ilNapolista

Ospina, voto 9: “E nnunn’aggio esaggerato”

Le pagelle in lingua di Bologna-Napoli. Il colombiano decisivo, Lozano irresistibile: “Dicimmo grazzie a Ggattuso ca ll’à fatto turnà a essere isso!”, da 7,5

Ospina, voto 9: “E nnunn’aggio esaggerato”

Canta Napule guagliú â faccia d’’a vecchia zoccola, ‘e ll’ucummo (arbitro) Pasqua [4 e ppo ve dico] d’’e tanti cestarielle ca ce menano favette! Canta Napule! Cu ll’arnassa (vittoria) d’ajere ‘ncopp’ô campo d’’e murtadelle d’’o zincaro ‘o Ciuccio se mettette dint’â sacca tre ppunte sustanziuse ca a ccunchiusione ‘e jurnata ‘o vedeno terzo ‘ncrassifica [14 punte] ‘ncopp’ a Rroma, Atalanta, vecchia zoccola, Bbisciona, sempe aspettanno ca quaccheduno lle torna a cce ddà chillu punto ca lle levajeno p’’o sibbacco (match) nun ghiucato contr’â vecchia zoccola. Ajere ‘o Napule jucaje ‘na mubbara (partita) duminata pe cquase tutt’’e nuvantacinche minute e sulo dint’a ll’rdeme seje sette minute ‘e mmurtadelle ce spaventajeno ‘nu poco… e ggià pecché p’’o riesto ‘ncampo ‘o Bbulogna nun ce stette i ‘o Napule êsse pututo affuzzà (vincere) assaje cchiú llargo sempe ca Lorenzigno e Cciruzzo êsseno centrato ‘o parlànfaccia d’’a porta, sempe che ll’ucummo nun êsse cassata n’addaffa (rete) bbona d’’o Ggialante e nce avesse dato ‘e duje ricure a ffavoreca nun vulette vedé. Pacienza, affuzzajemo (vincemmo) sulo p’uno a zzero e cce mettettemo dint’â sacca tre ppunte cunzistente recuovete ‘ncopp’a ‘nu campo scamuso. Passammo ê ppaggelle.

OSPINA [Pastacrisciuta] 9 E nnunn’aggio esaggerato.Durante ô primmo ajone (nel primo tempo) sulo n’asciuta auta,ma all’arrancua (nella ripresa) salvaje ‘a facenna i ‘o natiggio (risultato) primma ascenno ‘e capa dint’â trcquarte [e ppoco mancaje nun ce refunnesse ‘na custata..]po cu ddoje bbelli parate ô niajo (nel finale) primma ‘ncopp’a ‘nu tiro a bbotta sicura d’ Orsolini, rummanenno allerta nsi’ a ll’urdemo e ppo ‘ncopp’a ‘na cunchiusiona ‘e Palacio!

DI LORENZO 6,5 ‘Mpurraje (spinse) meno d’auti vvote, ma a ddritta “tte a cche ffà cu Bbarrow(ve) ca nun facette dànno.

MANOLAS [Chitelassa] 6,5 Taminno (prezioso)!Liggette bbuono ògne situazzione i ‘e capa ddicette ‘a soja ‘ncopp’ê ttimmurie (punizioni) i ‘e tire ‘e squina (corner).

KOULIBALY [‘o Ggialante ] 7 Matàlo (Perfetto) e ssempe prisente nchiusura o ascenno palla ô pere. Ll’ucummo (arbitro) lle cassaje pure ‘nu stuco bbuono!

HYSAJ [Mezacucchiara] 6,5 Oramaje a mmancina se trova a mmaraviglia e ppure ajere nun tenette prubleme cu Orsolini ca nunn’ ‘o zumpaje quase maje. ‘E cchiú ‘na raffadda (respinta) a cciammiello ‘ncopp’a ‘nu tiro ‘e Palacio!

RUIZ [Anemalonga] 6,5 Guvernaje a mmestiere e cqualità ll’armidanno (centrocampo) mettennoce cegna (ginta) corza e ccerevella.

