È gghiuta accussí e ppacienza; sperammo ca a ffevraro s’avutasse ‘o Vangelo e ‘ncampiunato ccagnasse coccosa; p’’o mumento marterí ca vene torna ‘a coppa Itaglia
LAZIO-NAPOLI 1-0 ‘A VEDETTE ACCUSSÍ
Mannaggia ô demmonio scartellato guagliú. Cumme si nun ce vulesse credere e ‘mmece ce agg’’a credere giacché nujaute ‘ntribbuna-divano ‘o vvedettemo cu ll’uocchie ajeressera mmerz’ê ssette e mmeza chello ca succedette a ll’Ulimpico ‘e Roma addó ‘o Napule, nun cuntento ‘e chello fatto â Pifania ô san Paolo cu ‘a Bbisciona quamnno lle rijalaje tre ppunte facenno tre pputtanate una pejo ‘e ll’ata, ajere cuncedette ‘o mecra (il bis) e ddoppo ‘nu primmo ajone’mpratteca mutauazzínneco (equilibrato) e n’arrancua (ripresa) addó tutto summato, pe cquaranta minute jucaje meglio ‘e ll’avverzarie e si avesse affuzzato (vinto) nunn’êsse arrubbato niente a nnisciuno, ecco ca arrivate a ll’uttantesimo ‘o Ciuccio perdette ‘e senze e pprimma cu Meza Cucchiara e ppo, piezzo e ppejo cu Ppastacrisciuta, cunfezziunaje ‘o rialo p’ Immobile ca n’apprufittaje, signaje e ce ‘o mettette a ppitoffio! I allora putite capí pecché da ajeressera nujaute ‘e tutt’’a ‘a tribbuna-divano stammo chiammanno ancòra tutt’’e trapassate ‘e chillu sanco sperzo d’ ‘o parzunaro ca chiantaje ll’arbero ‘a do’ fove cuoveto ‘o limone ca servette a scerià ‘e mmeglie maniglie ‘attone d’ ‘o tauto’e lignammo fetente e nfracetato addó stanno astipate ‘e mmeglie osse cariulate d’ ‘e meglie muorte d’ ‘e muorte ‘e chi ll’è mmuorto ‘e Ppastacrisciuta i ‘e Mmezacucchiara e ttenimmo ‘o bbeleno ‘mpont’ô musso giacché nun ce rassignammo a vvedé ca nunn’è overo ca cca nisciuno è ffesso; nunn’è overo! Ce stanno ‘e fesse, ce stanno e sso’ ‘e jucature d’’o Napule ca rijalanno rijalanno oramaje a ffenetura ‘e javallo d’addabba (girone d’andata) ‘e campiunato è sciso ô nono posto ‘ncrassifica e mmo tu qua’ sesto posto? Mo s’ à dda guardarese ‘e spalle e s’à dda stà accorto. Maje c’êssemo aspettate ‘e stà a ‘stu punto, ma ‘e ccose assaffa (purtroppo) accussí stanno. Pacienza e ppassammo ê ppaggelle:
OSPINA[Pastacrisciuta] 4 Me dispiace, ma ‘a fessaria fatta a ll’80’nun ce ‘a pozzo perdunà. D’accordo, Mezacucchiara t’’a passato ‘na palla ca nun t’êva ‘a passà, ma tu tenive tutt’’o tiempo ‘e menarla ‘nnante o ‘ntribbuna o ‘ncurva e ‘mmece te ‘ntallie e ddaje aggio a Immobile ‘e venirte a rrompere ‘a cora ‘e ‘nanze, levarte ‘a palla e mmenarla ‘mporta arasa (sguarnita). Accussí ce faje scurdà chillu paro ‘e bbuoni tacculle (interventi) ca faciste ô primmo ajone… agge pacienza!
HYSAJ [Mezacucchiara] 5,5 Pur’isso cu cchella palla passata areto a ll’80’mettenno ‘ntribbule e ttempesta a Ppastacriscuta sciupaje ‘o bbuono fatto durante ô riesto d’’o sibbacco (match). Peccato.
