ilNapolista

Callejon ucaje ‘na mubbara (partita) scadente; nun ce stette cu ‘a capa e sbagliaje

Koulibaly 6,5  Zaimmo (Leader) d’’a trasera (difesa), fove sempe azzimmo (risoluto) e zzacrío (roccioso)e ‘nu paro ‘e vote nzerraje ‘a strata   a Piatekco

Callejon ucaje ‘na mubbara (partita) scadente; nun ce stette cu ‘a capa e sbagliaje

‘A VEDETTE ACCUSSÍ

Niente ‘a fà, guagliú, me dispiace ma nunn’’o ppozzo annasconnere: ‘o Ciuccio nun po’ cchiù affuzzà (vincere) o – forze – nun sape farelo e cchesto succedette pure ajere a Mmilano addó ‘o Napule s’’a jette a vvedé contr’ê diavule lucale e ss’êtt’ ‘a cuntentà ‘e ‘nu scamuso russimmo (pareggio) p’uno a uno addó ca nujeaute ‘ntribbuna divano ce fóssemo aspettate ‘e vedé ‘na scuatra scennere ‘ncampo cu ‘nu quàteno (scopo) sulo, chillo ‘e calassarse (riscattarsi) doppo d’’e tante russimme (pareggi) ‘ncampiunato… ‘mmece chi t’’o ddà?! Vedettemo ‘na scuatra ‘e rasoterra ca stracqua ‘e capa ‘ncacaglià pe ‘na ventina ‘e minute lassanno campo a ll’avverzario [ca però, pe ffurtuna, nun fove periculuso] e finalmente sulo  ô 24’ Lozano mettette ‘nchiaro ca ce stevemo pure nuje e, prufittanno ‘e n’afachía (traversa) coveta da Lorenzigno, mettette dinto ‘o retuorno (rimbalzo)purtannoce ‘mmeizo (in vantaggio); ma fove sulo ‘na guaona (illusione) ca duraje justo cinche minute;cumminfatte  ô 29’ ‘o vvi’ lloco ll’acqua: ‘e diavule se facetteno ‘nnante i ‘e matusteje (mediane) nuoste ‘mparanza, cumme si ‘o fatto nun fósse stato d’’o lloro, sparetteno lassanno Bbonaventura libbero e ffranco  ‘e piazzà ‘na meza cagliosa dô lemmeto d’’a muntaca (area di rigore) nosta cu ‘o Lungagnone  ca nun tentaje ‘e fà coccosa pe ffermarla i ‘a frittata fove mmenestata: uno a uno i accussí rummanette ‘o natiggio (risultato) nsi’ ô mustalà (alla fine) pure pecché ll’ucummo Orsato [4,5 e ppo ve dico] nun ce dette ‘nu ricore sacrusanto quanno Donnarumma stennette ô Mmerecato, trasuto ô 65’ ô posto ‘e Lorenzigno acciaccato;’nzomma c’êttem’’a cuntentà ‘e ‘nu gramo punticciullo, acqua ca nun leva sete, pure si a ll’arrancua ‘o Napule tentaje ‘e fà coccosa, ma sempe senza ficre (idee), senza sustanza e ssenza maje essere overamente periculuse; troppo, troppo poco p’’o calasso (riscatto) ca ce fóssemo aspettate. Lassammo perdere e ppassammo ê ppaggelle:

MERET[‘O Lungagnone ] 5,5 Miezu zifo (voto) mancante pecché êsse avut’’a tentà coccosa ‘ncopp’ô tiro ‘e Bbonaventura e nnun ‘o ffacette; p’’o riesto nunn’êtte ‘a fà nisciuna parata  e ssulo quacche vvota avett’’ascí.

DI LORENZO 6  Se vedette poco annante, ma jette a cciammiello arreto.

MAKSIMOVIĆ[‘O ‘Ntontero] 6 Riuscette a nnun fà fessarie  e ringrazziammo ô Cielo.

KOULIBALY[‘O Ggialante] 6,5  Zaimmo (Leader) d’’a trasera (difesa),f ove sempe azzimmo (risoluto) e zzacrío (roccioso)e ‘nu paro ‘e vote nzerraje ‘a strata   a Piatekco.

