‘o Ciuccio fove uzzimmato ‘na scuatra ca ô san Paolo nun passava da dudice anne! E cche saciccio!
‘A VEDETTE ACCUSSÍ
Che collera e ch’avvilimiento guagliú giacchè ajeressera ‘o Ciuccio fove uzzimmato (sconfitto) p’’a siconna vota durante ‘stu campiunato e mme pare ca ‘a mazziata casalinca d’ ajeressera contro a ll’isulane d’’o Cagliari fove cchiú dulurosa ‘e chella a tTurino cu ‘a vecchia zoccola pecché lla ‘e nuoste facetteno ‘na bbella mubbara (partita), cumbattetteno, ricuperajeno tre addaffe (reti) e ppo mullajeno sulo pe bbia ‘e ‘na daffimarma (autorete) addó ca ajeressera asasa (soprattutto) durante ô primmo ajone (tempo)‘e nuoste me paretteno musce, senza ggenio, senza ficre (idee) i ‘o Jancone ll’êva mmale assurtite visto ca ‘nnante nun tenevemo manco ‘nu luongo, ma tre rasoterra e ‘mmiezo ô campo facette a mmeno d’ Anema longa; cusicché êttemo aspettà ll’arrancua (ripresa)pe vvedé quacche ccagno, ma sulo annante pecchè ‘mmiezo ô campo nun putette trasí Anema longa datose ca ‘o Ggialante êva pigliato ‘o posto d’’o ‘Ntontero ca, menato ‘nterra, teneva ‘nu prubblema ô scianco; sinamparco (comunque) s’abbiaje a vvedé ‘nu Napule cchiú sustanziuso ca, cu ttutto ‘o muraglione aizato da Maran(ne) finalmente cercaje ‘a porta, ma senza riuscí a ssignà visto ca ‘o purtiere isulano cacciaje ‘a scienza e ddicette no primma a Cchitelassa e ppo ô Ggialante mentre ‘o Spetaccuso e sant’Arcadio inutilmente cumbatteveno ‘mmiez’â trasera isulana spisso mazziate e strattunate senza ca Di Bello
dicesse niente. I accussí s’arrivaje a ll’82’ quanno succedette ‘o llutto:dâ trasera (difesa)isulana, mente ‘o Spetaccuso era strattunato e trattenuto, partette n’azziona e cu ‘e nuoste sguarnite arreto ‘o Cagliare cu Castro ce cugliette sott’â scella; Kalidú prutestaje cu Di Bello pe bbia ca êva lassato correre ‘o carí (fallo) ‘ncuollo ô Spetaccuso e ll’ucummo (arbitro) ‘o jettaje fora: curnuto e mmazziate. I accussí fenette p’’a collera d’’a tribbuna-divano e pp’’a cuntentezza d’’e duje cestarielle d’armujllacche(commentatori),masculo e ffemmena ‘e Sky ca ce tirajeno ‘e piere dô primmo a ll’urdimu minuto e mmo doppo d’’a quinta jurnata ggià stammo arreto ‘e paricchi punte a ppietto d’’e primme… pirciò è inutile sunnarce ‘o tramme elettrico; ô cchiú, ô cchiú âmm’’a vedé si ce ‘a facimmo a ppiglià ‘o terzo posto. Che ce vulite fà?! Passammo ê ppaggelle:
MERET[‘O Lungagnone] 5,5 Miezu zifo(voto) mancante giacché nunn’êtte ‘a fà niente nsi’ a ll’82’ e cquanno avesse avuto d’ascí p’astregnere ‘o parlànfaccia d’’a porta a Ccastro, rummanette ‘ncopp’â linia ‘e porta aspettanno ‘na ‘ncurnata ca maje êsse pututo parà.
DI LORENZO 6,5 Appressuraje (spinse)assaje ‘ncopp’â curzia soja assicuranno ‘na bbella catena cu ‘nu Peppe ‘a ‘nguenta senza ggenio e ddànno cchiù ‘e ‘nu pallone sfezziuso ê cumpagne.
MAKSIMOVIC[‘O ‘Ntontero] 6 Facette ‘o ssuĵo; po êtte ascí pe bbia ‘e ‘nu ‘mpiccio ô scianco.[dô 46’ KOULIBALY[‘O Ggialante] 6+ Se facette rispettà facenno cagnà faccia ô
sibbacco (match); cercaje pure ‘a porta, ma po a ll’83’ se nne facette caccià pe ll’aratiaje (proteste) juste visto ca cumme v’aggiu ditto, ll’ucummo (arbitro) êva lassato correre ‘o carí (fallo) ‘ncuollo ô Spetaccuso strattunato e trattenuto quanno partette ll’azziona ‘e ll’addaffa (rete) isulana. Mo pe ddummeneca ca vene cu ‘o ‘Ntontero acciaccato, Kalidú squalificato voglio vedé cumme ‘a cumbina ‘o Jancone!]