DI LORENZO 5 Ce mettette ‘a soja ‘ncopp’a ll’addaffa (rete ‘e Immobile arrivanno ‘e corza senza artinzicca (coordinazione) e ’mmece ‘e cogliere palla ‘e dinto pere ‘a pigliaje a bbienetenne i ‘a menaje dinto ajutannoce p’’a scesa. Doppo chello d’’a Pifania n’auta granna fessaria! E cche saciccio!
MANOLAS[Chitelassa] 6,5 Bbona atalossa (prestazione), meglio ‘e chella contr’â Bbisciona.L’êsse miso pure ‘e cchiú si fosse curruto a ll’80’ a ddà ‘na mana a Ppastacrisciuta.
MARIO RUI 6 Quanno putette se facette vedé annante a ddà ‘na mana ê cumpagne e pp’’o riesto arreto facette ‘o duvere suĵo.
ALLAN[‘O’Ncrifato] 6,5 Fove isso ca jucanno cu ‘o sanco a ll’uocchie cumpattaje ll’armidanno(centrocampo) d’’o Napule.[Da ll’84’ LLORENTE s.v.]
RUIZ[Anema Longa] 5 Custretto a gghiucà addó nunn’è ‘o pizzo suĵo s’arrangiaje, ma maje ca avesse ‘ncarrato n’istiglia (verticalizzazione), cuntinuanno a nun piacé, sperammo ca arrivanno Demme e Lobotka, Gattuso ‘o facesse turnà a ffà chello ca sape e ppo’ ffà; accussí è sciupato.
ZIELINSKI 6 Pe pparicchiu tiempo nunn’’o vedettemo, po ‘ntrasatta se scetaje e ccercaje ‘a porta cu ‘nu bbellu tiro a ggiro ca però pe scalogna, ‘mmece ‘e trasí centraje ‘o palo.E ffatte bbenericere!
CALLEJON[Peppe ‘a ‘nguenta] 4,5 Me dispiace, ma tanto ll’aggi’a mettere giacché ajere fove ‘o peggio massío (attaccante) d’’e nuoste. È stracquo. Che s’aspetta a ppruvà quacche ato ‘int’a cchella pusizziona? [Da ll’88’ ELMAS s.v.]
MILIK[Sant’Arcadio] 5,5 Cercaje ‘e fà coccosa, ma fove lassato troppo sulo e nun fove maje servuto ‘e palla dê cumpagne. Avesse, però, pututo metterCe cchiú ccegna (grinta) e azzaja (cattiveria). Perdunammolo.
INSIGNE[Lorenzigno ] 6,5 Se facette vedé ‘nfra ê llinie e spaventaje ‘a trasera (difesa) d’’e lucale cquanno trasette dint’â muntaca (area di rigore) lazziale; fove isso ca dette palla a Zielinski nn’accasione d’’o palo,n’ata vota cercaje ‘a porta, ma Strakosha, luongo cumm’è, paraje ‘o tentativo d’’o frattese.
all. GATTUSO 6 Nun fove itimma (colpa) soja si ‘e cuane (azzurri) nun tenetteno sciorta ePpastacrisciuta, mannato ‘ncampo pecché bravo cu ‘e piere, proprio cu ‘e piere smarrunaje rijalanno ‘a (vittoria) ê lazziale.
arb. ORSATO 5 Fove poco attiento cchiú ‘e ‘na vota i asasa (soprattutto) a ll’82’ nun s’addunaje d’’o sbuttulone ca, pe llevarele ‘a palla, Immobile dètte a Ppastacrisciuta.
È gghiuta accussí e ppacienza; sperammo ca a ffevraro s’avutasse ‘o Vangelo e ‘ncampiunato ccagnasse coccosa; p’’o mumento marterí ca vene torna ‘a coppa Itaglia i ô san Paolo a ll’ora d’’a tiella scenne ‘o Perugia; penzo ca ‘o putimmo vattere e si ‘o Cielo ‘o vvo’ ve ne parlo miercurí. Staveti bbe’. R.Bracale Brak
