Le pagelle in napoletano di Napoli-Milan, sse po’ affuzzà (vincere), se po’ abbuscà…, ma se po’ ppure russimà (pareggiare) e cchesto ca succedette ajere a nnotte ô san Paolo
NAPOLI- MILAN (12.7.20) 2 A 2 ‘A VEDETTE ACCUSSÍ
Eccuce cca guagliú! E i’ mo che ve pozzo dicere? Sulo ca nun sempe ‘o mese è dde trentuno e sse po’ affuzzà (vincere), se po’ abbuscà…, ma se po’ ppure russimà (pareggiare) e cchesto ca succedette ajere a nnotte ô san Paolo addó ‘o Ciuccio s’’a vedette cu ‘o Riavulo russo e nniro e sse mettette dint’â sacca sulo ‘nu gramo punticciullo addó se ne fósse pututo mettere tre e ssenza arrubbarese niente. ‘e fatte jetteno accussí:ô 20’ ‘a scuatra ‘e Pioli cu Hernqandez(zo) passaje ‘nventajo (in vantaggio)quase pe scagno ,ma ô 34’ Di Lorenzo se truvaje pronto e apprufittaje ‘e ‘na raffadda (respinta) sballata ‘e Donnarumma ‘ncopp’a ‘na timmurruja (punizione ‘e Lorenzigno russimanno (pareggiando); nun cuntente ‘o Ciuccio cercaje ll’arnassa (vittoria) e gghiusto ô 60’ Ciruzzo ce purtaje annante cumme ce stevemo mmeretanno e annante ssem’avur’’a rummanè si ô 72’ chillu figlio ‘e coperativa ‘e Bonaventura nunn’avesse apprufittato ‘e ‘na fessaria inutile d’’o ‘Ntontero ca ‘o sfresaje (sfiorò) appena, menannose ‘nterra cumme se mmuccaje dint’â muntaca (area di rigore) nosta. Chillu lappese scugnato ‘e La Penna chello steva aspettanno e nnun le parette overo ‘e siscarce ‘o ricore contro. Figurateve mo si cu Rocchi â Varra fósse cagnato coccosa. Cunfermaje ‘o ricore ca ô 28’ Kessié mettette dinto p’’o russimmo (pareggio) ca ‘ntribbuna-divano ce lassaje ll’amaro ‘mmcca. Chi falla pava e ajere a nnotte nce refunnette coccosa ‘o Ciuccio. Pacienza.
Passammo ê ppaggelle:
OSPINA[Pastacrisciuta] 6 Jucaje bbuono cu ‘e piere, ma nunn’êtte ‘a fà tacculle arzabbe (interventi difficili). Fove futtuto da Theo Hernandez(zo) primma e dda Kessié po, ma senza nisciuna itimma (responsabilità) soja.
DI LORENZO 6 Lassaje ‘nu bbuco addó se ‘mpezzaje Hernandez(zo) signanno ll’uno a zzero; menu male ca se facette perdunà truvanno ll’addaffa (rete) ‘e ll’uno a uno!
MAKSIMOVIC[‘O ‘Ntontero] 5,5 – ‘Nu passo arreto a ppietto ‘e ll’urdeme asciute: atalossa (prestazione) poco pusitiva: sciaurato (scoordinato) e inutile ‘o cuntrollo ‘ncuoll’ a Bbonaventura ca rijalaje ê lumbarde ‘o ricore d’’o russimmo (pareggio).
KOULIBALY[‘O Ggialante] 7 Nun cuncedette niente a cchi lle capitaje ‘e faccia e sse chiammaje ll’applavuso quanno palla ô pere ascette dâ muntaca (area di rigore) addó ggialantaje (giganteggiò), compenzanno quacche cauffía (incertezza) d’’o ‘Ntontero.
Mario RUI 6 – ‘Ncopp’â curzia mancina facette ‘o ssuĵo senza cauffíe (incertezze).
