ilNapolista

Lobotka scennette ‘ncampo armato ‘e riga e ccumpassa

Mario Rui facette sparí dô campo a Felipe Anderson(ne). Mertens mettette dinto ddoje addaffe ca ancòra âmm’’a capí quale fove ‘a cchiú bbella!

Lobotka scennette ‘ncampo armato ‘e riga e ccumpassa
during the Italian Serie A football match SSC Napoli vs Fc Juventus.

NAPOLI LAZIO [28.11.21] 4 A 0 ‘A VEDETTE ACCUSSÍ

‘Í che Ciuccio guagliú e Nnapule canta pe festiggià ‘o Napule  ca ajeressera ô Maradona cunzignaje ‘a bbellezza ‘e quatto sfugliatelle â scuatra d’’o pappavallo d’’a chietta Lotito-Sarri e zzumpaje cu trentacinche punte ‘ncimma â crassifica a cchiú ttre ‘ncopp’ô Diavulo russo e nniro i a cchiú cquatto ‘ncuoll’â Bbisciona…Che bbellezza, ch’addecrio! E ddicere ch’avastaje ggià ‘a primma mez’ora d’’o primmo ajone (primo tempo) cu ‘nu Napule furiuso ca cu  Zielinski [7’]e Cciruzzo [10’ e 29’] mettette ‘e ccose ô ssicuro senza ca ‘a Lazzio vedesse quase palla e nun riuscesse a rrompere ‘o pasticciotto e ssulo ‘na vota,’ncopp’ô doje a zzero, cu Luis Alberto, dô lemmeto cercaje ‘a porta, ma truvaje ‘nu granne taccullo (intervento) ‘e ‘nu granne purtiere ca vulanno a mmancina jette a schiaffià ‘a palla facenno annuzzà ‘ncanna ê lazziale ‘a speranza ‘e signà; poco doppo ‘ncopp’a ‘nu tiro ‘e squina (corner)Acerbi da fora ‘e capa senz’essere periculuso mannaje ‘a palla ‘ncopp’â faccia auta ‘e ll’aculla (traversa) e lla fenette ‘a Lazzio ca anze a ll’arrancua (nella ripresa) turnate ‘ncampo ‘ncopp’ô tre a zzero, jette ‘int’ô pallone frasturnata e abbeluta dô zzarraibbujo (palleggio) priciso e rrijuto (continuo) d’o Napule e ghiette a ffení ca a ll’85’ Anema Longa mettette ‘a cerasella ‘ncopp’â pizza doce signanno ll’addaffa (rete) nummero quatto ca levaje ‘o ffraceto ‘a miezo e nchiudette ‘a facenna. Datose ca se steva ‘ncopp’ô quatto a zzero ll’ucummo (arbitro) penzaje bbuono ‘e mannà subbeto  ô 90’ tutte sott’ô tufulo (doccia).

Passammo ê ppaggelle:

OSPINA [Ecchesepastacrisciuta] 7,5 ‘Mpratteca sulo ‘na vota  fove chiammato a ffà coccosa, però sfuderaje, mantenenno ‘a porta acrata (inviolata) ‘na granna jauabba (risposta) ô tiro ‘e primma  ‘e Luis Alberto. Applavuse e ccumprimente.

DI LORENZO 7 – Attiento e ccuncentrato dô primmo a ll’ulrdemo minuto, truvanno sempe ‘a caraja   (lettura) defenziva justa!

RRAHMANI 6,5 – Nun sbagliaje quase niente cuncedenno pochi frecule ê nassíe lazziale… Ma grazzie ô saciccio! Cu ‘nu Ggialante vicino tutto addeventa facile!

KOULIBALY [‘O Ggialante ] 7,5 – Arreto atalossa (prestazione) mibba (maestosa) d’’o cumannante ca fove  ‘o primmo  mutirro (primo regista)d’’e suoje e ffacette partí ‘a palla ca addivintaje ll’uno a zzero.

Mario RUI 6,5 -Facette sparí dô campo a Felipe Anderson(ne), riultanno curaggiuso, attiento e ccuncreto, tutt’atu jucatore ‘e chillo visto cu ‘a Bbisciona.

[da ll’86’  GHOULAM s.z. – ‘Ncampo pe ppoche minute e ppirciò nun lle pozzo dà ‘nu zifo (voto).]

