Le pagelle in lingua. Otto a Mertens, sette più per di Lorenzo, sette al macedone Elmas: “E ttene appena vint’anne”
Ajere all’ora streuza d’’o rrusolio e dd’’’e ppastarelle ‘o Ciuccio scennette ô san Paolo p’a primma mubbara (partita) casalinca ‘e ‘sta caracuddamma (stagione) e nun ce foveno surprese; cu ttutto ca ‘a Sampdoria,dàtose ca ‘ncrassifica era ggià urdema e ssenza punte, jucaje ‘o sibbacco (match) d’’a vita abbuscaje ô stesso p’’o spasso nuosto ca doppo d’’a delusione ‘e Turino ce avevemo ‘accuncià ‘a vocca arfuzzanno (vincendo) e ghiucanno bbuono.
E fovemo accuntentate da ‘e guagliune d’’o Janconeca ce facetteno alliccà ‘e bbaffe â faccia ‘e chi ce vo’ male, d’’e tanti cestarielle e dd’’o Palazzo addó Dela conta cumme ô doje ‘e coppe a briscula quanno ‘o triunfo è a mmazze! ‘Nzomma guagliú, ‘nfra ‘na cosa e n’ata ca nun ve sto’ a ddicere, doppo d’’o triricesimo [quanno ggià stevemo ‘ncopp’a ll’uno a zzero] ‘o Ciuccio p’’o primmo ajone (tempo) lassaje sí e nno sulo ddoje uccasione â scuatra ‘e Di Francesco, ma tutt’’e ddoje vote Quagliarella e socie truvajeno ‘nu granne Lungagnone ca lle facette annuzzà ‘ncanna ‘a speranza ‘e signà.
Quanno turnajeno ‘ncampo pe ll’arrancua (ripresa) ‘o Napule mettette ‘o pere ‘ncopp’ô pedale justo tassarianno (accelerando),’mpurranno ( spingendo) e strignenno ‘a sampedoria ‘int’â mmità ccampo soja, cu ghiucate seríe (rapide), ma purtroppo nun riuscette a ssignà ancòra cusicchè avettemo aspettà ‘o sissantasettesimo quanno sempe Ciruzzo mettette a ffrutto ‘na jucata ‘e chillu mammuoccelo ‘e ll’ècchese jummerdino Llorente ca dduje minute primma era trasuto ô posto d’’o scugnizzo. Chille d’’a Varra guardajeno pe bbuone dduje minute cercanno nun saccio qua’ pilo ‘int’a ll’uovo, ma nun ‘o truvajeno e êtten’’ârtaccà (convalidare)ll’addaffa (gol) pulita ‘e culata; da chillu mumento Ciruzzo, Peppe ‘a ‘nguenta e ppure Lorenzigno trasuto pe ddà ‘na mana cercajeno ‘e fà passà a ttre ‘e margarite, ma nun ce fove niente ‘a fà i ‘o sibbacco (match)se nchiudette lla senza dicere ato.
Passammo ê ppaggelle:
MERET[O Lungagnone]: 7 Ddoje parate una meglio ‘e ll’ata. Po cuntrullaje cu ‘a nicessaria prodda (freddezza) ‘o riesto d’’a mubbara (partita).
DI LORENZO: 7+ Bbella atalossa (prestazione) asasa (soprattutto) quanno surpassa a Ppeppe ‘a ‘nguenta ca se ‘ntartene a ddà ‘na mana a ll’arvasatte (centrocampisti) e isso po’ ccupulià mo cu ‘o scugnizzo, mo cu Cciruzzo cumme facette ô 13’ ‘nnaccasione ‘e ll’uno a zzero.
MAKSIMOVIC [‘O Ntontero]: 5,5 Senza mutivo s’abbuscaje quase sùbbeto ‘nu cartellino jalizzo (giallo) e ppe se repiglià ce mettette ‘nu poco ‘e tiempo;jette meglio a ll’arrancua (ripresa) quanno sinamparco(comunque) ‘a Sampedoria nun fove periculosa.
KOULIBALY[‘O Ggialante]: 6,5 N’ata cosa a ppietto d’’o jucatore purtroppo visto a Tturino; ajere ‘a fora ‘e ‘na palla velenosa perza pe scagno nun sbagliaje niente asasa (soprattutto) accuttanno (anticipando) mo ‘e capa, mo ‘e piere e mmo ‘e pietto cchiú ‘e ‘na vota!
