Le pagelle in lingua di Udinese-Napoli: 7,5 a Fabian Ruiz, Anguissa, Osimhen e Spalletti. Sufficienza all’arbitro
Canta Napule guagliú! Napule ‘ncimma â crassifica sulo i a nnatiggio (punteggio) chino! E ggià pecché ajeressera, Udinese-Napoli, sibbacco (match) d’’a quarta jurnata ‘e serie A jucato â Dacia Arena d’ Udine, se cunchiudette cu ‘nu tunno, retissante (clamoroso) quatto a zzero p’’o Ciuccio ca fove padrone d’’o campo, jucaje ‘na granna mubbara (partita) lassanno ê lucale sí e nno ‘e primme diece minute, ma po pigliaje ‘mmanno ‘e rretene d’’o juoco e pp’’e janche e nnire fove notte; cumminfatte cu ‘nu paro d’addaffe (reti) p’ajone (per tempo) ‘o Ciuccio mettette sotto ‘a scuatra ‘e Gotti: signajeno ô 24′ Caromecosta, po ô 35′ Rrahmani, i a ll’arrancua (nella ripresa) ô 52’’O Ggialante e a ll’ 84’ Lozano ca mettette ‘o punto fremmo â facenna.
Passammo ê ppaggelle:
OSPINA [Pastacrisciuta] 6,5 Cu ‘nu granne taccullo (intervento) ‘nterra sturnaje ‘na cunchiusione ‘a fora ‘e Pussetto mantenenno ‘a porta acrata (inviolata) e ffacennose perdunà d’avé ‘nu paro ‘e vote arresecato coccosa facennose safà (pressare) da ll’artigliere (attaccanti) lucale.
DI LORENZO 6,5 Ce mettette ‘nu poco ‘e tiempo pe ppiglià ‘e mmesure ‘e Pereyra, ma po ‘o ffacette e scennette pure annante.
RRAHMANI 7 Arreto fove jasaddo (granitico) e mmaje fora posto e annante se facette truvà pronto a mmettere a ffrutto ‘e capa ‘a palla d’oro d’’o Ggialante.
KOULIBALY [‘O Ggialante] 9 ‘O meglio ‘ncampo! Nun sulo fove ‘o zaimmo (leader) d’’a trasera (difesa) ca sapimmo, ma po ce mettette ‘o missiddo (assist) pe Rrhamani, e ’na maraviglia ‘e stuco (gol) ca ce facette alliccà ‘o musso! Coppola ê ddenocchie!
MARIO RUI 7 A mmancina cuntrullaje senza sfragazze (sbavature) chi capitaje, affuzzaje (vinse) ‘a brica (duello) cu Mmolina, dô pere suĵo vellutato partette ‘o lanzo p’’o capitano ‘nnaccasione d’’o meizzo luvardo (vantaggio azzurro); po ‘nu missiddo (assist) pe Llozano.E scusate si è ppoco! [Da ll 86′ ZANOLI s.z.]
FABIAN RUIZ [Anemalonga] 7,5 – Granna atalossa (prestazione) e mmo ve dico: ‘nu palo cuoveto cu ‘nu tiro ‘e mancina da fora, muvimentaje ô Ggialante ‘nnaccasione d’’a siconna addaffa (rete) e ppo lle servette ‘o missiddo (assist) p’’o tre a zzero! [Da ll’ 81′ OUNAS s.z.]
Zambo ANGUISSA 7,5 Jasaddo (granitico) cumm’è, se piazzaje ‘nnante â trasera (difesa) e ccu ccegna (grinta) e azzaja (caparbietà) cunquistaje ‘na cifra ‘e pallune facennose rispettà!
POLITANO 6 Ce aspettavemo ‘e cchiú, ma ajeressera a ddritta facette sulo ‘o stritto nicessario…[Dô 72′ LOZANO 7 Trasette, steva ‘e ggenio e ppiazzaje cu ‘na bbella cunchiusione,’o quatto a zzero ê spalle d’’o purtiere lucale.]
Eljif ELMAS 6 Facette poco ‘nzertannose poco p’’o lluongo e ghiucanno sulo deritto pe dderitto p’’o llargo.
INSIGNE 7 Nun signaje, ma ce jette vicino e ffove prutacunisto ‘e ‘na bbona atalossa (prestazione) cercanno ‘e farese sempe vedé e d’essere periculuso; dicette grazzie a Mmario Rui pe cchella palla a zzuco ‘e caramella ch’isso ô 24’ cu ‘nu granne muvimento trasfurmaje a sciandella (in pallonetto) ca Caromecosta êtte sulo menà dinto! [Dô 72′ ZIELINSKI 6 Cuoncio cuoncio, tanto pe mmetere minute ‘int’ê ccosce.]
OSIMHEN [Caromecosta] 7,5 ‘O vattetteno, ma isso nun mullaje maje facenno muvimente ‘mpurtante e ffacennose truvà pronto a menà dinto ‘a sciandella d’’o capitano. [Da ll’ 81′ PETAGNA s.z.]
All. SPALLETTI 7,5 Liggette bbuono ‘o sibbacco (match) e ce dètte chello ca vulevamo facennoce vedé ‘na scuatra matàla (perfetta), dicisa, tosta e bbella da vedé capace ‘e accummincià ‘o campiunato cu ssette parme ‘e saciccio! Bravo!
Arb MANGANIELLO 6 – Facette ‘o duvere suĵo.
E bbasta accussí. ‘Na vota tanto putimm’essere cuntente ‘e cumme stanno jenno ‘e ccose. E sperammo ca nun cagnano.
Mo, si ‘o Cielo ‘o permette ce sentimmo viernarí ca vene pe ccuntareve che facimmo ggioverí ‘mmerz’ê sseje e mmezo a Genova contr’ê duriane. ‘E cchiú, ‘e cchiú, ‘e cchiú Ciuccio fa’ tu!
