E fermammoce cca dannoce appuntamento si ‘o Cielo ‘o vvo’ a mmiercurí ca vene doppo d’’o sibbacco (match) ‘e marterí ô san Paolo cu ‘o Salisburgo. Facimmo corne
‘A VEDETTE ACCUSSÍ
E cche ne parlammo a ffà guagliù?! ‘Sta caracuddamma (stagione) è nnata storta e ‘ncampiunato ce à cacato ‘o cane niro; cumminfatte ajere all’ora d’’a tiella jettemo a Rroma contr’ê pecurare lucale e tturnajemo cu ‘na vranca ‘e mosche ‘mmano visto ca abbuscajemo pe ddoje a uno addó ca,forze, allimmeno ‘nu punticciullo ce ‘o putevemo piglià, pure si nun fósse servuto a ‘nu saciccio . Però oramaje s’è ccapito ca ‘o Palazzo ce vo’ spezzà ‘e passe e ce avimm’’a fà dint’ô prozo. E cchesto succedette ajere quanno ll’ucummo (arbitro) ‘ncopp’a ll’uno a zzero p’’a Roma ce siscaje contro ‘nu ricore ca ce steva e nnun ce steva e vvisto ca ‘o Lungagnone ‘o paraje a ll’arrancua ce ne siscaje n’ato ca trasette e ffove chillo d’’o doje a zzero. E pp’abbiajà a vvedé ‘nu poco ‘e bbene êttem’aspettà ‘o 72’ quanno ‘o solito sant’Arcadio se facette truvà ô posto justo i ô mumento justo pe mmettere dinto ‘nu jabbro (cross) ca Lozano [trasuto ô 58’ ô posto ‘e Peppe ‘a ‘nguenta]êva miso ‘mmiezo. Però cchiú ‘e chello nun se riuscette a ffà e abbuscajemo p’’a collera d’’a tribbuna-divano e pp’’o piacere d’’e tanti cestarielle ca ce menano ‘a seccia d’’a paricchio e sciuliajemo ‘ncrassifica ô settimo posto e a ‘stu punto âmm’’a dicere ca so’ appena dduje punte chessebbate(guadagnati) dô Napoli dinto a ll’urdemi ttre mubbare (partite) ‘ncampiunato, cu ccumplessive 18 punte e ssulo ‘o settimo posto ‘ncrassifica doppo unnece jurnate: ‘nu schifo overo! Maje ‘o Napule è gghiuto accussí malamente ‘int’a ll’urdemi nove anne; sulo ô 2009/10 doppo unnece jurnate ‘e cuane (azzurri) assummajeno diciassette punte mentre ô 2011/12 sempe diciotto foveno ‘e punte chessebbate (guadagnate) ma ‘o primmo ‘ncrassiffica ne teneva vintitré addó ca mo ‘a primma ne tène vintinove! Vuje capite che fetenzia? E si nun se chiammasse Ancellotti penzo ca ògne ato mutarribbo (allenatore) ne fósse stato cacciato, tanto settimo pe settimo nun c’è nnicissità ‘e uno tanto titulato cumme ô Jancone, va bbuono ‘o primmo scafesso ca se trova passanno! Lassammo perdere ‘sti malincunie e ppassammo ê ppaggelle dicenno ‘mprimmose ca ajere tutto ‘o Napule jucaje senza cazzimma, senza cegna (grinta) e ssenza asciarra (cattiveria) quase rassignato a ttiffiddà (perdere). Purtroppo a cchesto stammo!
MERET[‘O Lungagnone] 7,5 Mútero (Sensazionale). Paraje ’nu ricore a Kcolarof(fo) cu ‘nu taccullo (intervento) muzzallo (prodigioso),po arresecaje pure ‘e fermà chillo, troppo viulento tirato da Veretú. ‘E cchiú se superaje paranno ‘na cagliosa ‘e Kolarof(fo) durante ô primmo ajone (nel primo tempo) e ffacette ‘nu miezu miraculo ‘ncopp’a ‘na raissa (incornata) ‘e Pastore da duje passe e ppe llevarle ‘o sfizzio ll’ucummo (arbitro) siscaje ll’attasallulo (fuorigioco) d’’o pecuraro.
DI LORENZO 6 Jucaje ‘na bbona mubbara (partita) senza smarrunà e ssenza jí dint’ê chiavette; peccato ca Smalling(o)’o privaje d’’a fariscia (gioia) ‘e signà salvanno ‘ncopp’â linia ‘e porta ‘na raissa (incornata) a bbotta certa. Che peccato.
