Ancelotti ajere ce facette ved’é ‘nu Napule brutto, bbatiejo (lento), ca se facette sgamà ‘ncapace ‘e luttà ‘e metterce cegna
‘A VEDETTE ACCUSSí
Bbasta, guagliú, bbasta! Nun se ne po’ cchiú; me cadeno ‘e bbraccia ‘a cuollo; ajeressera a Udine contr’ê chianchiere lucale ‘o Napule fove a ll’urdema fermata soja pe ppiglià ‘nu treno bbuono pe ttentà ‘e ricuperà quacche pposto ‘ncrassifica i ‘o perdette; nujaute ‘ntribbuna-divano ce fóssemo aspettate ‘e vedé ‘nu Napule cuncreto, cuncentrato e asasa (soprattutto) diciso a sse piglià tre ppunte finalmente affuzzanno (vincendo) e ‘mmece assummajemo n’atu russimmo (pareggio) scartellato e… ppoco mancaje ca nunn’abbuscassemo, doppo ‘nu sibbacco (match) ca pe nnuje fove ‘na vera fetecchia cu ‘nu Napule ca abbiaje a ffà coccosa sulo doppo n’ora ‘e juoco, ‘nu Napule ca sulo ô 42’ ce facette vedé ‘nu tiro ‘mporta… tiro mo! ‘Na vreccia ca Peppe ‘a ‘nguenta menaje a bbienetenne e ca ‘mmece ‘e trasí ‘mporta jette a rrompere ‘e llaste ‘e ‘na fenesta nun saccio addó… Vuje capite che ‘nzalata? Nsi’ ô 60’ vedettemo ‘na scuatra piatosa cu gghiucature curche(preoccupati), ca nun sapeveno che ffà, senza cegna, (grinta) senza forza e ‘mpratteca caibbe (assenti) e ccumme v’aggiu ditto sulo dô 61’ ‘o Napule abbiaje a ffà ‘o Napule e mmísemo (addirittura) arresecaje d’affuzzà (vincere), ma ‘a palla bbona,sott’ô niajo (finale) capitaje ‘ncapa a cchillu mammuoccelo d’’o Spetaccuso [trasuto ô 46’ ô pizzo ‘e Lorenzigno ca pe ttutto ‘o primmo ajone (tempo) nunn’êva fatto ‘nu saciccio…] ca ‘mmece ‘e fravecarla ‘mporta ‘a cunzignaje làpeta làpeta ‘mmano ô purtiere Musso ca lle pavaje ‘o ccafé mentre nujaute ‘ntribbuna-divano lle chiammavamo ‘e muorte saglienno e scennenno; e accussí fenette uno a uno, acqua ca nun leva sete!
Lassammo perdere e ffacimmo ‘e ppaggelle:
MERET[‘O Lungagnone] 6 Êtt’’a spurcarese ‘e guante a ll’arrancua (ripresa) pe ppiglià ‘na commeta palla auta, ma nun putette fà niente ‘ncopp’â addaffa (rete) ‘e Lasagna ‘mprima jazza (frazione).
DI LORENZO 6,5 Bbona atalossa (prestazione ‘e ll’udí (terzino) ‘e dritta ca criscenno assaje asasa (soprattutto) a ll’arrancua (ripresa) rappresentaje una d’’e ppoche cose pusitive d’’o Napule visto ajeressera.
MANOLAS[Chitelassa] 6 Facette ‘o ssuĵo senza nisciunu sfregazzo (sbavatura).
KOULIBALY[‘O Ggialante] 5 Peccato, ll’aggi’’a levà ‘nu zifo (voto) pecché lle scappaje a Llasagna ‘nnaccasione ‘e ll’addaffa (rete) d’’e lucale… però Mario Rui nun le détte ‘a mana ca ll’êsse avut’’a dà.
MARIO RUI 5 Daffaje (spinse) assaje, ma maje cu pricisione e asasa (soprattutto) nun strignette ‘ncuollo a Llasagna ô 32’.
