Se vedette ca Spalletti à appruntato ‘na scuatra ca po’ arrivà nun dicimmo addó! Cumprimente
NAPOLI CAGLIARI (26.9.21) 2 A 0 ‘A VEDETTE ACCUSSÍ
E ppure chesta è ffatta guagliù i ajeressera ‘o Ciuccio se turnaje a ppiglià ‘nsulitaria ‘a cimma d’’a crassifica cu diciotto punte doppo d’avé affuzzato (vinto) seje sibbacche (match) ‘ncopp’a sseje. Cumminfatte ajeressera ô Maradona, Napoli-Cagliari, mubbara (partita) d’’a sesta jurnata se cunchiudette cu n’attunnato (rotondo)doje a zzero ca nun facette ‘na chieja, e ce facette vedé ‘nu bbellu Napule ca zallabbaje (palleggiò) sicuro, attiento e allero pe nuvanta minute, senza ca maje ll’avverzarie lle facesse ‘o cellechío! Ll’arnassa (vittoria) arrivaje cu n’addaffa (rete) p’ajone (per tempo): a ll’ 11′ Caromecosta ce schianaje ‘a strata i ô 57′ Insigne mettette ô ssicuro ‘o natiggio (risultato) menanno dinto ‘nu sacrusanto ricore ca ll’ucummo (arbitro) ce dette dappo ‘nu carí (fallo) ‘e Godin(no) ‘ncuoll’ô stesso Caremecosta ca ajere fove ‘nu castico ‘e Ddio pe ll’isulane ‘e Mazzarri. Bbuono accussí!
Passammo ê ppaggelle:
OSPINA [Pastacrisciuta] 6 S’êtt’’a spurcà ‘e guante sulo ‘ncopp’a ‘nu jabbro (cross) strevezo ‘e Nandez(zo) pecché, p’’o riesto êtte ‘a guvernà sulamente quacche pasiglio arreto (retropassaggio) d’’e cumpagne.
DI LORENZO 6,5 – Cumplessivamente scrupuluso (diligente) i attiento, ma se vedette ‘e cchiú a ll’arrancua (nella ripresa) quanno addivintaje pure periculuso.
RRAHMANI 6 Jucaje a mmestiere e ssenza sfregazze (sbavature) favurito dô Cagliari ca facette poco e nniente.
KOULIBALY [‘O Ggialante] 6,5 Tuosto e spirciativo (sbrigativo) mettette ‘a musarola a Joao Pedro e ffacette ‘o ppoco ‘e fatica ca s’êtt’’a fà senza prubbleme e ccu granna pricisione scennenno pure ‘nnante quanno capitaje.
Mario RUI 7 Granna atalossa (prestazione) d’’o purtuchese ca s’’a vedette cu ‘nu brutt’accunto (cliente), cu Nandez(zo), ma ‘mprattica nun sbagliaje niente, anze ce facette vedé jucate gruliose (di classe), risultanno sempe risulutivo (provvidenziale). Applavuse.
ZAMBO ANGUISSA [‘O ‘Ntussecuso] 7 Pure ajeressera risultaje mumazzo (ottimo) tuaffanno (recuperando) ‘na cifra ‘e pallune, cupulianno (dialogando) cu ‘e cumpagne e ‘nzertannose (inserendosi). Poco mancaje e nnun signasse ‘o tre a zzero. Peccato.
RUIZ [Anemalonga] 6,5 – Quanno tenette ‘a palla nun ‘a perdette maje zallabbanno (palleggiando) alicante e urdinato. [dall’88’ DEMME 6 ‘e stima]
POLITANO 5,5 Ajeressera facette assaje meno ‘e chello ch’êss’avuto ‘a fà! [dô 69′ LOZANO 6,5 Friccecariello cumm’è pure cu ppocu spazzio a ddispusizzione se dette da fà pe scumpiglià ‘a trasera (difesa) isulana!]
ZIELINSKI 6,5 Sapette cumme se po’ ffà male i ‘o ffacette a ll’11’ jenno a ppiglià ‘na palla ‘mprattica perza e ffacennola addivintà ‘nu jabbro mumazzo (perfetto cross) pe Ccaromecosta ca ‘o mettette a ffrutto! [dô 69′ ELMAS [‘O Turco] 6 – Facette ‘o ssuĵo dint’ô niajo (nel finale) d’’o Ciuccio, cu ‘a cegna (grinta) nicessaria!]
INSIGNE 7 Sustanziuso e ccu ‘o ggenio d’’o ffà ce facette vedé cchiú ‘e nu daimmo (scambio) cu Ccaromecosta e cquacche ghiucata gruliosa (di classe) e nchiudette ‘e cunte signanno ‘o ricore d’’o doje a zzero, i ‘o tiraje a mmestiere, cumme s’à dda fà!, cu ‘na cagliosa centrale ca Cragno vedette sulo ‘e passà! [dô 77′ OUNAS 6 Trasette súbbeto i a mmestiere ‘nsibbacco (nel match) currenno, ‘nzertannose (inserendosi) e sservenno a Ppetagna ‘a palla d’’o pussibbile tre a zzero.]Êsse ‘a jucà ‘e cchiú, ma assaffa (purtroppo) se joca cu unnece suggette…
OSIMHEN [Caromecosta] 7,5 ‘Nu spettaculo! Signaje e ss’abbuscaje ‘nu ricore e ppe ttutta ‘a mubbara (partita)mannaje ô manicomio ll’isulane ‘nfromme pigliava ‘a palla. [dô 77′ PETAGNA 6 – Quase lassaje ‘o mierco suĵo dannose da fà cu ccegna e azzaja (grinta e caparbietà)].
all. SPALLETTI 7 Se vedette ca à appruntato ‘na scuatra ca po’ arrivà nun dicimmo addó! Cumprimente.
arb. PICCININI 5,5 Facette quase tutto ‘o duvere suĵo si nun cuntammo chillu cartellino jalizzo (giallo) pe Ccaromecosta ca nun s’’o mmeretava!Pacienza.
E bbasta accussí. Sbattimmo ‘e mmane e mmo ci ‘o Cielo ‘o ccunzente ce sentimmo p’’o primmo uttombre pe pparlà d’’o sibbacco (match) ‘e cuppetta iurupea Napoli – Spartàk Mosca.
‘E cchiú, ‘e cchiú ‘e cchiú Ciuccio fa’ tu!
Staveti bbe’