napule torna a gghiucà, comme v’aggiu ditto, marterí ca vene ‘nCiampionsa e ppirciò si dDi’ vo’ ce sentimmo miercurí ca trase e spero ca ve pozzo cuntà ca ‘o Napule à vinciuto pure lla cu ttutto ca ce ll’âmm’’a vedé ‘ cu ‘o Siviglia ca nun è ddoce ‘e sale, ma i’ tengo ‘nu bbuonu presentimento! Staveti bbe’.Cuccio fa’ tu! R.Bracale Brak
