ilNapolista

Putimmo stà cuntente, Koulibaly è ancòra isso

Le pagelle in lingua di Napoli-Liverpool: Mario Rui da applausi, straordinaria la parata di Meret su Salah e Callejon fondamentale

Putimmo stà cuntente, Koulibaly è ancòra isso

Tutto a pposto, guagliú! Cumme ve dicette ‘a vota passata, stammo sott’ô Cielo e ttutto po’ succerere e ccumminfatte succedette ajeressera ô san Paolo addó ‘o Ciuccio, doppo ‘na mubbara (partita) eccezziunale scummaje ‘e sanco pe ddoje a zzero ‘e campiune d’Aiuropa, chilli ch’êsseno avut’’a farece paura e ‘mmece ce facetteno sí e nno  ‘o cellechio   e sse ne turnajeno â casa lloro cu ddint’a ‘na guantiera ddoje sfugliatelle  caude [una riccia ‘e Ciruzzo a ll’82’ e n’ata frolla d’’o Spetaccuso diece minute doppo.

‘Nzomma, cumme m’aspettavo, ‘o Napule d’’o Jancone partette ‘nCiampionsa  cu ‘o pede justo p’’a cuntentezza nosta e pp’’o ttuosseco ‘e  ll’armujllacco (commentatore) ‘e canale cinche ca ce scartavetraje ‘o saciccio arricurdannoce, ‘ncopp’a  ll’uno a zzero, ca nce steva ‘o ricupero fa jucà e ll’avette dint’ê diente quanno proprio dint’ô ricupero ‘o Napule nun sulo mantenette ‘a porta acrata (inviolata), ma cu ‘o Spetaccuso mettette dinto ‘o doje a zzero nchiudenno a mmestiere ‘a ‘mpresa d’’o Ciuccio  prutacunisto ‘e ‘na bbella mubbara  (partita) jucata dê nuoste cu ccore, ‘nteliggenza,cazzimma, forza i asciarra (cattiveria) nicessaria; però cu ttutto ca ll’armidanno  (centrocampo) d’’o Napule mettette sotto chillo d’’e scarpare d’’o spustato Klopp(e), cu ‘o ‘Ncrifato ca  ricuperaje ‘na cifra ‘e pallune, cu Ppeppe ‘a ‘nguenta ca se cunfermaje funnamentale, cu ‘o Ggialante ca se chiammaje cuntinuamente ll’applavuse  mentre Chitelassa e Llorenzigno jucavano a mmiezu servizzio, però cu ttutto chesto êttemo aspettà ‘o niajo (finale) pe risolvere ‘a facenna e vedé [82’]a Cciruzzo mettere a frutto ‘o ricore ca s’era abbuscato Ppeppe ‘a ‘nguenta carriato ‘nterra dint’â muntaca (area di rigore) ‘ngrese da Robertson(ne)e ddiece minute doppo ce gudettemo ‘a cazzimma d’’o Spetaccuso pronto a s’apprufittà ‘e ‘na fessaria  ‘e van Dijk(co) ca pe scagno lle dètte ‘na palla da mettere sulo dinto. Nun ve dico ‘a cuntentezza d’’a tribbuna-divano! Passammo ê ppaggelle:

MERET[‘O Lungagnone] 7 Attiento e ssicuro, durant’ ô primmo ajone  (primo tempo) êtt’’a spurcarse ‘e guante sulo pe repuzà (respingere) ‘na cunchiusione poco periculosa ‘e   Mané. Straurdinaria e ddicisiva ‘mmece a ll’arrancua  (ripresa) ‘a parata soja ‘ncopp’ô mancino a ‘ncrucià ‘e  Salah doppo ‘na granna liggerezza ‘e Chitelassa.

DI LORENZO 6,5  Bbella atalossa (prestazione) ‘e ll’udé (terzino) ca arreto  se facette rispettà e cquanno putette scennette ‘nnante a ffà pusitivamente ‘o spezziale.

MANOLAS[Chitelassa] 5,5  Me dispiace, ma ll’attocca miezu zifo (voto) mancante, pecché doppo ‘nu primmo ajone  (primo tempo) tutto summato bbuono, a ll’arrancua jette dint’ê cchiavette nsi’ a ffà ‘na granna fessaria arresecanno ‘e rijalà ll’addaffa (rete) ô Liverpul(lo). Piezzo e ppejo ô niajo   (finale) quanno sfresaje (sfiorò) ‘nu daffimarma (autorete) cu ‘na scunchiusunata cabbesera (colpo di testa) a gghí arreto.

KOULIBALY[‘O Ggialante] 7,5 Putimmo stà cuntente; è ancòra isso, ‘nu ggialante ca nun tene chi lle sta a pparo: tacatamme murriffe (anticipi sontuosi), cuntraste senza paura e ‘a ‘nteliggenza ‘e capí primma ‘e ll’ate addó va a ffení ‘o pallone.

