Milan-Napoli, le pagelle in lingua. Insigne gioca ai suoi livelli, Mertens è fondamentale nonostante gli errori sotto porta. Bocciati Tonelli e Hysaj.
Quase tutto a pposto guagliú! Intisarra (vittoria) ‘mpurtante assaje e nnicessaria pe stà ‘ncuollo a cchilli quatte pecurare d’’e rumanise e ppe ffà capí proprio a mMuntella i a cCapa ‘e vacca ch’è inutile ca se sonnano ‘o trammo alettrico pecché ‘o Napule ‘a Ciampionsa ce ‘a fa vedé cu ‘o cannucchiale… Quase tutto a pposto pirciò ajere a nnotte ô Meazza contro ê russe e nnire ‘e Muntella e de Capa ‘e vacca! Pecché aggiu ditto quase? E mmo ve dico.
‘E fatte jetteno accussí: s’era accumminciato ‘a poco ca ggià ‘o Napule êva dato dduje papagne ô Milanno ô 6′ cu Llorenzigno i ô 9′ cu pPeppe ‘a ‘nguenta e nnun erano passate diece minute ca ggià se mettetteno ‘e ccose ‘nchiaro e ppe bbona mez’ora se cuntinuaje accussí cu ‘o Milànno iabbato (intimorito) i a ccurto ‘e teleje (idee) ca cercava inutilmente d’antedrunnià (reagire) visto ca ‘e cuane (partenopei)gestiunaveno (gestivano) a mmestiere ‘o fullé (gara) difennennose urdinatamente e ssenza sufferí cchiú ‘e tanto anze ògne muttatto (contrattacco) d’’o Napule fove periculuso tanto ca cchiú ‘e ‘na vota ‘e cuane (azzurri) jetteno vicine ô terzo stuco (gol). E cchesto duraje quase pe ttutto ‘o primmo ajone (tempo) e allimmeno nfi’ ô 37’ quanno[‘o bbi’ lloco ll’acqua i ‘o quase!] Giorgigno e Tonelli ‘nchietta facetteno ‘a solita puttanata difenziva rijalanno a cKucka ‘a palla i ‘a pussibbilità – comme succedette – ‘e fottere a rReina ca penzo sta ancora chiammanno ‘e muorte ê suoje.
Arrivate però a ll’arrancua (ripresa), ‘o Napule rallentaje ‘o tase (il ritmo) e accumminciaje ‘a tarantella d’’e preoccupazzione cu ‘e russe e nnire ca attaccajeno cuglienno pure n’ afachía (traversa), sbaglianno n’ ata bbona accasiona e ffacennoce surrejere nsi’ ô prazzo (fine), mettenno ‘ncampo dô 75’ addirittura quatto marcazze (attaccanti) ma nun ce ‘a facetteno i ‘o Napule pure si sufferenno vincette e sse mettette dint’â sacca ‘e tre ppunte. E cchesto conta! Ll’ âmm’’a ferní però ‘e rijalà n’addaffa (rete) a mmubbara (partita) pecché dalle e ddalle ‘o cucuzziello addeventa tallo e ttanti stuche pigliate pe ffessaggine nosta ce ponno rummané ‘ncopp’ô stommaco! Passammo ê ppaggelle:
Reina 6 – Fove sempe taminno (sicuro) ascenno e arcaddanno(nelle uscite e nelle prese) e bbarí (incolpevole)’ncopp’ô stuco (gol) ‘e Kucka.
Hysaj 5,5 – Miezu zifo (voto) mancante pecché, iabbato e ccaracco (timido e preoccupato), sufferette ll’ajàvia (vivacità) ‘e Bonaventura e sse facette vedé poco annante.Nun voglio penzà a cchello ca po’ succedere sotto a cCristiano Ronaldo!
Albiol 6,5 – Avette mettere cchiú ‘e ‘na pezza addó sbagliaje Tonelli; assaje pusitive ‘nu paro ‘e granni cchiusure i ‘o fatto ca, cu ‘o capitano, fove ‘o cuano a gghiucà cchiú pallune sustatenno (impostando) ll’azziona.
Tonelli 5 – Serata no d’’o centrale; spisso ghirvadío (impreciso) e fora pusizziona fove addirittura caritío (disastroso) ‘ncopp’ô stuco (gol) ‘e Kucka: perdette palla e permettette ô sluvacco ‘e truvà ll’addaffa (la rete) ca ce facette surrejere!
Strinic 6,5 – ‘Nserata sí, fove uno d’’e meglie;mettette ‘a musarola a sSuso pure si fove ‘nu poco cundizziunato p’essere stato nutizziato (ammonito) ad capocchiam. Concedette poco o niente a cchi fósse fósse, ricuperaje cchiú ‘e ‘na palla e vvincette paricchi cuntraste e nnun era facile cu n’accunto comme ô spagnuolo.
