Paccherianno pe ddoje a uno ‘a scuatra lucale â faccia ‘e tutte ‘e cestarielle

Trezziole, biancale, tricchi-tracche, fuja-fuje e bbotte a mmuro pecché ‘nnUcraìna ajeressera partette cu ‘o pere justo ‘nCiampionsa paccherianno pe ddoje a uno ‘a scuatra lucale  â faccia ‘e tutte ‘e cestarielle comme  ô telecrunista ‘e Mediasette, ca pe ttutto ‘o tiempo d’’a mubbara (macht)ce secciaje malamente…, ma s’êtte ‘a fa dint’ô fetillo dàtese ca ‘o Napule vincette e vvincette bbuono e ll’êsse pure pututo fà cchiù llargo si avesse apprufittato d’essere rummase unnice contro a ddiece quanno ô 68’ chella ‘nzalata ‘e ll’arbitro Collùm(me)(4) scuzzese [ca nsi’ a cchillu mumento êva siscato “ad capocchiam” caputianno ‘e carí (falli) e addirittura nutizzianno (ammonendo) senza nisciunu mutivo ô pulacco-napulitano…] se levaje finalmente  ‘e ffelle ‘e prusutto ‘a copp’a ll’uocchie,cecaje a vvedé ca ‘e russe steveno sistematicamente jucanno a ffà male cu ttrasute assassine a spezzà ‘e ccosce e sse decidette a ghiettarne fora uno.

‘Mmece ‘o Napule nun ne apprufittaje e se cuntentaje ‘e vencere pe ddoje a uno  ‘nchiudenno cu ‘na nichemata   (vittoria)’mpurtante ‘a primma jurnata ‘e Ciampionsa, fora casa ‘ncopp’ô  campo d’’a Dinamo i ‘o granne  prutacunista d’’a serata fove ‘o pulacco-napuliano Milikco muallaffo  (autore) ‘e ‘na pareglia (doppietta) d’adaffe (reti ) ca caputiajeno ll’avvalle musavo (l’iniziale svantaggio) firmato da Garmasce doppo 26 minute ‘e juoco

Passammo ê ppaggelle:

REINA 6,5 – Doppo manco’nu minuto fove custretto a llevà dâ porta ‘na malegna cunchiusione fatta cu ‘na siggiata ‘a mità ccampo da Sidorciucche. Fove però ll’unica parata ‘mmiezo a ttanti pricisi paríbbase (interventi) d’urdinaria amministrazziona; peccato ca ô 26’ nun ce putette fà niente  ‘ncopp’ô stuco ‘e Garmàsce ca tiraje libbero e ffranco troppo sotto mesura!

HYSAJ 5,5 – Si parlammo ‘ell’anfisallo (disimpegno) mancaje ‘e pricisione comme pure  nun fove matàlo (perfetto) marcanno: cumminfatte nun riuscette a ttené a te a Sigancoffe ‘nnaccasione d’’a maslaia (vantaggio) ucraina. P’’o riesto nun s’’a ‘ntennette, comme ‘mmece nurmalmente fa, cu pPeppe ‘a ‘Nguenta.

ALBIOL 5,5 – Serata streuza d’’o spagnuolo; accumminciaje comme peggio nun se puteva cu ‘nu  pallone perzo ca pe ppoco cunzentette a sSidorciucche a sfresà (sfiorare)  ‘a maslaia (vantaggio); cuntinuaje po a vvienetenne cu ‘a chiena i ‘a vacante nsi’ a ffarece vení ‘e riscenzielle a ttutte nujeaute ‘ntribbuna divano cu ‘nu carì (fallo) inutile fatto ô lemmeto d’’a camma (area) nosta  dint’ê minute tellicuse  (finali).

KOULIBALY 6,5 – Tutto summato fove ‘o meglio d’’a tràsera (retroguardia) ‘e  Sarri: ‘o solito  muro tuosto addó jetteno a ttuzzà ll’attaccante d’’a Dinamo, facette sí e nno ‘nu paro ‘e prane (errori) senza cunzeguenze; durante ô primmo ajone  ascette  spisso e ‘ncatirro  (volentieri) ‘ncuollo  a Yarmolenco pe ddà ‘na mana a  gGhoulamme.