LOBOTKA 8  Scennette ‘ncampo armato ‘e riga e ccumpassa facennose truvà sempe ô posto justo ô mumento justo; pierno ‘e ll’armidanno  (centrocampo) tuccaje ‘na cifra ‘e pallune senza sbaglarne uno e ggestiunannole a mmestiere.Forze ‘a meglia mubbara (partita) da che ghioca cu nnuje!

RUIZ [Anemalonga] 7,5 – Surprennente, cumpletaje  ‘a festa signanno ‘nu stuco (gol) spettaculare cu ‘na sciabbulata  matala (perfetta) e pp’’o riesto abballaje ‘ncopp’â trecquarte  dànno ‘o ttu ô pallone a ‘na zzurea (un ritmo) ‘e juoco ca lèvate!

[da ll’86’  MALCUIT [‘O Tignuto] s.z. Suoccio trascurzo fatto pe Ghoulam(me).

LOZANO 7 Nun truvaje ‘a porta pe ppoco, però a ddritta tenette overamente ‘o ppepe dint’ô prozo facennose truvà sempe libbero p’avé palla e crijanno scuncuasso ‘nfra â trasera (difesa) lazziale.

[dô 64′  ELMAS [‘O Turco] 6,5  Attiento e urdinato facette aculla  (contenimento)e Spalletti se lustraje ll’uocchie.]

ZIELINSKI 8 Atalossa mumazza (prova ottima) d’’o pulacco e nnun sulo pe ll’addaffa (rete) ca sbluccaje ‘a facenna.

[dô 73′  DEMME 6  Trasette a gghiuoche fatte vuliuso ‘e cumbattere, ma s’êsse avuto sparagnà chillu cartellino jalizzo(giallo)!

INSIGNE 7 Se dette da fà asasa (soprattutto) ô primmo ajone (nel primo tempo) aggradanno (ispirando)  quase tutte ‘e mmunavare  (manovre) d’ujummo (attacco) cuano (zzurro); però calaje a ll’arrancua  (nella ripresa.)

MERTENS [Ciruzzo] 9 -Jucatore cu ssette parme ‘e saciccio ajeressere fove prutacunista ‘e n’atalossa (prestazione) ca ce facette alliccà ‘e mustacce e ddint’â notte dedicata a Mmaradona mettette dinto ddoje addaffe (reti) ca ancòra âmm’’a capí quale fove ‘a cchiú bbella!

[dô 64′  PETAGNA 6  Trasette ‘ncampo cu ‘o pere justo diciso a ffà ‘o nnicessario e sse chiammaje quacche applavuso!]

all.  SPALLETTI 8  Notte da mettere ‘ncurnice. Mutòda (favolosa) ‘a riazziona d’’a scuatra soja doppo ‘e ddoje azzimme (sconfitte) pigliate cu Bbisciona e Spartak(che) Mosca.Certo cu ‘nu Ciruzzo accussí cu ‘nu Lbotka ‘mpalla, Caromecosta e  Anguissa ponno ricuperà senza pressa. P’’o mumento ‘o Ciuccio s’è ppiazzato ‘ncimma â crassifica ‘nsulitaria dànno ‘na ‘mmasciata forte a cchi sta areto!

arb. ORSATO 6 Certo sparagnaje dduje o tre cartelline jalizze (gialli) ê lazziale e ne sventagliaje ‘nu paro ê nuoste e nnun ce steveno, però fetenzie grosse nun ce ne facette.

E ffermamoce cca, alliccammoce ancòra ‘e bbaffe: simmo primme e ‘nsulitaria, bbuono accussí!

Mo, si ‘o Cielo ‘o ccunzente ce sentimmo ggioverí ca vene pe ccuntareve che succere miercurí a ssera fora casa cu ‘o Sassuola, ‘nu cliente scamuso ca à ggià rotte ll’ossa â vecchia zoccola i ô Diavulo russo e nniro… pirciò nun vene a essere ‘na passiata ‘a nosta. Faccimmo corna e alluccammo:‘E cchiú, ‘e cchiú, ‘e cchiú… Ciuccio fa’ tu!

Staveti bbe’!

ilnapolista © riproduzione riservata