RUIZ[Anema Longa] 5,5 Nun fove ‘nserata e sse vedette!
CALLEJON[Peppe ‘a ‘nguenta] 5 Pure isso aizaje porvera.
ZIELINSKI 6,5 Ll’unico a ffarese aprezzà asasa soprattutto a ll’arrancua (nella ripresa) quanno se mettette ‘a scuatra ‘ncopp’ê spalle cercanno e ddànno, cu ppricisione palla e ttruvaje pure ll’addaffa (rete) ca ce salvaje da ll’uzzimma (sconfitta).
INSIGNE[Lorenzigno] 4,5 Fove ‘o peggio d’’o mazzo i ajeressera se fósse mmeretato d’essere caucuiato; fove isso ca, nun cunchiudenno ‘nu saciccio pe ttutto ‘o primmo ajone, ce facette ‘ncacchià malamente.Caritío (disastroso). [dô 46’ LLORENTE[‘O Spetaccuso] 5 Trasette pe spaventà ‘a trasera (difesa) d’’e lucale e mammuoccelo cumm’è ‘o ffacette, ma – avuta ‘a palla bbona – ‘a sciupaje, ca ‘o pozzano struppià, senza pavarne!]
LOZANO 5 Ardaccanno (fumoso):pe mmoverese, se muvette aassaje sí, ma senza custrutto, senza zuco nè ccunnimma.[62’ YOUNES[‘O Mmeracato] 6 Meglio d’’o messicano cercaje d’essere periculuso.]
MERTENS[Ciruzzo] 5,5 Me dispiace ma purtroppo tanto se mmereta pecché cumplessivamente facette overo poco e dde pusitivo ce fove sulo ca cullabburaje a ll’azzione ‘e ll’addaffa (rete) nosta jenno a llatrà ‘ncuollo a Mmandragora. Troppo poco!
All.: ANCELOTTI[‘O Jancone] 5 Fort’è si se magna ‘e struffole! Ajere ce facette ved’é ‘nu Napule brutto, bbatiejo (lento), ca se facette sgamà ‘ncapace ‘e luttà ‘e metterce cegna (grinta) forza e azzaja (rabbia) cumme fósse stato nicessario; sí a ccunte fatte ‘o Napule riuscette pure a rrussimà (pareggiare), ma lassaje ‘a ‘mpressiona ‘e ‘na scuatra ‘ngranna difficoltà e arabbacca (confusione), ‘na scuatra ca nunn’affuzza (vince) da sette jurnate… n’ arcalludda (eternità) Doppo 45 minute overe brutte capette ca êv’’a cagnà coccosa facenno trasí apprimma ‘o Spetaccuso e ppo ‘o Mmeracato e ffove allora ca ‘o Napule truvaje cchiú spazzio e ffacette coccosa, ma nun riuscette a ppigliarese ‘e tre ppunte. Pacienza.
arb. MARIANI 5 Grossi ffetenzie nun ce ne facette ma fove ‘e maneca larga cu ‘e lucale e nne nutizziaje (ammoní) paricchie d’’e nuoste e mmísemo (addirittura) ne cacciaje cu ‘o rrusso dâ panca , ô 79′ a Mmaksimovic(cio),nun se capette pecché.
E bbasta accussí; Êssemo pututo abbuscà, cuntentammoce d’’o russimmo (pareggio) e mmo penzammo â Ciampionsa; marterí ô san Paolo vene ‘o Ggenco. Ce abbastasse ‘e russimà (pareggiare) pe passà a ll’ artamannaje (ottavi) e rrispirà ‘nu poc, ma i’ voglio sperà ca allimmeno ‘nCiampionsa ‘o Napule fa ‘o Napule i è ccapace d’affuzzà (vincere) Si ‘o Cielo vo’ ve conto chello ca succede miercurí. Staveti bbe’ R.Bracale Brak
