Cumme piacette ô Cielo finalmente arrivaje cunzentennoce ‘e mettere ô ssicuro ‘o siconno posto ‘ncrassifica a ttre gghiurnate dô scuppò
Cose ‘e pazze, guagliú, i’ ancòra nun ce pozzo credere ca ‘o Ciuccio, finalmente, turnaje a dd’affurzà (vincere) ô san Paolo doppo ‘nu russimmo (pareggio) e addirittura ddoje scutuliate, ma ‘o ffacette pe ddoje a uno e addirittura ô 97’afferranno p’’e capille n’arnassa (vittoria) ca pareva proprio nun fósse cchiú ppussibbile. Però po, cumme piacette ô Cielo finalmente arrivaje cunzentennoce ‘e mettere ô ssicuro ‘o siconno posto ‘ncrassifica a ttre gghiurnate dô scuppò (termine) ‘e st’ atu campiunato senza zuco nè ccunnimma! Cose ‘e pazze, guagliú, i’ ancòra nun ce pozzo credere ca ajeressera ‘o Napule ‘mmece ‘e fà unu muorzo ‘e ll’isulane russe e bblu fove custretto a dd’ estedallà (rimontare) doppo d’avé sciupato n’intero primmo ajone (primo tempo) senza cunchiurere ‘nu saciccio ,doppo d’essere tuzzato pe bbona parta ‘e ll’arrancua (ripresa) ‘nfacci’ duje arafleje (autobus) piazzate ‘nnante a Ccragno da Maran(ne), allimmeno nsi’ a cquanno ‘o Jancone, tarde se decidette a ffà trasí a Ssant’Arcadio, mettenno ‘ncundizziona a Cciruzzo i a Llorenzigno d’avé cchiú aggio ‘e ggiustrà e ffove proprio Ciruzzo a ll’84’ ce riuscette a ddà ‘o russimmo, mentre po Lorenzigno [e ppo ve dico cumme] ô 97’ ce accurdaje chell’ n’arnassa (vittoria) nicessaria cumme ô ppane e ‘ntribbuna divano fenettemo ‘e sufferí… Che ce vulite fà? Nun putimmo cchiú spassarce manco cu ‘e mmeze cazette cumme a ll’isulane… Jammo annante e ppassammo ê ppaggelle:
MERET[‘O Lungagnone] 6 ‘E nassie (attaccanti) sardagnuole nun lle dètteno ‘mpiccio ‘a fora ‘e quanno ô 63’ cu ‘o primmo tiro ‘mporta chillu pacco ‘e Pavoletti ‘o futtette e isso nun ce putette fà niente.
HYSAJ[Meza Cucchiara] 5,5 Miezu zifo (voto) mancante pecché ll’arbanese, riuscette sí e nno a mmiddibbà (attaccare) ‘ncopp’â ferza ‘e dritta, ma a ll’epata difenziva di (fase difensiva) fove poco attiento.
ALBIOL[‘O Masto] 6 Riturnato aizzo (titolare) doppo tre mmise cu ‘a sperienza soja curaje mo a Ccerri, mo a Ppavoletti e ssulo ô niajo (finale) avvertette ‘nu poco e stracquezza.
KOULIBALY[‘O Ggialante] 7 N’ata atalossa mibba (maestosa) d’’o centrale cuano, cuntento ‘e turnà a gghiucà cu ‘o Masto: Pavoletti ce facette male sulo quanno arretraje e ll’êssen’avut’’a fermà ‘e matusteje(mediani) ca ‘mmece s’’o perdetteno.
GHOULAM 6,5 Mettette ‘mmiezo ‘nu jabbro (cross) a zzuco ‘e caramella pe Cciruzzo ca ce dette ‘o russimmo: se vedette ca sta turnanno a essere isso. Menu male.
ALLAN[‘O ‘Ncrifato] 5,5 Me dispiace, ma ll’aggi’’a mettere miezu zifo (voto) mancante pecché faticaje a mmiezu servizzio: p’azzannà quacche felietto cca e lla, ‘o ffacette, ma nun fove capace ‘e dà qualità â munauara (manovra) uffenziva.[ dô 59′ FABIAN RUIZ 5,5 Pure a isso miezu zifo (voto) mancante pecché sí dètte giumetrie î munfaddeje (sbocchi) uffenzive d’’o Napule cercanno sempe ‘a strata justa, ma ‘nnaccasione ‘e ll’addaffa (rete) ‘e Pavoletti s’’o perdette.]
