Che suddisfazziona guagliú! Doppo d’’e tre ppunte ca ‘o Ciuccio se jette a ppiglià a Mmilano contr’ê diarule russe e nnire, ajere cuncedette ‘o bbisse
’A VEDETTE ACCUSSÍ
Che suddisfazziona guagliú! Doppo d’’e tre ppunte ca ‘o Ciuccio se jette a ppiglià a Mmilano contr’ê diarule russe e nnire, ajere cuncedette ‘o bbisse e doppo ‘nu sibbacco (match) mascullo (lucido) attiento, cuncentrato e ddiciso ‘e nuoste se mettetteno dint’â sacca n’ati tre ppunte assaje pesante vattenno ê pecurare rumanise pe ddoje a zzero e avastaje n’ajone (un tempo) sulo [‘o primmo] pe ccunchiurere ‘a facenna: a ddicidere fove ‘a pareglia (la doppietta) ‘e Ciruzzo [27’ e 34’] ca permettette ‘e vedé cchiú vvicino quarto posto ‘ncrassifica e Ciampionsa.E pp’’o mumento nun se po’ ffà ‘e cchiú.
Passammo ê ppaggelle:
OSPINA[Pastacrisciuta] 6,5 Fove chiammato ‘ncausa sulo ‘nu paro ‘e vote, ma ‘o ffacette cu ammanna (sicurezza) e pruntezza.
HYSAJ[Mezacucchiara] 6 Atalossa (prestazione) urdinata e ddicisa sapenno sempe chello ch’êva ‘a fa.
MAKSIMOVIC[‘O ‘Ntontero] 6 ‘Na bbona nutizia: nun smarrunaje jucanno pulito pe ttutto ‘o primmo ajone e mmustrannese cchiú mascullo (lucido) d’’o ssolito[Da ll’86’ MANOLAS[Chitelassa] 6 ‘e stima.
KOULIBALY[‘O Ggialante] 6,5 Lacrassaje (guidò) ‘a sezziona urdinatamente, ‘a fora ‘e ‘nu sfregazzo (sbavatura) quanno a mmez’ora dâ mustalà (dalla fine) ascenno rialaje palla a Ppellegrini purtanno ‘a Roma vicino a ll’addaffa (rete), cosa ca lle costa miezu zifo (voto) mancante.Íattico (diffidato)se facette nutizzià (ammonire) pe scuntà ‘a squalifica certa cu ‘o Crotone e cce stà contr’â vecchia zoccola.
RUI 6 Nun perdette maje ll’arrequia (calma) e nnun smarrunaje pure si a ll’arrancua (nella ripresa) sufferette ‘a defatta (spinta) ‘e ‘nu Karsdorp(po) uno d’’e meglio pecurare.
RUIZ[Anemalonga] 6 Jucaje ‘na mubbara (partita) ‘e perzunalità e ffove pusitivo pure facenno aculla (contenimento).
DEMME 6,5 Pure ajere fove ‘o pierno ‘e ll’armidanno (centrocampo) cu n’atalossa (prestazione) ‘e sustanza valiuso(essenziale) e taminno (prezioso) POLITANO 6,5 Dint’â primma mez’ora fove forze ‘o meglio d’’e nuoste e ffove isso ca partuicipaje â festa cu cchella sponna ca purtaje ô doje a zzero. Applavuse! [Dô 73’ LOZANO 6 ‘e stima pecché trasette e ffacette sulo atto ‘e presenza.]
ZIELINSKI 7 Se muvette a mmestiere jucanno mo ‘e sustanza, mo ‘e cazzimma cumme fove nicessario; se chiammaje ll’applavuso d’’a tribbuna-divano pe ccumme s’abbuscaje chella timmurria (punizione) ca fruttaje ll’uno a zzero. [Dô 73’ ELMAS[‘O Turco] 6 Trasette quanno ‘o Napule êtte ‘a gestiunà (gestire) ‘o doje a zzero e ffaticaje p’’o nnicessario.
INSIGNE 6,5 Uno d’’e meglie jucaje cu cqualità e ssustanza cuntrullanno, ‘nfilannose,allunganno o strignenno cumme e cquanno fove nicessario. [Da ll’86’ BAKAYOKO – sv.]
MERTENS[Ciruzzo] 8 Miezu zifo (voto) mancante pecché nsi’ ô 27’ ggiraje quase a vvacante, po però arrivajeno ‘e ddoje addaffe (reti) e ffove tutta n’ata facenna cu Cciruzzo prutacunista. [Dô 66’ OSIMHEN[Caromecosta] 6 Niente ‘e cuncreto, ma bbona difesa d’’a palla e quacche bbona corza. Po’ mmigliurà.
all. GATTUSO 7 Avette chello ca vuleva affuzzanno (vincendo) ‘nu stibbacco (sfida) tattechiunno (tattico) cu Ffonseca: ‘o Napule ascette sempe a ttiempo e ccu cqualità i ‘a pressiona (pressing) scadente d’’a Roma lle facette ‘nu bbaffo. ‘a vecchia zoccola s’à dda stà attienta: ‘o Napule nce sta i è n’accunto (cliente) scommeto e scamuso!
arb. Di Bello 5 Chisto ce porta bbuono, fetenzie grosse nun ce ne facette, però cu nnuje fove
E bbasta accussí, alliccammoce ‘o musso pe ‘sti tre sustanziuse tre ppunte e mmo, si ‘o Cielo ‘o vvo’ ce sentimmo p’’a dummeneca ‘e Pasca doppo d’’o stibbacco (scontro) casalinco ‘e sapatu ssanto contro ô Crotone.