Le pagelle in lingua. Osimhen da 7,5 mentre a Valeri 4,5: fove mannato pe spezzarce ‘e passe, ma s’êtte ‘a fà dint’ô prozo pecché nun ce riuscette
E vvaje cu ‘a museca guagliú! Canta Napule. Ajere ‘o Ciuccio jette a Mmarassi contr’ê lucale duriane e ddimustraje d’essere ancòra ‘na scuatra ‘nsaluta ca se mettette tre ppunte sustanziuse dint’â sacca affuzzanno (vincendo) pe ddoje a zzero cu n’addaffa (rete) p’ajone (tempo) jucanno ‘e primme quarantacinche minute curaggiuse e n’arrancua (una ripresa) cchiú ccalma e abbasata, ma sempe cunzistente, cumme ggià dê primme minute nce fove chiaro vista ‘a scuatra sistimata [meglio ‘e chella vista contr’â vecchia zoccola…] misa ‘ncampo e vvisto ca jucajemo cu ‘a muntazzimma (divisa) furtunata, ca petecca (scimmiotta) chella ‘e ll’Argentina ‘e Diego Armando…e nno cu cchella fetenzia jettatoria ‘nzullata (indossata) a Tturino.
Vaje cu ‘a museca, vaje! ‘Nzomma ajere vedettemo ‘na mubbara (partita) agruppina (intensa), cuntrassignata da ‘nu juoco forte, nascitto (energico) e mmasculino addó avette ‘a meglia ‘a qualità d’’o zzarriabbuo (palleggio) cuano (azzurro) cu Anemalonga e ccu Zielinski ‘nfra ‘e cchiú ppronte e ddicise e ffoveno proprio lloro ‘e prutacuniste d’’o sibbacco (match) mentre Caromecosta mettette ‘a cerasella ‘ncopp’â pizza doce appruntata dê nuoste…, cusicché ‘o Napule s’affrancaje ( si riscattò) dâ bbrutta azzimma (sconfitta) asseccata contro â vecchia zoccola!
Passammo ê ppaggelle.
OSPINA [Pastacrisciuta] 6,5: mantenette ‘a porta acrata (indenne) risultanno dicisivo cu ‘nu paro ‘e granno tacculle (interventi) sestimate e ccuraggiuse; se scuntraje cu Ggabbiadini, accusanno prubbleme adilare (muscolari), ma strignette ‘e diente e rrummanette ô pizzo suĵo! Applavuse.
DI LORENZO 6,5: Attiento e mmascullo (lucido) arreto e ttanta, tanta defatta (spinta) lla ‘nnante cu ‘nteressanten tatacalle (sovrapposizioni) a Ppolitano e Zzielinski.
MANOLAS (Chitelassa) 5,5: Êsse pututo fà meglio pecché arresecaje (rischiò) ‘e cuncedere ‘nu stuco (gol) a Ggabbiadini muittanno (impostando) e ll’êtte’a fermà cu ‘e triste…. À dda migliurà!
KOULIBALY [‘O Ggialante] 6: Atalossa (prestazione) ‘e sustanza cu ‘a nicessaria cegna (grinta) e azzaja (caparbietà) mettenno ‘a musarola mo a Ggabbiadini mo a Qcuagliarella e ffacennose vedé pure annante!
Mario RUI 5,5: Durante ê primme quarantacinche minute facette quacche sfregazzo (sbavatura) sdint’â mità ccampo nosta, ma se facette perdunà a ll’arrancua (nella ripresa) cu quacche jabbro (cross) periculuso.
RUIZ [Anemalonga] 8: Forze ‘o meglio d’’e suoje: priciso a ll’epata ‘e muitto (in fase di impostazione) e mmurtidfero (letale) ‘nnante â porta: poco doppo d’’a mez’ora sbluccaje ‘a facenna cu ‘nu turriddo (siluro) anculato da luntano, po nciarmaje n’accasione ‘e signà pe Zzielinski cu ‘na palla a zzuco ‘e caramella e ppo da ‘mmiezo ô campo cchiú ‘e ‘na vota dette da fà a Audero. [Dô 90′ BAKAYOKO sv].
DEMME 6,5: Atalossa (prestazione) ‘e qualità e cquantità ‘mpignato cumme fove a ddà sciato â munavara (manovra) uffenziva napulitana.
POLITANO 5,5: Se vedette sulo p’’e primme minute, po quanno Insigne, Anemalonga e Zzielinski saglietteno ‘ntusiello, se chiammaje forae sparette. Peccato! [Dô 75′ LOZANO 5,5: Jellato, appena trasuto fove nutizziato (ammonito) pe ‘na cosa ‘e niente e sse nutaje sulo pe n’assuoccio cu ‘nu duriano.
ZIELINSKI 7,5: Mutirro (regista) e ppierno avanzato d’’o Napule, se facette nutà p’’e tanti cuntrolle ‘e palla e gghiucate ‘e primma ca mettetteno ‘ndifficultà ‘a trasera (retroguardia) duriana; se chiammaje ll’applavuse pe cumme cupuliaje (dialogò) cu Caromecosta e Anemalonga e p’’o missiddo (l’assist) ‘nnaccasione d’’a primma addaffa (prima rete) [dô 75′ MERTENS[Ciruzzo] 7: Trasette e ‘ncapo ‘e dudice minute ‘nventaje ‘o missiddo (l’assist) justo pe Ccaromecosta. E avastaje]
INSIGNE 6: Cercaje ‘a porta cchiú ‘e ‘na vota da luntano, ma nun ‘a truvaje; chella vota ca succedette ce penzaje Audero a ddicerle ‘e no! Pacienza. [dô 90′ ELMAS [‘O Turco] sv].
OSIMHEN [Caromecosta] 7,5: Cumbattete pe troppu tiempo cu Colley ca lle dette filo ‘a torcere; però a ll’87’ sfruttanno ‘na bbona accasione i ‘o cagno ‘e marcatura riuscette a ffottere ô purtiere duriano i a ddarece ‘o doje a zzero!
all. GATTUSO 7: ‘Sta semmana s’aveva faticà ‘ncopp’â capa d’’e jucature p’evità ca se scuraggiasseno doppo de ll’azzimma (sconfitta) contr’â vecchia zoccola… e isso ‘o facette e sene vedetteno ‘e natigge (i risultati) pusitive. Muimma (missione) cumpiuta!
Arb. VALERI 4,5: Carta cunusciusta, fove mannato pe spezzarce ‘e passe, ma s’êtte ‘a fà dint’ô prozo pecché nun ce riuscette; però ‘na fetenzia grossa ce ‘a facette: chella ‘e nutizzià (ammonire) pe ssenza niente a Llozano íattico (diffidato) ca mo dummeneca ca vene à dda zumpà ‘a tarra (sfida) casalinca cu ‘a Bbisciona.
