Le pagelle in lingua di Napoli-Sassuolo: l’arbitro facette tutto’o duvere suĵo e ppure ‘e cchiú! Hysaj 7: e cchi se ll’êsse maje aspettato
Guagliù, ‘na vota tanto ‘a bbona sciorta ce facette ll’uocchie a zzennariello i ‘o Ciuccio ajeressera ô san Paolo se mettette tre ppunte dint’â sacca, mantenenno ‘e riffe o ‘e raffe ‘a porta acrata (inviolata) Cumminfatte ‘o Napoli vattette pe ddoje a zzero ‘o Sassuolo [una d’’e tre o quatto scuatre assineje (satelliti) d’’a vecchia zoccola] cu ‘a primma addaffa (rete) ‘nserie A ‘e Mezacucchiara 8’ e a ll’addaffa (rete) d’ammanna (di sicurezza) d’’o ‘ncrifato , arrivata sulo ô 94’’int’ê minute d’antijsso (recupero). Pe pparta lloro ll’emigliane se vedetteno annullà p’ attasallulo (fuorigioco) [sempe cunfermato dâ Varra] ‘a bbellezza ‘e quatt’addaffe (reti) ‘nfra primma e ssiconna parte d’’o sibbacco (match)[ddoje ‘e Djuricic(cio), una ‘e Caputo e una ‘e Berardi].’nzomma ‘na vota tanta nun ce putettemo allamentà né ‘e quacche seccia, né ‘e ll’ucummo (arbitro). Menu male!
Passammo ê ppaggelle:
OSPINA [Pastacrisciuta] 6,5 ‘Ncopp’ê stuche (gol) po annullate ô Sassuolo nun teneva itimme (colpe). Però po cu dduje granne tacculle (intervente) salvaje ‘a porta nosta e s’abbuscaje ‘a pagnotta!
DI LORENZO 6 E s’’o mmereta pecché cumme a ttutta ‘a trasera (difesa)fove bravo a rrummané ‘nlinia facenno scattà ‘o mastrillo ‘e ll’attasallulo (del fuorigioco); peccato ca a ll’epata ‘e defatta (di spinta) nun se vedette pe nniente.
MANOLAS [Chitelassa] 5,5 Me dispiace ma ll’aggi’’a mettere miezu zifo (voto) mancante pecché ‘nu paro ‘e vote nun liggette bbuono ‘a situazziona i arrancaje e asasa (soprattutto) smarrunaje periculosamente ascenno. Doppo n’ora venette meno e Ggattuso ll’êtt’’a sustituí [Dô 60’ MAKSIMOVIC [‘O’Ntontero] 5,5 Pure a isso miezu zifo (voto) mancante pecché pè overo ca ‘e capa se facette rispettà, ma pur’isso ascenno smarrunaje cchiú ‘e ‘na vota.
KOULIBALY [‘O Ggialante] 6 Quacche vvota, durante ô siconno ajone (tempo)sufferette ‘a zzureja (velocità) d’’e pasiglie (passaggi) ‘e primma d’’o Sassuolo. Però po fove isso a ccummannà ‘a linia d’’a trasera (difesa) ‘nterpretata a mmestiere.
HYSAJ [Mezacucchiara] 7 E cchi se ll’êsse maje aspettato ‘e puté scrivere ca ll’arbanese tutto summato fove ‘o meglio d’’e nuoste nun sulo pe ll’addaffa (rete) signata, ma pure p’’o mazzo tanto ca se facette pe ttutto ‘o tiempo d’’o sibbacco (match) mo annante, mo arreto. Doppo cientosittantanove presenze ‘nserie A truvaje ‘o stuco (gol) e arresecaje pure ‘e farene n’ato….
RUIZ [Anemalonga] 5,5 – Pure a isso miezu zifo (voto) mancante pecché nun fove lammajo (brillante) cumme ati vvote e ppe doje o tre vvote smarrunaje paricchio ascenno malamente e cunzignanno palla a ll’avverzario. [Da ll’80’ ALLAN [‘O ‘Ncrifato] 6,5 ‘O tiempo ‘e trasí, tampunà e ttruvà ll’addaffa (rete) ca nzerraje ‘a facenna.
Stanislav LOBOTKA 6 Nun facette cape d’angelo, ma se facette apprezzà pe ppricisione e ppe ccomme fove carimmo (generoso) nsi’ ô mustalà (termine).
ZIELINSKI 6,5 Tanti bboni gghiucate e ttanti bbone accasione prucurate ê cumpagne.Lle mancaje ‘o stuco (gol). Peccato! [dô 79’ ELMAS [‘O Turco] – sv].
CALLEJON [Peppe ‘a ‘nguenta] 5 Ll’attocca ‘nu zifo (voto) mancante pecché se vedette poco e cunchiurette ‘e meno; ‘nzomma ‘na serata no; oramaje pare ca s’è sfasteriato. [Dô 67’ POLITANO 6,5 Certamente meglio d’’o spagnuolo cu cquacche gghiucata ‘nteressante e ‘nu palo ch’êsse pututo nchiudere ‘a facenna assaje pe ttiempo!
MILIK [Sant’Arcadio] 5 Me dispiace ma ll’attocca ‘nu zifo (voto) mancante pecché fove ‘mpriciso allimmeno ‘nu paro ‘e vote asasa (soprattutto) ‘e capa poco primma d’ascí. [Dô 67’ MERTENS [Ciruzzo] 6,5 Trasette e cquase subbeto se jette a ppiglià ‘nu cartellino jalizzo (giallo) ca lle costa ‘o sibbacco (match) ‘e marterí ca vene contr’â Bbisciona; ‘e bbuono ‘o missiddo p’’o ‘Ncrifato p’’o doje a zzero.
INSIGNE 5 E ll’aggiu trattato! L’attocca ‘nu zifo (voto) mancante pecché sprecaje ddoje sapurite accasione chiammannose ‘e mmaleparole d’’a tribbuna-divano; p’’o riesto zampettaje cca e lla senza zuco né ccunnimma!
all. GATTUSO 6 ‘O Napule affuzzaje (vinse)mantenenno ‘a porta acrata (inviolata) ma nun putimmo parlà ‘e ‘na granna atalossa (prestazione) durata sí e nno mez’ora, po ‘o Ciuccio êtt’’a fa ‘e cunte cu ‘a zzureja (velocità d’’o Sassuolo ca cunfezziunaje tropp’accasione. Tutto summato forze ‘o natiggio (risultato) fove busciardo.
arb. AURELIANO 8 Justo e ccuraggiuso facette tutto’o duvere suĵo e ppure ‘e cchiú!
E bbasta accussí Mo si ‘O Cielo ‘o vvo’ ce sentimmo miercurí ca vene pe ccuntareve che facimmo marterí a nnotte contr’â Bbisciona e sperammo ca nun ce ne turnammo cu ‘na vranca ‘e mosce ‘nmmano! Staveti bbe’.