MARIO RUI: 6 Sulo quacche sciucchezza difajanno (difendendo).Armasciaccaje (partecipò) all’epata uffenziva (fase offensiva) senza però essere maje overamente zincatejo (efficace).
CALLEJON[Peppe ‘a ‘nguenta]: 6,5 Peccato ca Audero lle dicette ‘e no a ‘nu granne tiro a ‘ncrucià. Se fosse mmeretato ‘e signà visto ca fove prutacunista ‘e ‘nu sibbacco (match) ‘nteliggente ca spisso jette a ddà ‘na mana ê duje ‘e miezo lassanno Di Lorenzo a ccupulià (dialogare) cu ‘o scugnizzo e ccu Ciruzzo.
FABIAN RUIZ[Anema Longa]: 6,5 Jucaje ‘ncopp’â limia ‘e ll’armidanno(centrocampo) cu ‘o turco Elmas(se) e se facette ‘nu mazzo tanto facenno circulà palla senza cuntà ca fove pure periculuso quanno ô niajo (finale) ‘a Sampedoria affannaje.
ELMAS [‘O Turco]: 7 Se facette apprezzà pe trecquarte d’ora facenno ‘o cane ‘e presa quanno fove nicessario e mantenennose sempe ‘int’ô vvivo d’’o juoco pe ‘nciarmà ll’azziona. Cercaje pure ‘a porta, mancannola ‘e poco. E ttene appena vint’anne! [Dô 76′ INSIGNE[Lorenzigno]: 6 ‘Nu tiro a ggiro ca accarezzaje ‘o palo e poc’ ato; nun putette fà ‘e cchiú.]
ZIELINSKI: 6,5 – Carigginno (Esterno) d’armidanno (centrocampo) ca s’accentraje quanno sagliette Mario Rui, dànno assaje ‘mpiccio a ll’armidanno (centrocampo) duriano.
LOZANO[‘O Scugnizzo]: 6,5 Scennette ‘ncampo cumme siconno nassío (punta) ma facette chello ca vuleva muvennose’nfra ‘e llinie, cupulianno mo a ddritta, mo a mmancina e ffacette ‘o ssuĵo cercanno pure ‘a porta cu ‘nu tiro maligno ca ascette ‘e poco. [Dô 65′ LLORENTE[‘O Spetaccuso]: 6 Bbona ‘a primma pe ‘stu mammuoccelo cu ‘nu bbuonu missiddo (assist) pe Cciruzzo ca nun sbagliaje!
MERTENS[Ciruzzo]:8 Fove ‘o cchiú ppericuluso d’’e nuoste e s’abbuscaje ‘a pagnotta cu ddoje addaffe (reti),n’afachía (traversa) chiena e ttantu muvimento. Cu cchille d’ajere ll’addaffe soje so’ 112! [Da ll’80’ YOUNES[‘o mMerecato]: 6 ‘e stima.]
All. ANCELOTTI [‘O Jancone]6 ‘Ncarraje tutto cosa, ma m’êsse ‘a spiecà pecchè nun fà jucà a ssant’Arcadio… I’ nun ce crero ca ‘o pulacco tene sempe prubbleme adilare (muscolari)…
Arb. LA Penna 5
‘Stu rumaniso ‘e ll’uttantatré, grossi fetenzie nun ce facette, ma dimustraje d’essere spaisato e dde nun sapé che cacchio nce facesse ‘mmiez’ô campo e ssiscaje a vvienetenne, ê vvote mettennose ‘miez’ê piere d’’e nuoste o cu cartelline jalizze (gialle) sprupusitate. Aggio paura ca pure chisto sta ‘ncopp’ô stato paca d’Agnelli e ccumpagne!
E ffermammoce cca, dannoce appuntamento, si ‘o Cielo ‘o vvo’ pe mmiercurí diciotto doppo d’’o sibbacco (match) p’’a Ciampionsa ‘e meza semmana ca ‘o Napule à dda ffà cu ‘o Liverpullo ô san Paolo; è ‘a primma e sperammo ‘e farece ‘a croce cu ‘a mana adderitta; me piacesse d’arfuzzà (vincere) o allimmeno ‘e nunn’abbuscà. ‘O ssaccio ca ‘a cosa è ddifficultosa, ma stammo sott’ô Cielo ‘o vvo’,e ttutto po’ succerere. Accussí spero ‘e putereve cuntà.
Staveti bbe’.
