Le pagelle in napoletano di Napoli-Perugia, 5,5 a Lozano nun è ancòra isso; 4 a Llorente, inutile: ‘a fora ‘e ‘nu paro ‘e sponne nun facette ato
Le pagelle di Napoli-Perugia 2-0
D’accordo guagliú, ‘a mubbara (partita) d’ajere ô san Paolo contr’ô Peruggia nun fove bbella e nnun ce piacette a nnujaute ‘ntribbuna-divano, ma allimmeno s’affuzzaje (si vinse) mísemo (addirittura) mantenenno ‘a porta acrata (inviolata) e ttanto avastaje pe ffarece capí ca forze e ssenza forze ‘a Coppa Itaglia putesse essere ‘o muncuddo (salvagente) ‘e ‘sta caracuddamma (stagione) nsi’ a mmo scarza ‘e zuco! ‘E fatte jetteno accussí: doppo ‘nu primmo ajone ca ‘e cuane (azzurri) facetteno coccosa e nchiudetteno ‘ncopp’ô doje a zzero cu dduje ricure [26’ e 38’] sacrusante ca Lorenzigno mettette dinto, a ll’arrancua (ripresa), ‘e nuoste fenetteno ‘e jucà lassanno campo a ll’avverzarie ca però foveno periculuse sulo ‘na vota cu ‘nu ricore ca però Pastacrisciuta paraje.E a ‘stu punto nce aspetta ‘e fà capa e ccapa cu ‘a Lazzio ca à scummato ‘e sanco ‘a Cremonese. Vedimmo si riuscimmo a ppigliarece ll’anticamma (rivincita) d’’o rijalo fatto ‘ncampiunato.
P’’o mumento passammo ê ppaggelle:
OSPINA[Pastacrisciuta] 7 Urdinaria idarra (amministrazione) pe tutto ‘o sibbacco (match) ‘a fora d’’o ricore ca però isso paraje a Iemmello levannose ‘e pacchere ‘a faccia doppo d’’a fessaria fatta a ll’Ulimpico contr’â Lazzio.
HYSAJ[Meza Cucchiara ] 6 Sfurtunato ‘nnaccasiona d’’o ricore cuncesso ô Grifo, ma p’’o riesto attiento e mmundebetto (disciplinato) pe stuppà ‘e ggherre (incursioni) ‘e Iemmello e Bbuonaiuto.
MANOLAS[Chitelassa] 6,5 – Duminaje ‘a muntaca (area di rigore)nosta contro a n’accunto scamuso cumme ‘a chietta Falcinelli-Iemmello.Jette pure annante e quase subbeto sfresaje n’addaffa curincanno (incornando) periculosamente.
DI LORENZO 6 Miso a ffà ‘o centrale nun smarrunaje e ffacette ‘na bbona fijura.
MARIO RUI 6 Bbona atalossa (prestazione) muntanno ‘a guardia arreto e ddaffanno (spingendo) annante pe ddà ‘na mana a Llorenzigno, peccato ca nun ‘ncarraje ‘nu jabbro (cross) manco pe scagno! Però, tutto summato, meglio d’’a vota passata.
ELMAS[‘O Turco] 6 Bbona atalossa(prestazione) p’’o ggiuvinotto ca se sacrificaje e ccurette assaje; po’ ccrescere cu quacche minuto ‘e cchiú dint’ê ccosce.
RUIZ[Anema Longa] 5,5 Nun lle pozzo dà ‘o seje pecché ajere arcafiffaje (bivaccò) a mmità campo senza chizza (infamia) e ssenza madda (lode). [dô 65′ DEMME 6 l’aspettavemo e isso marratannaje (debuttò) senza fà cape d’angelo, ma prerecanno, cu ppasiglie (passaggi) pricise e sistimate, aràdua (calma) e ppalla ‘nterra.]
ZIELINSKI 6,5 – Courrette pe dduje e truvaje pure ‘a porta; peccato ca fósse partuto cu ‘nu pere ‘nnattasallulo (in fuorigioco) e ll’ucummo (arbitro) ll’annullaje ‘o tre a zzero. [da ll’84’ ALLAN s.v.]
LOZANO 5,5 ‘O messicano nun è ancòra isso; ajere nun dette tutto chello ca ce fóssemo aspettate, però s’abbuscaje ‘o ricore ‘e ll’uno a zzero. Meglio ‘e niente.[dô 75′ CALLEJON[Peppe ‘a ‘nguenta] 6 Nun fove itimma (colpa) soja si ‘o Napule, a ll’arrancua tiraje ‘e rimme ‘int’â varca. Nurmale ca pur’isso facesse poco e nun se dannasse ll’anema.]
LLORENTE [‘O Spetaccuso] 4 Inutile: ‘a fora ‘e ‘nu paro ‘e sponne nun facette ato, né – mammuoccelu cumm’è – se facette nutà dint’â muntaca (area di rigore). Troppo poco pe ppiglià ‘o posto ‘e uno cumme a ssant’Arcadio!
INSIGNE[Lorenzigno] 7 ‘Ntribbuna-divano ce piacette asasa (soprattutto) ‘o muaffio (atteggiamento) suĵo ca lle cunzentette ‘e correre pe nnuvanta minute jennose a ppiglià palla nsi’ dê pparte ‘e Pastacrisciuta; nun signava da ll’uttombre passato, ma ajere se facette perdunà cu chella pareglia (doppietta) da ll’armanno(dischetto)mísemo(addirittura) cagnanno squina (angolo) ‘ncopp’ô siconno!
all. GATTUSO 6,5 E nun sto’ esaggeranno; ajere ô san Paolo se vedetteno, durante ô primmo ajone (primo tempo) mumente ‘e qualità; mo però à dda fà capí ê suoje ca ‘a ggente pava pe nnuvanta minute ‘e juoco e lloro ànn’’a jucà pe nnuvanta minute, senza fà ‘o cunto d’’a lavannara e asasa (soprattutto) fósse ora ‘e migliurà ‘ncampiunato. Chesto mo ce aspettammo ca succere.
arb.: MASSIMI 6 Troppo guaglione, ma facette quase tutto ‘o duvere suĵo.
E ccu cchesto fermammoce cca, cuntente no, ma allimmeno surisfatte d’avé affuzzato (vinto) e ssi ‘o Cielo ‘o vvo’ ce sentimmo dummeneca ca vene pe ccuntarve chello ca sapato a ssera succere ô san Paolo contr’â viola. E sperammo ‘e pigliarece ‘e tre ppunte!
Staveti bbe’!
