Che suddisfazziona guagliú! Finalmente chello ca vulevemo, chello succedette â faccia ‘e tutte ‘e cestarielle ca ce menano ‘a favetta
Che suddisfazziona guagliú! Finalmente chello ca vulevemo, chello succedette â faccia ‘e tutte ‘e cestarielle ca ce menano ‘a favetta. Jettemo a Ssalisburgo ‘ntenziunate a ppigliarece ‘e tre ppunte e affuzzajemo (vincemmo) pe tre a ddoje: ‘o Ciuccio zumpaje ‘ncuollo ô toro russo e lle lassaje ‘o signo a ppitoffio vattenno ‘e lucale ca nunn’abbuscavano ‘ncasa llora da sittanta sibbacche (match) e mmo ‘int’a ll’javallo (girone) suojo ‘e Ciampionsa ‘o Napule è pprimmo cu ssette punte, uno ‘e cchiú d’’o Liverpul(lo). Certo nun fove ‘na passiata, pecché se trattaje ‘e ‘na mubbara sufferta e ccumbattuta, ma ‘o Napule ce mettette tutta ‘a cegna (grinta) nicessaria e vvenette a ccapo d’’a facenna passanno ddoje vote ‘nvantaggio[18’ e 65’], facennose acchiappà ddoje vote[41’ e 72’] nsi’ ô tre a ddoje [73’] ca finalmente nun cagnaje cchiú p’’a cuntentezza d’’o Jancone e d’’a tribbuna-divano.
Passammo ê ppaggelle:
MERET[‘O Lungagnone] 7,5 Granna atalossa (prestazione) d’’o purtiere nuosto ca facette ‘nu primmo ajone (primo tempo)da mettere ‘ncurnice cu ttre miracule ca servetteno a mmantené ‘a porta acrata (inviolata) allimmeno nsi’ ô 41’ quanno, purtroppo, cumme a ppesce ‘e cannuccia se facette spiazzà ‘ncopp’ô ricore contro e s’arrennette. P’’o riesto dette sempe (sicurezza) â sezziona e nnun ce putette fa niente ‘ncopp’â siconna addaffa (rete) d’’e lucale signata ‘e capa da Haaland(e) lassato troppo sulo.
MALCUIT[‘O Tignuto] 6 ‘A vacante i ‘a chiena pe ll’udú (terzino) ‘e dritta ca smarrunaje quann’avette difennere, cumme ‘nnaccasione d’’o ricore prucurate cu n’inutile carí (fallo) ‘ncuollo a Hwang(o), ma fove periculuso quanno scennette palla ô pere,cumminfatte ll’azzione ‘e ll’uno a zzero e d’’o tre a ddoje da isso partetteno.
KOULIBALY[‘O Ggialante] 5 –Me dispiace, ma ll’attocca ‘nu zifo (voto) mancante!Nun ce pozzo crerere, ma ajeressera ‘o Ggialante nuosto nun facette tutt’’o duvere suojo;serata cumplicata p’’o (difensore) centrale ca s’’a vedette bblu cu Haaland(e). Che ffessaria facette ‘nnaccasione d’’o doje a ddoje quanno zumpanno a vvacante facette passà ‘o (cross) ‘e Junuzovic(ce).Che peccato.
LUPERTO 6 Fasso tagarrabbato (esame superato): doppo ‘nu primmo ajone (tempo) cu quacche sfregazzo (sbavatura) ,a ll’arrancua (nella ripresa)pigliaje curaggio e nnun smarrunaje cchiú e ccumplessivamente dicimmo ca facette meglio d’’o cumpagno ‘e sezziona (reparto).
DI LORENZO 6,5 Nun dètte a vvedé ca ‘a ferza mancina nunn’è rrobba soja, difennenno a mmestiere pure a ll’arrancua (nella ripresa) quanno ll’avverzarie cercajeno ‘e sfunnà dâ parta soja.
CALLEJON[Peppe ‘a ‘nguenta] 6,5 ‘E chisto nun se ne po’ ffà a mmeno! Atalossa (prestazione) ‘e cunsistenza d’’o spagnuolo ca cuvernaje a mmestiere ‘a purziona ‘e campo soja cupulianno (dialogando cu ‘e nassie (avanti).
[da ll’80’ ELMAS [‘o Turco] 6 ‘e stima. Trasette ‘ncampo pe ppochi minute pe ffà cataffeja (densità) ‘mmiez’ô campo e cchello facette.]
