Le pagelle in napoletano di Juve-Napoli 4-3
‘A VEDETTE ACCUSSÍ
Che collera e cche currivo guagliú! Nun ve pozzo dicere che me sto’ rusecanno da ajeressera senza essere capace ‘e me ll’agliottere giacché proprio nun me riesco a ccunvincere ‘e chello ca succedette ‘ncasa d’’a vecchia zoccola ca ce vattette pe quatto a ttre, ma sulo ô 92’ e ppe gghionta ‘e ruotolo cu ‘na daffimarma (autogol) d’’o meglio madaffio (difensore) nuosto ca ‘mmece ajeressera facette ‘a peggia mubbara (partita) da quanno joca cu nnuje… Nun ce pozzo credere! Ajere ô 90’ stevemo tre a ttre doppo ‘nu brutto primmo ajone (tempo) nchiuso ‘ncopp’ô doje a zzero p’’a vecchia zoccola e doppo d’avé ‘ncassato ‘a terza addaffa ô 62’ êvemo adderezzato ‘na varca ca pareva stesse p’affunnà e ‘ntribbuna divano stevemo penzanno ca ce fossemo purtate ‘nu punto d’oro â casa quanno succedette chello ca meno t’aspiette: Orsato [4 e ppo ve dico] ô 92’ tanto pe ddà palla e ‘na mana ê janche e nnire rijalaje ê padrune ‘e casa ‘na timmuria (punizione) ca nun ce steva e ca ‘nu jummerdino tiraje cu ‘o sanco a ll’uocchie mettenno ‘a palla dint’â muntaca (area di rigore) nosta addó nisciunu cumpagno suojo ce putette arrivà. Pe ghiastemma menata ce arrivaje ‘mmece ‘o Ggialante nuosto, ma ‘o ffaccette ‘na chiaveca cuglienno palla cu ‘nu stinco e menannola ê spalle d’’o Lungagnone ca nun ce putette fà niente. I accussí ‘a frittata fove fatta i ‘o cresemisso p’’a vecchia zoccola e Ssarri appruntato cu nnocca e ccarta argentata. Che ce vulite fà? Tèneno cchiú cculo ca anema, ma ‘e nuoste so’ ffesse overo: ô 90’ state tre a ttre? Nun ll’âte fà jucà palla cchiú! Menatela cuntinuamente fora o mantenitela cchiú lluntano dâ porta nosta…, menateve ‘nterra, faciteve vení ‘e riscenzielle, ma nun ‘e ffacite jucà cchiú e ppurtateve â casa ‘nu punto! Mo ‘mmece lloro teneno seje punte e nnuje sulo tre… Aggio paura ca ‘o fatto d’ogge nunn’è meglio ‘e chillo d’ajere e ppure ‘sta caracuddamma (stagione) facimmo ‘nu buco ‘int’a ll’acqua! Tenimmo ll’uocchie ‘e troppi cestarielle ‘ncuollo e nnunn’ âmmo truvato ancòra chi ‘e bbenedice i ‘e riffe o ‘e raffe ‘e mmette ô ssicuro dâ mala sciorta ca ‘mmece ajere nce accumpagnaje nsi’ô 93’ E ccumminfatte arfuzzaje
(vinse) ‘a vecchia zoccola, cumme v’aggiu ditto, a ll’urdimo rispiro, sfruttanno ‘a granna puttanata ‘e Kalidú ca sfravecaje ‘o castiello cuano (azzurro) aizato a ffatica rimuntanno da tre a zzero a ttre a ttre. ‘Nzomma, pe ddicere ‘a verità, ‘e janche e nnire, durante ô primmo ajone (tempo) s’assicurajeno ‘o doje a zzero mustrannose cchiú cunvinte, cchiú stiappe (reattivi) e cchiú ccapace ‘e sfruttà ‘e ddaiffen diffaje(debolezze difensive) d’’a scuatra d’’o Jancone, scuatra ca ggià a Ffirenze aveva dimustrato ‘e nun tené ancòraficre (idee) chiare pe pruteggerse da ll’avverzarie ‘ncassanno tre addaffe! Chesta ‘a cronaca d’ajere: ‘e janche e nnire ggià ô 16’ passajeno cu ‘nu granne iummuddadde