BAKAYOKO [‘O Mammone] 7 N’aculla (diga) lla ‘mmiezo: se facette ‘nu mazzo tanto currenno pe cquatto e ccuntrastanno tutto e ttutte.

LOZANO 7,5 N’archedebba (Una furia),tutto ‘o Napule guardaje a isso ca currette a ccapa sotto, anze vulaje,facette vení ‘o male ‘e capa a Denswil(le) i ô 26’, cu ‘na palla a zzuco ‘e caramella mannaje ‘mporta a Ccaromecosta. Dicimmo grazzie a Ggattuso ca ll’à fatto turnà a essere isso! [Dô 75′ POLITANO 6 ‘e stima. Trasette pe ffà piglià sciato a Llozano ma nun se nutaje cchiú ‘e tanto!]

MERTENS [Ciruzzo] 6 Jette bbuono pe ccumme se muvette e ‘mpressione(in pressing),ma fallette ‘nu paro ‘e cunchiusione fora mesura. [Dô 75′ ZIELINSKI 6 Trasette diciso a ffarese nutà, ma êsse pututo fa ‘e cchiú ‘e quanto facette.Peccato!]

INSIGNE [Lorenzigno ] 6 ‘e stima pecché se mantenette fora dô juoco e llargo a mmancina, fove frenato da De Silvestri. Durante ô primmo ajone (tempo) sciupaje ‘na bbona accasiona. Facette quacche ccusarella a ll’arrancua (nella ripresa). Troppo poco! [Da ll 83′ ELMAS s.v.]

OSIMHEN [Caromecosta] 7 Faticaje p’’a scuatra i a ccampo apierto se facette nutà pe ccumme currette. Lladdaffa (rete) signata ô 26’ fove troppo facile p’uno cumme a isso, ma fove ‘na cosa scicca ‘o muvimento fatto pe mmetterese ô pizzo adatto a recogliere ‘a palla ‘e Lozano! [Da ll 83′ PETAGNA s.v.]

all. GATTUSO 7 Mettette ‘ncampo ‘na bbella scuatra tosta, cuncentrata, ‘e sustanza ca duminaje pe sittantacinche minute i arresecaje sulo ô niajo (nel finale).

Arb. Pasqua 4 E ll’aggiu trattato! Durante ô primmo ajone (tempo) ‘nu taccullo (intervento) overamente brutto e ccarogna se fósse mmeretato ‘o rrusso e nnun ‘o cacciaje. Pe ffurtuna vedette bbuono ca ‘nu taccullo (intervento) d’’o Ggialante dint’â muntaca (area di rigore) nosta fove pulito e ppriciso, ma chiammato dâ varra [ca lle cunzola ‘a zia moneca…] jette a vvedé cu ‘o prusutto ‘ncopp’a ll’uocchie e cquanno cassaje ‘o stuco (gol) d’’o Ggialante nun s’addunaje o nun se vulette addunà ca Caromecosta tuccaje sí cu ‘nu vraccio ‘a palla, ma pecché steva cadenno carriato ‘nterra da n’avverzario e lle fósse spettato ‘nu ricore a ffavore o p’’a sunna (regola) d’’o ventajo (vantaggio) ‘a cunferma d’’o stuco (gol) d’’o Ggialante. ‘Mmece êttemo ‘a fa curnute e mmazziate e ddoppo poco ll’ucummo ce mettette ‘a jonta nun cuncedennoce ‘nu ricore a ffavore pe ccarí (per fallo) ‘e De Silvestri ‘ncopp’ô stesso Kalidú.
E bbasta accussí. Gudimmoce ‘sti tre ppunte sustanziuse.

Ve saluto e si ‘o Cielo ‘o vvo’ ce sentimmo lunnerí vintitrè dopp’’o sibbacco (match) casalinco contr’â primma ‘ncrassifica.Facimmo corna e staveti bbe’!

ilnapolista © riproduzione riservata