HYSAJ 5,5  Miezu zifo (voto) mancante  pecché sí se prupunette ‘nnante, ma sempe ‘ncasinannose e nnun cunchiudenno ‘nu saciccio; arreto poco mancaje ca facesse ‘na daffimarma (autorete) retissante (clamorosa).

CALLEJÓN[Peppe ‘a ‘nguenta] 5 ‘Nu  zifo (voto) mancante pecché jucaje ‘na mubbara (partita) scadente; nun ce stette cu ‘a capa e sbagliaje ‘na palla commeta da mettere dinto ‘mmece ‘e mannarela ‘ncopp’â loggia d’’o palazzo ‘e rimpetto, cumm’isso ‘mmece facette![Dô 59′ MERTENS [Ciruzzo] 5,5 Miezu zifo (voto) mancante pecché facette assaje poco e ppe cchella mez’ora ca jucaje nun facette ‘mpressione. Peccato!]

ELMAS[‘O Turco] 5,5  Miezu zifo (voto) mancante pecché nun le pozzo perdunà ‘e nun avé fatto muro ‘ncopp’ô tiro ‘e Bbonaventura).

ALLAN[‘O’Ncrifato] 6,5   Nota pusitiva: cuntrastaje i arremarraje (ripartí), pruvannoce da fora e dànno dinto p’’e nassie (le punte).

ZIELINSKI 6  Tutto summato ‘na mubbara agruppina  (partita vivace),ma meglio a ll’arrancua ca durante ô primmo ajone quanno pur’isso nun facette muro ‘ncopp’ô tiro ‘e Bbonaventura.

LOZANO 6,5  Miezu zifo (voto) ‘e cchiú pecché me piacette cumme tammiaje (sviluppò) cierti maddadde (contropiedi) e pe ccomme prufittaje d’‘o retuorno (rimbalzo) ‘e ll’afachia (traversa) ‘e Lorenzigno purtannoce ‘mmeizo (in vantaggio);. [Da ll’83’ LLORENTE[‘O Spetaccuso] s.v.Trasette pe ffà ‘e fuosse ‘nterra e nnun facette ato. ]

INSIGNE [Lorenzigno] 6 – Primmo ajone (tempo) cunzistente  muvennose ‘nfr’ ê llinie; cugliette ll’afachia (traversa) e Llozano mettette a ffrutto ‘o retuorno (rimbalzo). Calaje a ll’arrancua (secondo tempo) nsi’ a cquanno ‘o Jancone ll’êtte ‘a levà pe bbia ca cadenno se facette male ô guveto. [Dô 65′ YOUNES[‘O Mmerecato] 6  Trasette javiuso  (brioso) dànnose da fà e abbuscannose ‘nu ricore ca Orasato nun le dette; abbeluto e sfurtunato sbagliaje ‘nu paro ‘e pallune ô niajo (nel finale), ma ‘o pozzo capí i ‘o perdono.]

all.  ANCELOTTI[‘O Jancone] 5 – Napule assaje poco mucannajo(convincente): ‘a scuatra nun tene cchiú certezze,nun ce sta cu ‘a capa e nnun fa chello ca uno s’aspettasse; scummetto ca si miercurí ‘nCiampionsa ‘o Napule nun fa niente ‘e bbuono, chisto nun se magna ‘o cenone napulitano cu ccapitone, ‘nzalata ‘e rinforzo, mussillo fritto, vruoccole, scioccele assurtite, fiche ‘mbuttunate,  struffole, pasta riala, raffiuole a ccassata etceveza!

arb. ORSATO 4,5  Mannato pe ce spezzà ‘e passe ‘o ffacette: vedette chello ca vulette vedé e cecaje ‘ncopp’a cchello ca nunn’ êv’’a vedé cumme ‘nnaccasione d’’o ricore, dètte pure ‘a ‘mpressione ca ‘o reculamento conta sulo si è ccontr’ô Napule, si è a ffavore, nun vale!

E ccu cchesto mettimmo punto e ssi ‘o Cielo ‘o vvo’ ce sentimmo ggiovedí pe ccuntarve  cumme s’è cumpurtato miercurí a ssera ‘nCiampionsa ‘o Ciuccio contr’ ô Liverpul(lo)â casa lloro. Staveti bbe’.

 

ilnapolista © riproduzione riservata