Fabian RUIZ[Anemalonga] 6 – Aspettajemo inutilmente ‘a granna jucata.Dètte quacche bbona palla, ma senza maje essere geniale. Peccato! [dô 66′ DEMME 6 Trasette facenno aculla (diga) cumme ll’êva ditto Gattuso].
LOBOTKA 6 – Cumannaje ll’armidanno (il centrocampo) pruteggenno e dànno palla ‘e primma cu asperte mimmadde (con veloci verticalizzazioni). [dô 66′ ELMAS[‘O Turco] 6 – Purtaje frischezza, ma nun cagnaje ‘o sibbacco (match)].
ZIELINSKI 6 – Però m’aspettavo ‘e cchiú. D’’e tre ‘e ll’armidanno (il centrocampo) fove ll’unico a rummané ‘ncampo nsi’ ô mustalà (al termine), però fove ‘o meno lammajo (brillante).
CALLEJON[Peppe ‘a ‘nguenta] 6 – Currette pe cquatto,però aizanno porvera asasa (soprattutto) dint’ô primmo ajone (nel primo tempo) quanno pe ttre vvote ,nunn’arrivaje a ll’appuntamento cu ‘a palla o nunn’azzeccaje ‘o tiro bbuono. ‘Nchietta cu Di Lorenzo se perdette a Hernandez(zo) lassannolo libbero ‘e fottere a Ppastacrisciuta.Meglio cu ‘o missiddo (assist) pe Cciruzzo [da ll’84’ POLITANO s.v.]
MERTENS[Ciruzzo] 6,5 – ‘Nu castico ‘e Ddio. Sfresaje (sfiorò)súbbeto ll’addaffa (rete), ma Donnarumma salvaje cu ‘nu miezu miraculo. Sempe atturniatore (insidioso),dalle e ddalle ll’addaffa (rete) ‘a truvaje justo ‘ncapo ‘e n’ora. [dô74′ MILIK[Sant’Arcadio] 5,5 Me chiagne ‘o core ma ll’attocca miezu zifo (voto) mancante pecché facette quacche prano artachío (errore tecnico) e tiraje ‘ncopp’â loggia d’’o palazzo ‘e rimpetto ‘na timmurria (punizione)da bbona pusizziona. Nient’ato… Troppo poco!]
INSIGNE[Lorenzigno] 6,5 – Cchiú duranteô primmo ajone (tempo) ca a ll’arrancua (nella ripresa) fove prisente dint’ê mmunavare (manovre) uffenzive d’’e nuoste.Cumme v’aggiu ditto da ‘na timmurria (punizione)malegna soja nascette ll’addaffa ‘e Si Lorenzo pe ll’uno a uno. [dô 74′ LOZANO 5,5 – Nun cumbinaje quase niente.]
all. GATTUSO 6 – Pruvaje ccagnà ‘e ccarte ‘ntavula ma cchiú ‘e ‘nu russimmo (pareggio) nun ne cacciaje.Però ‘a scuatra soja duminaje ‘ncampo e êsse pututo pure affuzzà (vincere) senza arrubbà niente.
arb. LA PENNA [i ‘a chenca soja] 5 Nun ce piacette: durante ô primmo ajone nutizziaje sulo ‘e nuoste e llassaje ca ‘e russe e nnire facesseno ‘e commete lloro senza maje tirarle ‘e rrecchie. ‘Ncopp’ô ricore nun se vulette accorgere ca Bbonaventura êva fatto ‘na sceneggiata; cu ‘a Roma a 54 i ‘o Napule a 51, nun se manna ‘nu rumano a ucummà (arbitrare)’o sibbacco (match) d’’o Napule!
E ffermammoce cca. Mo si ‘O Cielo ‘o vvo’ ce sentimmo ggioverí ca vene pe ccuntareve che facimmo miercurí a Bulogna contr’ê murtadelle; nun voglio fareme diebbete cu ‘a vocca, ma penzo ca ce putimmo piglià pure ‘e tre ppunte. Accussí sperammo. Staveti bbe’.
