Le pagelle di Bracale per Lecce-Napoli 1-4. Fabian miglior in campo insieme con Llorente. Soltanto Ospina sotto la sufficienza
Eccuce cca guagliú! E i’ mo che ve pozzo dicere? Si so’ ccuntento ‘e cumme jette ajere a Llecce cunt’ê lucale ‘e Liverani? Embè, i’ ve dico no e nnun me dicite ca nun so’ mmaje cuntento! Ajere ‘o Ciuccio fove chiammato a ddà ‘na risposta ê ddoje arnasse (vittorie) d’’a scuatra ‘e Conte e d’’a vecchia zoccola ‘e Sarri; e ppe risponnere rispunette sí artecranno (asfaltando) ‘o Lecce pe cquatto a uno addó ll’êsse pututo fà pe cquatto a zzero si Pastacrisciuta doppo’na granna raffadda (respinta) nun fósse asciuto senza raggiona ‘mpurtanta, a ccapa ‘e saciccio arrunzanno ‘nu lucale dint’â muntaca (aria di rigore) nosta. Cierti catte (sbagli) se pavano salate e accussí ffove: l’ucummo (arbitro) acatuso (fiscale), ma justo nun ce ‘a facette passà liscia, ce siscaje ‘o ricore contro’e nujaute i ‘o cmastuggiorgio (capitano) d’’e lucale ce futtette. E i’ mo sto’ cca a mmagnarme ‘o fecato pe nnun avé mantenuto ‘a porta acrata (inviolata) pe ‘na fessaria.
‘Nzomma guagliú chisto fove ‘o fatto ca me pare ‘o cchiú ‘mpurtante d’’a mubbara (partita) d’ajere pecché p’’o riesto nc’è ppoco da dicere: ‘o Caiuccio cuntinuaje ‘a matabbía (rincorsa) scutetto vattenno ‘o Lecce â casa soja cu cquatto sfugliatelle[tre frolle e ‘na riccia, chella ca cunfezziunaje anema longa e se purtaje â casa tre ppunte beneditte doppo ‘na mubbara (partita)ca, p’’a verità nun fove bbella,né muzzala (spettacolare) ma certamente mufida (utile) i ‘o ffacette ascallanno (sfruttando) ‘a pareglia (doppietta) d’’o Spetaccuso [28’ ei 82’] , ‘o catammo (sigillo) ‘e Lorenzigno da ll’armanno (dischetto)[40’] i ‘a perna d’’o laindabbo (inesauribile) Anema longa[52’] . A ‘stu punto putimmo pure fà ‘e ppaggelle:
OSPINA [Pastacrisciuta] 5,5 Me dispiace, ma ll’aggi’’a mettere miezu zifo (voto) mancante pe bbia ca ‘mpratteca nun fove maje ‘mpignato dê padrune ‘e casa i ‘a primma vota ch’êtt’’a risponnere presente, smarrunaje datose, cumme v’aggiu ditto doppo’na granna raffadda (respinta) ascette senza raggiona ‘mpurtanta, a ccapa ‘e saciccio arrunzanno ‘nu lucale dint’â muntaca (aria di rigore) nosta; pe ffurtuna ca doppo se calassaje (si riscattò) ‘ncopp’a Ttabanelli.
MALCUIT [‘O Tignuto] 6 Accumminciaje smarrunanno cchiú ‘e ‘na vota e ccu poca pricisione, ma po se repigliaje e ffacette chello ch’êva ‘a fà.
MAKSIMOVIC [‘o ‘Ntontero] 6 Miso ô posto ‘e Chitelassa, ajere se cumpurtaje a dduvere senza fà fessarie,attiento chelli ppochi vvote ca ‘o Lecce cacciaje ‘a capa fora dô sacco.
KOULIBALY [‘O Ggialante ] 6+ Ô ssolito ce facette vedé cegna (grinta), muareja (bravura) e jasado (fisico) senza farece pesà ‘a chiabba (assenza) ‘e Chitelassa; ‘ncopp’ô zzero a zzero mettette ‘na pezza a ‘nu paro ‘e situazzione periculose.