(contropiede) ‘e Douglas(se) Costa cunchiuso da Danilo appustiato, sulo, a ccentro ‘e muntaca (area di rigore) e ddoppo tre mminute chillu cainno (traditore) d’’o Pipita cu ‘nu juoco ‘e pristiggio se libberaje ‘e Koulibalý effuttette ô Lungagnone ca putette guardà sulo cumme ‘o pallone traseva ‘mporta. Da chillu mumento ‘a Juve cuntinuaje a ffà chello ca vuleva senza ca ‘e nuoste se decidessero a gghiucà e c’êtt’’a penzà ‘o Lungagnone a mmeterce ‘na pezza i ‘e punie ‘ncopp’a dduje tire ‘e Khedira, cusicché quanno Orsato ‘e mmannaje a ppigliarse ‘na cosa fresca parette quase ca ‘o doje a zzero fósse n’affare p’’o Ciuccio. Turnate ‘ncampo ‘o Jancone lassaje ‘int’ô curfatto (spogliatoio) a Llorenzigno i a Ghoulam(me) e menaje dinto a Mmario Rui i ô scugnizzo Lozano e ffove isso ca facette cagnà passo ê nuoste ca all’arrancua (ripresa) foveno tutto n’ata cosa…. però ô 62’ Cristiano Ronaldo, lassato libbero da Mario Rui, sfruttaje n’ata jucata d’’o solito Douglas(se) e ffuttette, p’’a terza vota ô Lungagnone. Fove tanno ca ‘o Napule dimustraje ‘e starece ancòra e dint’a dduje minute, ô 66’ cu Chitelassa e ô68’ cu ‘o Scugnizzo se mettette ‘ncopp’ô tre a ddoje; ‘a vecchia zoccola stanca,affaticata e ‘nzallanuta p’’e duje pacchere pigliate nun fove cchiú essa e nnun ve dico cumme cwe spssajemo ‘ntribbuna-divano quanno Di Lorenzo ce purtaje ‘ncopp’ô tre a ttre. Purtroppo nun fernette accussí, pecché arrivaje ‘o pasticciotto d’’o Gialante ca affunnaje ‘a varca cuana (azzurra)rijalanno ll’arnassa (vittoria) â vecchia zoccola. Rrobba da nun crerere! Passammo ê ppaggelle
MERET[‘O Lungagnone] 6,5: pigliaje quatto addaffe (reti), ma êsse pututo fà coccosa ‘e cchiú sulo ‘ncopp’â terza; p’’o riesto s’abbuscaje ‘a zuppa fermanno ‘e ‘na manera o n’ata ati tre o quatto palle periculose.
DI LORENZO 6: Nun sulo se facette rispettà, ma signaje pure cosa ca rennette meno amara ‘a serata soja.
MANOLAS[Chitelassa] 6: Ma sulo pecché signaje pecché p’’o riesto êsse avuto mettere quacche ppezza ê ffessarie d’’o culleca ‘e sezziona (reparto e nnun ‘o ffacette.
KOULIBALY[‘O Ggialante] 4: Me dispiace, ma chiste so’ ‘e fatte; pure a Firienze nun fove isso; turnato cchiú ttarde ‘e tutte nun sta ancòra ncundizziona e sse vedette! ‘o Pipita s’’o pazziaje cumme vulette mettennolo ‘ndifficultà cuntinuamente. Faticaje a ccapí che steva succedenno i a ppiglià ‘a dicisiona justa dimustrannolo cchiú ‘e ‘na vota e asasa (soprattutto) ‘nnaccasiona d’’a daffimarma (autogol). ‘O Jancone à dda vedé ch’à dda fà pecché pe nnuje Kalidú è funnamentale!
GHOULAM 5: Nun fove isso, dâ parta soja ‘a vecchia zoccola facette chello ca vuleva visto ca ‘o cuano (azzuro) nun riuscette maje a ppiglià ‘e mmesure ‘ncuollo a Douglas(se) Costa prutacunista ‘e ll’azzione cchiú ppericulose. Nun sta ancòra bbuono e ppurtroppo se vede; cumme ô Ggialante nun sta ‘ncundizziona e sbagliaje pure ‘e ccose cchiú sciale (facili)cumme quanno tiraje a vvienetenne addó steva libbero Ciruzzo [Dô 46’ MARIO RUI 5,5: Miezu zifo mancante pecché rummanette remmo a gguardà cumme Ronaldo tirava ‘naccasione d’’o tre a zzero.]