MARIO RUI 7,5 Atalossa (prestazione) overamente bbella e ppusitiva  ‘e ll’udé mancino  (terzino sinistro) purtuchese ca fove matàlo  (perfetto) ‘int’ê chiusure e ddint’ ê ccatàre (diagonali);cuncentrato e ssempe pulito quanno parrembaje (intervení) se facette nutà pure a ll’epata ‘e puzamiento (in fase di spinta)chiammannose ll’applavuso.

CALLEJON[Peppe ‘a ‘nguenta] 7,5  Funnamentale e avasta st’aggettivo pe ddicere che ssibbacco (match) fove ‘o suĵo, nun sulo pecché se prucuraje ‘o ricore ca sbluccaje ‘a facenna, ma pecché a ddritta nun se fermaje ‘nu mumento facennose vedé annante i arreto.

ALLAN[‘O ‘Ncrifato] 7,5 Che mubbara  (partita) chella d’’o cane ‘e presa carioca ca dètte tutto azzannanno ‘e feliette ‘e chi capitaje, ricuperanno ‘na cifra ‘e pallune e ddannole cu pricisione.  [dô 75′  ELMAS [‘O Turco] 6  Jucaje sulo ll’rdimi vinte minute, mase dètte da fà cumbattenno ‘ncopp’a ògne ppallone e ffacenno da culaturo (filtro)’mmiez’ô campo nsi’ a ll’urdemope ccuntrastà ‘o Liverpul(lo). 

RUIZ[Anema Longa] 5,5 Nun me dicite niente, ma pure a isso  ll’attocca miezu zifo (voto) mancante, pecché se vedette ca nunn’è ancòra a ll’arriba (top) cumme dimustraje nun sulo durante ô primmo ajone  (nel primo tempo) quanno  perdette ‘nu pallone assaje periculuso ‘ncopp’â trecquarte e ffacette ‘ncazzà ô Jancone, ma pure pecché nun currette e ffove poco mascullo (lucido).

INSIGNE [Lorenzigno] 5,5 Me dispiace, ma ll’attocca miezu zifo (voto) mancante, pecché si servette pe ttené ‘mpenziero  a Alexander-Arnold(o) e nun farelo vedé ‘nnante, dinto a ll’urdimi sidice metre cumbinaje poco e nniente senza maje truvà ‘a jucata bbona.

[dô 66′  ZIELINSKI 5,5 Pure a isso ll’attocca miezu zifo (voto) mancante dàtose ca miso largo a mmancina, nun fove pusitivo perdenno quacche cuntrasto ‘e troppo.]

MERTENS [Ciruzzo] 7 – Bbona atalossa (prestazione) ‘e Ciruzzo ca facette  ‘o nassio  (punta) lla ‘nnante primma tenenno ‘a scuatra corta, cercanno ‘e cupulià (dialogare) cu ‘e cumpagne,cercanno ‘a porta e cce vulette ‘na   parata straurdinaria pe nnunn’’o fà signà  e ppo cu bburruda (freddezza)  e pricisione cu ‘na bbella cagliosa mettette a ffrutto ‘o ricore ca a ll’82’ sbluccaje ‘a facenna.

LOZANO [‘O Scugnizzo] 6– Bbona atalossa (prestazione) d’’o messicano ca se facette nutà currenno sempe e ggiustranno ô lemmeto d’’a muntaca (area di rigore) ‘ngrese. ‘O Jancone ll’êtt’’a levà quanno a ll’arrancua (nella ripresa) se ne scennette ‘e posa.

[dô 69′  LLORENTE[‘O Spetaccuso] 7  Scafato trasette pe ll’urdimi vinte minute pe ffà ‘o punto ‘e urientamento uffenzivo  d’’e cumpagne, ma nchiudette ‘a mubbara (partita) apprufittanno ‘e ‘na fessaria ‘eVan Dijkc(o) ca lle dètte ‘na palla d’oro.

All. ANCELOTTI[‘O Jancone] 7,5  ‘a scuatra soja jucaje ‘nu sibbacco (match) matàlo (perfetto)senza spaventarse ‘nnante ê campiune d’Aiuropa prupunenno ‘nu juoco bbello e  de sustanza  e pp’’o Jancone fove una d’’e sserate cchiú bbelle vedenno ca tutta ‘a scuatra faceva chello ch’isso vuleva.

arbitro BRYCH 6– ‘Stu terisco, tutto summato, se cumpurtaje a dduvere e ‘a fora d’’o primmo quarto d’ora, quanno lassaje correre quacche carugnata d’’e scarpare ‘e Klopp(e) senza caccià cartelline jalizze (gialle), p’’o riesto d’’a mubbara (partita) siscaje chello ch’êv’’a siscà cumpreso ‘o ricore ca fove sacrusanto.

E ffermammoce cca, dannoce appuntamento, si ‘o Cielo ‘o vvo’ pe llunnerí ventitré doppo d’’o sibbacco (match) ‘e campiunato ca ‘o Ciccio va a ffà dummeneca ca vene a Llecce a ll’ora d’’a tiella e ppenzo ca ce jammo a ppiglià ‘e tre ppunte o allimmeno accussí spero ‘e putereve cuntà.

Staveti bbe’.

ilnapolista © riproduzione riservata