GHOULAM 6 – Lassato quase sulo pe n’ajone (tempo), sufferette ‘e nfente di Yarmolenco. Però se pigliaje l’anticamma (rivincita) soja cu cchillu granne iabbro (cross) pe ll’1-1 ‘e Milikco; a ll’arrancua (ripresa), pigliate ‘e mmesure ‘e ll’avverzario, se cumpurtaje meglio.

ALLAN 6 – Rummanette ‘ncampo nsi’ ô prazzo (fino alla fine) cu ttutto quacche mmaradde  (acciacco).Tadammarraje (ringhiò) ‘ncopp’ a ll’avverzarie e ppure si quacche vvota arrancaje, tutto summato fove ‘o meglio d’’o  terzetto ‘e ll’almidana (centrocampo).

JORGINHO 5 – No ‘sta vota nun me piacette! Ajeressera ‘mmiez’ô campo se fósse trattato ‘e battaglià e nun surtanto urganizzà ‘o juoco e isso nunn’ ‘o ffacette e cquanno avette   palla, lle mancaje ‘a nicessaria saffenèja (lucidità) pe gghiucarla a mmestiere!

HAMSIK 5 – Certamente nun ghiucaje ‘a mubbara ca mm’êsse aspettato: troppe foveno ‘e pasiglie (passaggi) sbagliate i ‘e ppalle perdute, quaccuna arresecanno ‘e mettere ‘nzeria difficultà ‘a tràsera (difesa).                         [dô 62’ZIELINSKI 6 – Trasette pe ggestiunà (gestire) ‘o pallone tenennelo luntano dê piere  ucraine: àstaga aluaffata (missione compiuta)]

CALLEJON 6 – Tutto summato, se vedette poco i êsse pututo e avut’’a fà cchiú assaje, ma ‘o seje se ll’ammereta pecché pure si nun signaje nè ‘ntajaje jusaide (produsse assist) p’’e socie, cunfezziunaje ll’azziona d’’a maslaio  (vantaggio) nuosto.

MILIK 8,5 – Chello ca facette ajeressera vale tanto oro quanto pes’isso… e nunn’è ppoco! Nun voglio jastemmà e nnun voglio fà piglià collera a nnisciuno, ma nun mme sto’ muzzecanno ‘a lengua si dico ca ‘stu pulacco cca ‘e cabbesera (colpo di testa) è ppure meglio d’’o ‘nfamone ca nun annommeno: doppo d’’a pareglia  (doppietta) misa a ssigno ‘ncampiunato contro ô Milànno, se ripetette ajeressera cu cchella ca cunzentette ô Napule ‘e partí cu ‘o pere justo ‘nCiampionsa; p’’o riesto jucaje comme sape fà isso muvennose a sservizio d’’a scuatra, pronto a ttruvarse ô posto justo, ô mumento justo! [da ll’82’ GABBIADINI s.v.]

MERTENS 6,5 – Granni jadilà(spunti), granna tassezza  (rapidità) e ggranna alàila (intraprendenza); peccato ca lle mancaje ll’urdemu tallisso (guizzo),chillo d’’o mucaggimmo (bomber): è overo ca ce se mettette ‘nu palo ca lle dicette ‘e no, ma ce fove pure ‘a ‘mpricisiona soja. Dicisivo, cu Cagliecònno p’’o  2-1 tellicuso (finale).

[dô 73′ INSIGNE 6 – Trasuto pe ppoco cchiú ‘e ‘nu quarto d’ora cumbinaje poco, cuntentannose ‘e cuntrullà ‘a situazziona  accussí comme  facetteno ‘e cumpagne]

SARRI 6,5 – Chi vence ave raggiona e isso avette raggiona pure si quaccuno d’’e “titolarissimi” nun fove a ll’aldezza e quaccosa se po’ e s’à dda migliurà.

E fermammoce cca. ‘O Napule torna  a gghiucà  ‘ncampiunato sapato ca vene e ppirciò si dDi’ vo’ ce sentimmo dummeneca ca vene e spero ca ve pozzo cuntà ca ‘o Napule à vinciuto n’ ata vota cu ttutto ca sàpato ce ‘a vidimmo ô san Paolo cu ‘o bBulogna ca nunn’è ‘nu bbello accunto (cliente)! Staveti bbe’.