ALLAN[‘O ‘Ncrifato ] 6,5 Cu ttutto ca ajere nunn avette ‘o tiempo ‘e jí a dd’ ‘o callista, scennette ‘ncampo pe ffà ‘o cane ‘e presa i ‘o ffacette cu ‘e piere ca ll’abbrusciaveno pe bbia d’’e calle e ‘a fora ‘e quacche sfregazzo (sbavatura) ê primme minute, facette ‘o ssuĵo arrubbanno ‘na cifra e pallunne, secutanno a cchi capitava nsi’ a ll’urdemu minuto senza fermarese maje.
RUIZ [Anema Longa] 6 Mubbara (partita) addoje facce: p’’o primmo ajone (primo tempo), miso a ccentro d’’o campo facette quacche ccosa bbona, ma pure quacche prano (errore), meglio a ll’arrancua (nella ripresa) quanno ‘o Jancone se decidette a spustarlo ‘ncopp’â ferza mancina.
ZIELINSKI 5,5 Me dispiace ma ll’attocca ‘nu miezu zifo (voto) mancante pecché ‘o pulacco nun riuscette a essere isso: p’’o primmo ajone (primo tempo) facette troppi prane (errori), meglio a ll’arrancua (nella ripresa) quanno ‘o Jancone se decidette a spustarlo ‘mpusizziona centrale addó jucaje cchiú urdinato, facenno bboni gghiucate.
MERTENS[Ciruzzo] 9 Terasco (mostruoso)Notte ‘e magaria p’’o bbergo ca nun sulo mettette dinto ‘na pareglia d’addaffe (reti)[18’ e 65’], ma dette pure chella palla a zzuco ‘e caramella a Llorenzigno ca ô 73’ nchiudette ‘a facenna. Mo cumplessivamente pe Cciruzzo so’ cientoessidice addaffe cu ‘a maglia d’’o Napoli cchiú ‘e Diechito Maradona. Ch’ato se po’ vvulé da ‘nu jucatore?
[dal 76′ LLORENTE[‘O Spetaccuso] 5 ll’attocca ‘nu zifo (voto) mancante e ll’aggiu trattato!Annante nun se vedette, ‘mmiez’ô campo nun riuscette a ffermà i a ttené ‘nu paro ‘e pallune e ss’abbuscaje pure ‘nu justo cartellino jalizzo (giallo) ca se fósse pututo sparagnà.]
LOZANO 5 Pure a isso ll’aggi’’a mettere ‘nu zifo (voto) mancante pe bbia ca steccaje; ce fóssemo aspettato quacche tessería (accelerazione), quacche catío (taglio) e cquacche addaffa (rete), ’mmece isso facette ‘e fuosse ‘nterra jenno da cca a lla d’’o fronte uffenzivo senza quaglià Tuffillato(bocciato).
[dô 73′ INSIGNE[Lorenzigno] 7 Pochi minute ma ll’avastajeno pe spaccà ‘o munno cu chell’addaffa (rete) [73’] ca stennette definitivamente ‘o Salisburgo. Facette pace cu ‘o Jancone abbrazzannolo. Menu male va’.
All.: ANCELOTTI [‘O Jancone] 6,5 Chi vence ave raggione. Ce fossemo aspettate ‘e vedé a ssant’Arcadio ‘mmece isso scigliette dduje nassie (attaccanti) piccerille e sseríe (veloci) e Cciruzzo ll’accuntentaje levannole ‘e ccastagne dô ffuoco. Liggette bbuono ‘a mubbara (partita)cagnanno pusizzione a Zzielinski i Anema Longa e ffacenno trasí ô mumento justo a Llorenzigno. Primma d’ajere maje ‘o Napule aveva cunquistato sette punte dint’ê pprimme tre ghiuranate ‘e Ciampionsa.
Arb. Turpin 6 Facette ‘o duvere suĵo.
E ffermammoce cca, dannoce appuntamento, si ‘o Cielo ‘o vvo’ pe llunnerí ca vene doppo d’’o sibbacco (match) ‘e campiunato ca ‘o Ciuccio va a ffà dummeneca ca vene a Fferrara a ll’ora d’’a tiella e ppenzo ca ce jammo a ppiglià ‘e tre ppunte o allimmeno accussí spero ‘e putereve cuntà.
Staveti bbe’.
