Le pagelle in napoletano di Napoli-Benevento: ‘Assa fà ô Cielo guagliú; finalmente ‘na cosa quase adderitta. A ccunte fatte ajere ‘e nuoste doppo ‘nu sibbacco tutto summato cuièto e ssenza prubbleme
‘A VEDETTE ACCUSSÍ
‘Assa fà ô Cielo guagliú; finalmente ‘na cosa quase adderitta! Ajere ‘mmerz’ê sseje ô Maradona ‘o Napule sunaje ddoje chianette fremme ô Bbeneviento e sse mettette dint’â sacca tre ppunte ca ô niajo (termine) ‘e jurnata lle cunzentetteno ‘e se piazzà ô sesto posto a cquarantatré ppunte ‘ncrassifica ‘nchietta cu ‘a Lazio cu ‘a pussibbilità pure, si ‘a sciorta nce bbenedice d’arrivà ô quarto posto ca pe ‘sta caracuddamma (stagione calcistica) è cquanto ‘e mmeglio oramaje è ppussibbile.
A ccunte fatte ajere ‘e nuoste doppo ‘nu sibbacco (match) tutto summato cuièto e ssenza prubbleme ‘e nuoste turnajeno a mmetterse ‘e tre ppunte dint’â sacca doppo n’ urdem arfatro (periodo) jellato, ‘ntruviliato e macaddejo (complicato) ca sperammo fósse fenuto pe ssempe! Ajere ‘o Napule turnaje a ttruvà a Cciruzzo e ccu isso chella periculosità uffenziva ca nce permettette d’affuzzà pe ddoje a zzero; ggià ô 34’ fove proprio Ciruzzo a sbluccà ‘a facenna mettenno a ffrutto ‘na bbella palla ‘e Ghoulamme e a ll’arrancua (ripresa) nce penzaje Politano ô 66’sfruttanno ‘e scianco ‘na palla tozzi-tozze sotto â porta d’’a Streca. ‘Nzomma tutto adderitto o quase i ‘o quase fove ‘a fessaria fatta dô Ggialante ca se facette jettà fora doppo dduje cartelline jalizze (gialle) pu dduje carí(falli) inutile e asasa ‘o siconno overamente scemo! Pacienza.
E ppassammo ê ppaggelle:
MERET [‘O Lungagnone] s.v.: Nunn’êtte fà niente e ssulo ‘na vota facette ‘a sceneggiata ‘e se menà ‘nterra pe fermà ‘nu tiro ‘e Lapadula ca fósse juto fora.
DI LORENZO 7: Cu ccegna (grinta) e zzureja (rapidità) se magnaje ‘a ferza ‘e dritta e dette ‘na mana a Ppolitano ‘a mmenà dinto ‘a palla d’’o doje a zzero.
RRAHMANI 6,5: Nisciunu sfregazzo (sbavatura) p’’o guaglione prutacunista ‘e ‘na bbella atalossa (prestazione) a ccentro d’’a trasera (difesa) nosta.
KOULIBALY [‘O Gialante] 4,5: Nun lle pozzo perdunà d’eeserse cumpurtato cumme a ‘nu pesce ‘e cannuccia facennose jettà fora e sciupanno tutto ‘o bbuono fatto primma.
GHOULAM 7: Ll’atalossa (prestazione) ‘e ll’algerino fove da applavuse: missiddo (assist) pennellato pe Cciruzzo e presenza sustanziosa ‘ncopp’â curzia mancina.
RUIZ [Anemalonga] 6: ‘A chiena i ‘a vacante:pe ttutto ll’ alauallo (primo tempo)riuscette a trasí e ffarese vedé ‘nfra ‘e mmaglie d’’a trasera (difesa) sannita, ma a ll’arrancua (nella ripresa) se jette annascunnenno. Peccato.
BAKAYOKO [‘O Mammone ] 6,5: Troppo bbatejo (lento) e mujccaddo (macchinoso) però riuscette ‘e riffe o ‘e raffe a ricuperà tante e ttanti pallune facenno aculla(muro).
POLITANO 7: ‘Nfra ‘e meglie d’’e suoje: facette partí cchiú ‘e n’azziona e sse levaje ‘o sfizzio ‘e signà ‘e scianco ‘o doje a zzero.
[Da ll’84’ Hysaj[Mezacucchiara]: sv.]
ZIELINSKI 6,5: Penetraje assaje spisso ‘nfra ‘e mmaglie d’’a trasera (difesa) sannita periculosamente e ssignaje n’addaffa (rete) cassata pe quistione ‘e centimetre, ma ca se fósse mmeretata d’essere cunvalidata pe cquanto fóve bbella!
[Da ll’84’ Maksimovic[‘O ‘Ntontero]: sv. Pe ffurtuna!]
INSIGNE 7: Nun signaje, ma jucaje bbuono ‘ncopp’â trecquarte e ffacette nascere ‘o doje a zzero cu cchella palla ‘nduvinata misa sotto porta beneventana.
MERTENS [Ciruzzo] 7,5: Finalmente Gattuso lla ‘nnante po’ ccuntà ‘ncopp’a ‘na frezza ‘e cchiú. Turnato titulare ‘ncampo doppo tantu tiempo ‘o ffacette cumme meglio nun se fósse pututo: subbeto ‘na zampata ca facette male e ppo semmenaje periculo ‘mmiez’â trasera (retroguardia) d’’a Streca! Applavuse. [Da ll’82’ ELMAS [‘O Turco]: sv.]
all. GATTUSO 6,5: Ajere fessarie nun ne facette e pputette cuntà ‘ncopp’a ghiucature cumme Ciruzzo e Ghoulamme… e mmo po’ essere ca ‘a primmavera ll’ajuta e nce ajuta speranno ca nun ce sta ata ggente ca se fa male e se ponno ricuperà ati pedine!
arb. ABISSO 6 Facette ‘o duvere suĵo, ma fove troppo pignuolo e ardurabbio (fiscale) !
Bbasta accussí. Mo si ‘o Cielo ‘o ccunzente ce sentimmo ggioverí pe ccuntareve che succedere miercurí ‘ncasa d’’o Sassuolo e sperammo ca pozzo cuntareve ati bboni ccose. Ciuccio fa’ tu! Staveti bbe’.