Allan 6,5 – Se facette vaní a mmente ‘e specie antiche jucanno ‘nu granne primmo ajone( tempo) cu ajàvia (vivacità), saccà (generosità)e ccattiveria; po’ se ne scennette, ma senza particulari cunzequenzie. [Da ll’ 86′ Rog 6 – ‘e stima].
Jorginho 5,5 – Nun me piacette; êsse avut’’a fà assaje ‘e cchiú, ma doppo ‘na mez’ ora bunarella se perdette e smarrunaje cchiú ‘e ‘na vota; doppo d’avé fatto ‘a fessaria ‘e dà palla a tTonelli ô mumento meno adatto,jette ‘int’ô pallone nun riuscenno cchiú a ggestiunà (gestire) ‘o pussesso palla cu ccalma e rrazziucinio e ttutto ‘o Napule ne resentette.
[Dô 61′ Diawara 6 – Trasette cu pperzunalità ‘int’â mubbara (partita)quanno ‘a facenna addeventaje difficultosa e rriuscette a mmettere ‘e ccose a pposto! Ah, si Sarri ll’êsse fatto jucà dô primmo minuto!]
Hamsik 6,5 – Bbona mubbara (partita) d’’o capitano ca jucaje cu granna ‘nteliggenza.Nun se vedette troppo a ll’epata uffenziva (in fase offensiva), ma lla ‘mmiezo ‘a cumannaje isso, senza sparagnarese maje; ascette manucco (stremato).
[Dô 73′ Zielinski 6 – se facette truvà pronto dimustrannose mufiddo (utile) quanno c’êttem’’a difennere ô finale] .
Callejon [Peppe ‘a ‘nguenta] 6,5 – C’êsse miso pure ‘e cchiú pe ll’addaffa (rete) fatta cu ‘nu ‘nzertamiento (inserimento) d’’e suoje, cu ‘a palla fatta passà ‘mmiez’ê ccosce ‘e Donnarumma e ppecché mannaje ô manicomio a cCalabria, però po’ calaje troppo e cquase sparette i allora s’à dda accuntentà d’’o seje e mmiezo!
Mertens [Ciruzzo] 7 – ‘Nu premio p’’a frischezza soja e p’esserse sempe fatto truvà a ccentro d’’o juoco cu ggranni muvimente e ghiucate ‘a campione comm’è; ‘e ddoje ajude (assist) fatte so’ ccose da granne jucatore! Peccato pe cchilli dduje stuche (gol) magnate a ttu ppe ttu cu ‘o purtiere; puteveno essere chille d’’o tre a zzero o d’’o tre a uno. Pacienza!
Insigne [Lorenzigno] 7,5 – Finalmente isso! Se vedette ca tuccà a mMaradona lle facette bbene.’O stuco (gol) fatto fove overo assaje bbello e sbluccaje ‘o sibbacco (match); p’’o riesto una ‘e chelli sserate ca nun se putette marcà;doppo ‘nu primmo ajone (tempo) d’auta mistaua (livello) ce dètte dinto pure a ll’arrancua (ripresa) quanno sfresaje n’addaffa (rete) cu ‘na palla ca si fósse trasuta se ne cadeva ‘o Meazza.
all. Sarri 6 – ‘O Napule partette bbuono cunfermannose supriore;jucaje ‘na granna primma mez’ora mettenno ‘nchiaro súbbeto ‘e ccose e ‘nsuggezzione ‘e russe e nnire, ma po se ne scennette ‘e posa e, addirittura,arresecaje ‘e cumprumettere ‘a facenna. ‘Sta cosa nun po’ gghí, pecché si vulimmo ‘a luna avimm’’a ‘mpararce a ggestiunà ‘o risultato senza fà fessarie e rrijale. Pe mme Sarri êsse fatto bbuono a ffà jucà dô primmo minuto a dDiawara e nno a gGiorgigno!]
arb. Rocchi i ‘a chenca soja [2] – Nun sulo p’’o ricore nun dato a cCiruzzo ô pprincipio ‘e mubbara(partita) quanno – pe gghirece a cchillu servizzio – facette ddoje fessarie ‘int’ a mmanco ‘nu paro ‘e minute, ma p’’e ttroppi fetenzie d’’a bbanda ‘e chianchiere russe e nnire ‘ndanno d’’e cuane (azzurri) ch’isse vedette, ma nun sanziunaje o caputiaje, addirittura nutizzianno (ammonendo) ‘e nuoste ad capocchiam pe ssenza niente! ‘E ttentaje tutte p’arruvinarce ‘o sibbacco (match), ma pe grazzia ‘e dDio nun ce riuscette e s’ êtte ‘a fa cchiù ddinto ‘e dint’ô prozo!
E ffermammoce cca dànnoce appuntamento, si dDi’ vo’ a mmiercurí ca vene doppo d’’a mubbara (partita) ‘e martedí a ssera contr’ â Fiorentina, p’’o fullè (incontro) ‘e Coppa itaglia, speranno ca ve pozzo cuntà bboni ccose. Staveti be’.