ZIELINSKI 5,5 S’ammereta miezu zifo (voto) mancante pecché nun sulo fove poco marrajo (pimpante) senza maje riuscí a essere periculuso, ma po‘nnaccasione ‘e ll’addaffa (rete) ‘e Pavoletti se facette fà da Bbarella cumme a ‘nu pesce ‘e cannuccia. E cche saciccio, parette ca tanno steva ascenno da sott’ô mantesino d’’a mamma!
VERDI 5,5 S’ammereta miezu zifo (voto) mancante pecché miso dô Jancone dô primmo minuto cumm’ arcagio (esterno) ‘e dritta cumbinaje poco ‘e cuncreto [dô 59′ CALLEJON[Peppe ‘a ‘nguenta] 6 Trasuto tarde, ‘o Napule ggiuvaje d’’a granna ‘sperienzia soja p’estedallà (rimontare)].
MERTENS[Ciruzzo] 7 Doppo quacche ttentativo a vvacante duranteô primmo ajone (tempo), trasuto Sant’Arcadio truvaje curaggio e spazzio e ffove dicisivo il folletto belga è ancora una volta decisivo cu ‘o tacatarrassa (colpo di testa) ca ce rijalaje ‘o russimmo (pareggio).
INSIGNE [Lorenzigno] 6,5 S’ammeretasse cchiú ppoco, ma turnato ‘ncampo doppo ll’arisabbo (infortunio), ma doppo nuvanta minute cu ppoca cunnimma tenette ‘o cuorio ‘e tirà ‘nu ricore dicisivo ô 97’ e rriuscette a ccartià a Ccragno ca lle spalancaje ‘o Lato mancino d’‘a porta, menannose ‘nterra a dritta e ccunzentennole ‘e signà addó ca Lorenzigno ‘o pricresso ricore, contr’â vecchia zoccola, ll’êva sbagliato e i’ maje ce ce n’avesse fatto tirà n’ato, ma… se sape ca ‘o Jancone tene ‘nu prozo tanto!
YOUNES[‘O Mmerecato] 5,5 Me dispiace, ma pure a isso ll’aggi’’a mettere miezu zifo (voto) mancante pecché ‘o terisco, cunfermato aizzo (titolare) , nun fove mascullo è (brillante) cumme a ccontro ô Frusinone; peccato! [dô 63′ MILIK[Sant’Arcadio] 6,5 Trasuto troppo tarde a ffatto cumprumiso se dette da fà súbbeto facenno spazzio ê cumpagne e mmettenno paura â trasera (retroguardia) rossa e bblu.]
All. ANCELOTTI [‘OJancone] 6 Pecché tene ‘nu prozo tanto e sse vincette, ma s’ammeretasse miezu zifo (voto) mancante pecché sbagliaje furmazziona,ritardaje ‘e cagne e cce facette fà ‘e funge primma ‘e riuscí a dd’affurzà (vincere).
arb. CHIFFI 4N’atu criaturo ‘ncopp’â strata d’’o Napule. Sta addivintanno ‘na canzona; chisto d’ajere, ‘nu ‘ngignere guaglione se vedette súbbeto nun ce capeva quase niente e de consequenzia o nun vedette o siscaje a vienetenne e ssenza criterio caputianno ‘e carí (falli) e cchi ne facette ‘e spese fove naturalmente ‘o Napule.E nnun me sto’ sbaglianno, tant’è overo ca ô 90’ steva lla, ma nun se n’addunaje ca ll’isulano êva deviata ‘a palla cu ‘nu guveto d’’o vraccio largo justo ‘ncopp’â linia d’’a muntaca (area di rigore) rossa e bblu i ‘a linia se sape ca fa pare d’’a muntaca! Pe ffurtuna ca chill’addurmute d’’a Varra, doppo bbuone cinche minute se nn’addunajeno lloro e ll’alluccajeno dint’ê recchie: “’Nzallanuto viene vide che fessaria staje facenno!” E isso se nn’addunaje! Menu male! !
E ccu cchesto ve saluto e si dDi’ vo’ ce sentimmo llunnerí ca vene doppo ca dummeneca durece, â via d’’e sseje ‘o Napule se scontra ‘ncampiunato, â casa lloro cu ‘e jucature d’‘a scuatra d’’a città ‘e Ferrara; pe ccerto nunn’è ccosa ‘e pochi mumente riuscí a vvatterle, ma i’ spero ca pozzo cuntareve cose bbone. Staveti bbe’. R.Bracale Brak