MANOLAS [Chitelassa] 5,5 Miezu zifo (voto)mancante pecché nun ghiucaje cu ll’ammanna (sicurezza) solita, quase disturbbato dê sische ‘e ll’ecchese muidde (tifosi); puteva fà coccosa ‘e cchiú ‘nnaccasiona ‘e ll’addaffa (rete) ‘e Zaniolo [lassato libbero ‘e tirà da ‘e matusteje (mediani)] e nnun ‘o ffacette.
KOULIBALY 6 Nun facette fessarie nè grosse, nè ppiccerelle, ma nun me parette ancòra isso. Sperammo ca me sbaglio.
MARIO RUI 4 Me dispiace ma ‘e cchiú nun pozzo mmetterle; fove mumallo (disattento) e ccartío (disastroso): se facette ‘nfilà da Spinazzola ‘nnaccasione ‘e ll’uno a zzero,e ffacette ‘na puttanata trasenno cu ‘o vraccio largo ‘int’â muntaca (area di rigore) soja e aumentaje ‘a ddosa d’’e ffessarie perdenno pallune e ccuntraste cuntinuamente.
CALLEJON [Peppe ‘a ‘nguenta] 5 Me dispiace, ll’attocca ‘nu zifo (voto)mancante pecché ajere nun se facette vedé annante e avesse avut’’a cuntrullà meglio ‘o muvimento d’’o cuorpo dint’â muntaca (area di rigore) soja. Ascette quanno tutt’era perzo e nnun ce steva niente ‘a difennere. [dô 58′ LOZANO 6 – Finalmente ce facette vedé ‘na cosa bbona, trasenno súbbeto ‘nsibacco (nel match) e mmettenno adracca (concretezza) lla ‘nnante cu cchillu jabbro (cross) pe sant’Arcadio.]
ZIELINSKI 5,5 Miezu zifo (voto) mancante pecché lassaje libbero ‘e tirà a Zzaniolo ô lemmeto d’’a muntaca nosta; peccato pecché p’’o riesto durante ô primmo ajone (primo tempo) duminaje ‘mmiez’ô campo e ccugliette cu ‘na cagliosa da fora ‘nu palo retissante (clamoroso). A ll’arranca (ripresa) cuntinuaje a lluttà ma êsse avut’’a essere cchiú ccuncreto.
RUIZ [Anema Longa] 5 Me dispiace ma ll’attocca ‘nu zifo (voto) mancante pecché ajere me deludette: nun tenette ficre (idee) e gghiucaje senza cazzimma, senza cegna (grinta) e ssenza asciarra (cattiveria) risultanno troppo liggiero ‘mmiez’ô campo addó cumbinaje overo troppo poco e ssulo ‘na grama vota tiraje ‘mporta dô lemmeto.
INSIGNE [Lorenzigno] 5,5 Pure a isso miezu zifo (voto) mancante pecché ajere facette poco: nun cupuliaje (dialogò) cu ‘e suoje e ccercaje ‘a porta sulo ‘nu paro ‘e vote, sbaglianno ‘o primmo tiro e ffacennose fermà chill’ ato [troppo bbatiejo (lento)]. [da ll’83’ YOUNES[‘O Mmerecato] s.v. ‘Ncampo pe ppochi minute nun putette fà niente.]
MILIK [Sant’Arcadio] 6,5 Tutto summato fove isso ‘o cchiú ‘nsciacalla (in forma): sempe pronto se dètte da fà ‘nterpretanno a mmestiere ‘o sibbacco (match) e ffove isso ca cumme v’aggiu ditto mettette a ffrutto ‘o jabbro (cross) ‘e Klozano. Sfurtunato durante ô primmo ajone (primo tempo) cugliette ‘e capa ll’afachia (traversa). Peccato!
MERTENS[Ciruzzo] 5 Me dispiace ma ll’attocca pure a isso ‘nu zifo (voto) mancante pecché ajere deludette sbaglianno durante ô primmo ajone ‘na bbona accasiona i a ll’arrancua (nella ripresa) chi sa pecché s’annascunnette e sparette. [dô 65′ LLORENTE[‘O Spetaccuso] 5 Nunn’ è ca facette ‘e cchiú ‘e Ciruzzo e ggiraje a vvacante.
all.: ANCELOTTI 5 Cumpletamente sballata ‘a lettura d’’a mubbara (partita) e ll’arnajo (approccio) ô sibbacco (match); cu chesta terza mazziata ‘ncampiunato dimustraje ca ‘o Napule nun ce steva, nè ce fósse pututo stà!
arb. Rocchi 5 Dicimmo ca fove mannato pe spezzarce ‘e passe e ffacette ‘o duvere suĵo ajutannoce p’’a scesa.
E fermammoce cca dannoce appuntamento si ‘o Cielo ‘o vvo’ a mmiercurí ca vene doppo d’’o sibbacco (match) ‘e marterí ô san Paolo cu ‘o Salisburgo. Facimmo corne.
Staveti bbe’