Le pagelle in lingua. Sette a Spalletti: ‘a scuatra soja se muvette a mmestiere pure senza quacche ttitulare. Sette anche a Petagna
Era ora, era ora ca ‘o Ciuccio turnasse a dd’affuzzà (vincere)guagliù, er’ora! E ssuccedette ajere ô Maradona, addó ‘o Napule – doppo d’’o russimmo ‘ncasa d’’a vecchia zoccola – scardaje ‘a zella a Ggabbiadini e ccumpagne e sse mettette tre ppunte dint’â sacca saglienno a zzamma (quota) 43 punte ‘ncrassifica. Doppo ‘nu ‘nteressante sibbacco (match) jucato a ttutto campo, senza però ca ‘e duriane fosseno maje periculuse, [tanto ca ll’Ecchesepastacrisciuta nunn’êtte ‘a fà nisciuno taccullo (intervento)],ce penzaje ‘o Petagnone ô 43′ a mmettere ‘e ccose a pposto signanno, cu ‘na meza vutata arbaluania (acrobatica) ll’uno a zzero ca ce avastaje pp’affuzzà! ‘Nu minuto primma êva signato ‘e capa Juan Jesus, ma ll’ucummo annullaje ‘o stuco (gol) pe bbia ca ‘o centrale nuosto teneva ll’ógne d’’o pere mancino ‘nnattasallulo (in fuorigioco). Ma s’affuzzaje e cchesto conta!
Passammo ê ppaggelle:
OSPINA [Ecchesepastacrisciuta] 6 ‘e stima datose ca nunn’êtte fa ‘nu saciccio pe ttutt’’o sibbacco (match).
DI LORENZO 6.5 Facette uno ‘e tutto dimustranno ca nunn’ è cchiú ssulo n’udè (terzino).
RRAHMANI 6.5 N’aculla (una muraglia) vueura (invalicabile)!
Juan JESUS 6.5 ‘Nu miraculo ‘e Spalletti: signaje n’addaffa (rete) assaffa (purtroppo) annullata, cassaje dô campo a Qcuagliarella e mmettette ‘a musarola a Ggabbiadini.
GHOULAM 6 Facette piacere vederelo accussí ‘mpalla doppo tanti guaje passate! [Da ll’80’ TUANZEBE – sz]
LOBOTKA 7,5 – Ato ca professore. Fove ‘nu direttore d’urchesta, ‘nu spettaculo ‘int’ê ddoje epate (nelle due fasi). Nun sprecaje ‘nu pallone giustranno cu ccegna (grinta) e fficre (idee). Applavuse!
DEMME 6.5 Fove all’ardezza d’’o culleca ‘e sezziona (di reparto) mimmaddabnno (verticalizzando) cchiú ‘e ‘na vota. [Da ll’80’ RUIZ[Anemalonga] – sz].
ELMAS [‘O Turco ] 6 Lle levo miezu zifo (mezzo voto)pecché se nfessette a gghiucà troppo da sulo.
MERTENS [Ciruzzo] 5.5 Me dispiace, ma nun se mmereta ‘e cchiú; ‘o vedette poco lammajo (brillante) sbagliaje quacche affibbiata (aggancio) e n’addaffa (rete)ch’êss’avut’’a signà!
INSIGNE 6 ‘e stima pecché ascette troppo ampressa senza puté dimustrà ‘e stà ‘mpalla Peccato.[Dô 30′ POLITANO – 6.5 Trasette e se dette subbeto da fa…]
PETAGNA 7 – Nun sulo signaje ll’addaffa (rete) ca fove ‘na perna e cce dette tre ppunte, ma jucanno a ttutto campo, facette sezziona da sulo cupulianno (dialogando) cu ‘e cumpagne, facenno sponna, difennenno palla. Overamente bravo!
all. SPALLETTI 7 ‘A scuatra soja se muvette a mmestiere pure senza quacche ttitulare e piacette cumme cercaje ll’arnassa.
Arb. DI BELLO 5 Scarzulillo, lassaje correre cchiú ‘e ‘nu carí (fallo) d’’e duriane.
E bbasta accussí. Ve saluto cuntento ‘e cumme jette ajere, pure si se fósse pututo affuzzà cchiú llarghe… Mo cumme a mmo nun saccio si e cquanno ce sentimmo. Staveti bbe’
‘E Cchiú, ‘e cchiú, ‘e chhiú Ciuccio fa’ tu! Staveti bbe’