GHOULAM 6,5 Nunn’ è ancòra ‘o jucatore putente e preputente d’’e juorne passate, ma sinamparco (comunque) ajere lassaje ‘o signo suojo cu n’arbusso attallo (splendido tocco )pe Llorenzigno dint’a ll’azziona d’’o quatto a uno
RUIZ [Anema Longa] 7 ‘O Jancone ‘o facette partì largo a ddritta, ma pe isso cagnaje poco: allummaje (illuminò) ‘a munàvara (manovra) cu pere mancino dellicato e ssenpe cu cchillu pere mettette ‘a firma sotto ll’addaffa (rete) cchiú bbella d’’o sibbacco (match), accussí bbello ca ‘ntribbuna divano stammo ancòra sbattenno ‘e mmane.
ELMAS [‘O Turco] 6 – Nun ghiucaje cumm’êva fatto contro â Sampedoria ma facette ‘o ssuĵo cullabburanno â munàvara (manovra)fove uno d’’e tre ca s’abbuscaje ‘nu cartellino jalizzo (giallo) un’ammonizione [dô74′ CALLEJON[Peppe ‘a ‘nguenta] 6 ‘e stima].
ZIELINSKI 6 Trasette tarde ‘nnarajtamma (in partita), ma quanno ‘o ffacette lassaje ‘o signo dànno palla a ssant’Arcadio ca po favurette ‘o Spetaccuso pe ll’uno a zzero.
INSIGNE [Lorenzigno] 6,5 Nun le mecco sette pecché si è overo ca turnaje a essere maiacafe (abbastanza)lammaio (brillante) nun le perdono d’avé sbagliato ‘o primmo tiro ‘e ricore; menu male ca ll’ucummo (arbitro) s’accurgette ca Gabriel(lo) s’era muoppeto primma e facette ripetere ‘o tiro!
LLORENTE [‘O Spetaccuso] 7 Sempe cchiú a ssiolo (agio) cu ‘e cumpagne, peccato ca ‘ncopp’â trecquarte è troppo ‘mpacciato e bbatiejo (lento), ma sott’â porta ècàtelo (letale) i ajere ne facette dduje! [da ll’87’ LUPERTO 6 ‘e stima]
MILIK [Sant’Arcadio] 6 Finalmente ‘o Jancone ‘o facette jucà e nnun se nn’êtte ‘a pentí,pure si’o pulacco se vedette poco e ssulo p’’o nnicessario: facette partí ‘e pere ll’azziona ‘e ll’uno a zzero e dde capa ppure chella d’’o tre a zzero;’nchietta cu ‘o Spetaccuso penzo ca si joca ‘e cchiú ce fa vedé ‘e cchiú! [dô 73′ LOZANO[‘O Scugnizzo] 6 – Se tasniaje (frabbicò) n’ accasiona ‘mpurtante, ma Gabriel(lo) lle dicette ‘e no. Peccato.]
All. ANCELOTTI [‘O Jancone] 6,5 Forze esaggeraje cu ‘o rutizzio (turnover), ma tutto summato ‘o ggestiunaje(gestì) bbuono i azzeccaje pure ‘e cagne juste durante ll’ arajtamma (incontro) gudennose ‘na uarrada (rosa) ca lle po’ ddà grossi suddisfazzione.
Arb.: PICCININI 6 Primmu sibbacco (match) ucummato (arbitrato) cu ‘o Napule pe ‘stu furlivese arscididdo (severo) e acatuso (fiscale) ca nun ne ne facette passà una e siscaje cu ll’uocchie apierte.
E fermammoce cca, tutto summato suddisfatte ‘e cumme jette e soprattutto d’avé mantenuto ‘o passo d’’a vecchia zoccola e Bbisciona; mo se torna a gghiucà p’’o campiunato ggià miercurí ca vene, i ô san Paolo sbarcano ll’isulane saragnuole e i’ spero ca, si ‘o Cielo ‘o vvo’ ggioverí ve pozzo cuntà ca ‘o Napule à arfuzzato (vinto) n’ata vota sempe speranno ca ‘a chenca ‘e ll’arbitre nce lassano fà ‘o spezziale! Nun me voglio sbaglià. Staveti bbe’.
Marcatori: 28′, 82′ Llorente (N), 40′ rig. Insigne (N), 52′ Fabian Ruiz (N), 61′ rig. Mancosu (L)