MANOLAS[Chitelassa] 6,5 Guvernaje a mmestiere ‘a camma (zona)soja e sfresaje (sfiorò) cchiú ‘e ‘na vota ll’addaffa (la rete) cu chiritarte (scorribande) uffenzive.
MARIO RUI 5,5 Ll’attocca miezu zifo (voto) mancante pecché doppo d’avé fatto ‘o duvere suojo, ‘int’ô chiuvo [82’ ]lassaje troppu spazzio a Nandez(zo) ‘nnaccasione d’’o jabbro (cross) pe Ccastro.
ZIELINSKI 5,5 Miezu zifo (voto) mancante pure a isso pecché fove troppo appaurato e ppoco zzincatejo (incisivo).
ALLAN[‘O ‘Ncrifato] 5 Me dispiace ma ll’attocca ‘nu zifo (voto) mancante pecché ajere nun fove isso: nun ce mettette nè ccegna (grinta), nè ttacheja (energia) nè asciarra (cattiveria) e nnun facette ‘mpressione.
CALLEJON[Peppe ‘a ‘nguenta] 5,5 Che peccato, però pure a isso ll’attocca miezu zifo (voto) mancante pecché ajere stranamente jucaje a mmiezu servizzio e nun fove pe
nniente carimmo (generoso); s’avesse arrepusà…, ma cumme se fa?
INSIGNE[Lorenzigno ] 5 Ll’aggi’’a mettere cinche pecché ajere ll’atalossa (prestazione) soja facette vedè cchiú arlazalle (ombre) ca rue (luci) e ddurante ô primmo ajone se magnaje n’addaffa (rete)ieduja (clamorosa). [Dô74’ MILIK 6 ‘e stima Però, ‘mbuttigliato dint’â trasera (difesa) sardagnola, nun riuscette a ttruvà ‘a zampata justa.]
LOZANO[‘O Scugnizzo] 5 Che peccato, pure a isso ll’attocca ‘nu zifo (voto) mancante pecché ajere ‘o messicano, a ccurto ‘e ficre (idee) nun riuscette a essere isso e ffove tampunato a mmestiere da ll’avverzarie dimustranno ‘nu mumento no; forze ‘o Jancone nunn’êsse avuto farlo scennere ‘ncampo mettenno o sant’Arcadio o ‘o Spetaccuso ô posto suĵo. [Dô 66’ LLORENTE[‘O Spetaccuso] 6 Trasette tarde, ma facette assaje ‘e cchiú d’’o Scugnizzo pure si nun signaje.]
MERTENS[Ciruzzo] 7 Tutto summato fove isso ll’anema d’’o Napule: sempe mascullo (lucido) e magamirro (intraprendente)’mmentaje p’’e cumpagne, cercaje periculosamente ‘a porta e ffove ‘nu cuscemarro (incubo) p’’a trasera sadagnola (difesa sarda).
all. ANCELOTTI[‘O Jancone] 4 Me dispiace, ma tanto se mmereta; nun sulo sbagliaje furmazziona facenno a mmeno annante d’’e luonghe e ‘mmiezo ‘e uno cumme Anema Longa, ma po tardaje a ccagnà quacche ppedina e ffove isso ‘o primmo respunzabbile d’’o giulgillo(tonfo) casalinco cu ‘na scuatra ca ô san Paolo nun passava da dudice anne! E cche saciccio!
Arb. DI BELLO 4,5 Pugliese, pirciò muiddo (tifoso) jummerdino e ttanto abbasta; ne sbagliaje cchiú dd’ una comme ô rrusso pe Kcalidú e ato cca e lla i ‘e cchiú nun dico.
E fermammoce cca; âmm’abbuscato e mme chiagne ‘o core datose ca nunn’âmmu mantenuto ‘o passo d’’a vecchia zoccola e d’’a Bbisciona; mo se torna a gghiucà p’’o campiunato dummeneca a ll’ora ‘e ll’apritivo, i ô san Paolo sbarca ‘a scuatra ‘e Bbalotelli e ssocie, brutte accunte ma i’ spero ca, si ‘o Cielo ‘o vvo’ llunnerí, â faccia ‘e chi ce vo’ male, ve pozzo cuntà ca ‘o Napule à arfuzzato (vinto) i ‘a sciorta ce à fatto fà ‘o spezziale! Nun me vulesse sbaglià! Staveti bbe’.
