Le pagelle in lingua di Napoli-Juventus. Mario Rui jucaje cu quacche prublema ma pe ttutte ‘e nuvanta minuti luttaje cumme a ‘nu lione
Che surisfazziona guagliù! Vattere ‘a vecchia zoccola è ssempe ‘na cosa ca te mette ‘o ddoce ‘mpont’ ô musso, ma farlo cumme ‘o ffacettemo ajere mmerzo ê sseje ô Maradona addó ‘o Napule se mettette tre ppunte cauzante dint’â sacca è ancòra cchiú sapurito. E ggià pecché ‘o Ciuccio fove prutacunista ‘e ‘na granna mubbara (partita) e a ll’arrancua (nel secondo tempo) ‘o mettette a ppitoffio â vecchia zoccola pe ddoje a uno estedallanno (rimontando) doppo d’avé nchiuso ‘o primmo ajone (tempo) ‘nsotto ‘e n’addaffa (rete) pe bbia ‘e ‘na granna fessaria ‘e Chitelassa [ca ô 10’ rialaje ‘na palla a Mmorata ca, libbero e ffranco futtette a Ppastacrisciuta] fessaria assurda pe’nu jucatore scafato cumme ô creco… ‘Nzomma, cumme jette e ccumme venette ajere ‘e nuoste vuletteno affuzzà (vincere) e a ll’arrancua (nella ripresa) ce riuscetteno ringrazianno ê dicisive catte (errori) ‘e Szczesny [57’] e Kean[85’] e n’apprufittajeno apprimma Politano [ca ce dette ll’uno a uno ]e ppo ‘o Ggialante [ca ce rialaje ‘e tre ppunte] ca mo nce permetteno ‘e stà ‘ncimma â crassifica cu nove punte, otto ‘e cchiú d’’a vecchia zoccola… e scusate si è ppoco! Passammo ê ppaggelle:
OSPINA [Pastacrisciuta] 6+ Cumplessivamente êtte ‘a fa poco; ‘ncopp’ô stuco (gol) ‘e Morata nun putette fà niente, ma facette ‘na parata funnamentale ô primmo ajone (nel primo tempo) ‘ncopp’a Kculusevsky e sbrugliaje n’atu paro ‘e situazzione ‘ncopp’a ffessarie d’’o capitano e dd’’o Turco.
DI LORENZO 6- Faticaje cchiú d’’o nnicessario cu Kulusevski, ca nun le cunzentette ‘e scennere ‘nnante.
MANOLAS [Chitelassa] 5 Nun le pozzo perdunà chella granna strunzata ca mannaje ‘mporta a Mmorata. Uno cumme a isso cierti ccose nunn ‘e ppo’ ffà. Pe ffurtuna po se sciacquaje ‘a faccia e gghiucaje ‘nu sibbacco (match)asiffo (discreto).
KOULIBALY [‘O Ggialante] 7,5 Zaimmo (leader), cuncreto, benniamente (fisicamente) sustanziuso, ancòra ‘na vota prutacunista ‘e ‘nu sibbacco (match) contro â vecchia zoccola ca mettette sotto cu n’addaffa (rete) forze asciurtata a ll’85’, mmavajo (premio) ‘e ‘na granna atalossa (prestazione).
MARIO RUI 6,5 – Jucaje tutta ll’arrancua (ripresa) cu quacche prublema jasaddo (fisico), ma pe ttutte ‘e nuvanta minuti luttaje, attiento e ccuncentrato, cumme a ‘nu lione, facennose rispettà e arrivanno spisso ‘ncopp’â linia ‘e funno pe ffà nummero e jabbrà (crossare) Bbuono accussí. Bravo.[Dô 90′ MALCUIT [‘O Tignuto] 6 ‘e stima]
ANGUISSA 7 Se facette subbeto apprezzà pe cumme se muvette, p’’a cegna (grinta) i ‘o tavuchitto (tempismo). Da luntano arricorda a Bbakayoko, ma è assaje meglio!
FABIAN RUIZ [Anemalonga] 7 Atalossa (prestazione) tutto summato pusitiva: pruvaje a ttruvà ‘e giumetrie i a rraggiunà; nun difennette, ma tajennaje (impostò) sempe a mestiere e cacciaje ‘a surpresa ‘e ‘nu paro ‘e tire periculuse.
POLITANO 7 Dint’ê primme minute sfresaje (sfiorò) n’addaffa (rete) nzertannose (inserendosi) Po Pellegrini lle pigliaje ‘e mmesure e s’êtte ‘a calmà; però ô 57’ accumparenno arreto a n’avverzario sfruttaje ‘a meza fessaria ‘e Szczesny appujanno ‘mporta ‘a palla ‘e ll’uno a uno. Applavuso! [Dô 71′ LOZANO 6 Dette ‘na bbona mano purtanno cegna (grinta) e ttaccheja (energia)]
ELMAS [‘O Turco] 5,5 Nun è itimma (colpa) soja si nunn’è Zielinski e ppo’ ddà meno qualità quanno è ‘o mumento ‘e cunchiurere o azziunà ‘nu cumpagno; nurmale ca all’ arrancua (ripresa) nun turnasse ‘ncampo). [Dô 46′ OUNAS 6,5 Se piazzaje ‘nfra ê llinie cumme a ‘na vespa mannanno ô manicomio ‘a vecchia zoccola]
INSIGNE 6,5 Bbona atalossa (prestazione) prupunennose,’mmentanno, taglianno o pruvannoce comme ‘nnaccasione ‘e ll’uno a uno. Ascette arazzabbiato (infortunato) [Dô 73′ ZIELINSKI 6 ‘e stima]
OSIMHEN [Caromecosta] 5,5 -Putette fà poco pecché cu ‘e bbone, ma cchiú spisso cu ‘e ttriste Bonucci e Cchiellini lle metteteno ‘a musarola e cce parette ‘nu lione dint’â carabbozza (in gabbia).[Dô 90′ PETAGNA 6 ‘e stima]
all. SPALLETTI 7 Bravo a ppriparà ‘o sibbacco (match), a sfruttà ‘a panca i ‘e cqualità d’’e suoje capace ‘e ‘na grana riazziona!
arb. IRRATI 5 Ce porta bbuono, ma ajere nun facette tutto ‘o duvere suojo permettenno a Cchiellini e Bbonucci ‘e caucià a Ccaromecosta senza ca isso dicesse niente!
E bbasta accussí
Mo, si ‘o Cielo ‘o ccunzente ce dammo appuntamento pe vviernarí ca vene e pparlammo d’’o sibbacco (match) ‘e Cuppetta aiurupea Leicester City – Napoli. Staveti bbe’!