ALLAN[‘O ‘Ncrifato] 6: Nun se fermaje maje ma spisso currette a vvacante; ‘e bbuono ca cercaje da luntano ‘a porta truvanno però ‘o purtiere jummerdino ca lle dicette ‘e no.[Dô 74’ ELMAS 6: Guaglione e bbuono nun se ‘mpressiunaje facennose rispettà].
ZIELINSKI 6,5: Riuscette a nun fà ragguiunà a Ppjanic, ma nun riuscette a ssustentà (sostenere) ‘a munavara (manovra) uffenziva.
CALLEJON[Peppe ‘a ‘nguenta] 5: ‘Nu zifo (voto) mancante pecché pure pe isso ‘a serata fove scarza ‘e zuco e ccunnimma e nun fove isso!
RUIZ[Anema Longa] 6: Ajere meglio ‘ncabbina ‘e riggia ca ‘nfra ‘e llinie. Overo bbello e mmesurato ‘o missiddo (assist) pe Cchitelassa.
INSIGNE[Lorenzigno] 5: ‘Nu zifo (voto) mancante pecché êsse avuto fà assaje ‘e cchiú cupulianno (dialogando) cu ‘e cumpagne, cosa ca nun facette; tiraje una vota periculosamente,Bonucci ce refunnette ‘a capa, ma da chillu tiro nascette ‘a primma addaffa (rete) jummerdina. ‘O Jancone nun sbagliaje quanno ‘o levaje mettenno ô scugnizzo e spustanno a Zzielinski a mmancina.[Dô 46’ LOZANO[‘O Scugnizzo] 7: menato ‘ncampo quanno ‘a ruvina ggià era stata fatta, a surpresa, truvaje ‘a zampata ca arapette n’ata vota ‘e juoche. Chi sa si fósse sciso ‘ncampo dô primmo minuto!]
MERTENS [Ciruzzo] 5,5: miezu sifo (voto) mancante pecché se decidette a gghiucà sulo a ll’arrancua (nella ripresa). Peccato!
all. ANCELOTTI[‘O Jancone] 5,5: ‘A scuatra cuana (azzurra) mustraje ‘e suocce prubbleme mustrate a Ffirenze: troppi jucature nun stanno ‘ncundizzione i ‘a trasera (difesa) abballa malamente. À dda capí ca sette addaffe pigliate dinto a ddoje mubbare so’ overamente troppe, pure pecché putevano essere pure ‘e cchiú. À dda fà coccosa!
Arb. ORSATO 4: E ll’aggiu trattato a ‘stu cecatiello ca mannato a cce spezzà ‘e passe ‘o ffacette ajeressera nun vedenno ‘e tanti carí (falli) d’’e janche e nnire e llassaje correre senza siscà maje,i ‘o capo d’opera ‘o facette ô 92’ quanno pe dà palla e ‘na mana â vecchia zoccola rijalaje ê padrune ‘e casa ‘na timmuria (punizione) ca nun ce steva e dda chella nascette ‘a smaledettadaffimarma (autogol).. Cose ‘e pazze! E ddiceno ca chisto è ‘o meglio arbitro ca tenimmo! Si chist’è ‘o meglio penzate ll’ate ch’ànn’’a essere! Aggio paura ca purtroppo pure isso sta ‘ncopp’ô stato paca d’ Agnelli e ssocie. E Dela nun à capito ancòra ca ‘nzieme a cquacche gghiutore s’àdda accattà quacche signalinie e ccocche arbitro! Gnorsí, forze costano assaje, però renneno.
E fermammoce cca! Jette cumme jette e ppacienza; si quaccuno s’era sunnato coccosa ca se scetasse e tturnasse cu ‘e piede ‘nterra! P’’o scudetto si Di’ vo’ se ne parla ‘a tempurata ca vene! P’’o mumento sperammo sulo ‘e ferní ‘stu campiunato senza ati fijure ‘e mmerda,e vvedidimmo e saglí ‘ncrassifica!!
Ve saluto; mo ‘sta semmana nun se joca pe bbia d’’a nazziunala pirciò cu ll’ajuto d’’o Cielo ce sentimmo llunnerí sidece pe rraccuntarve d’’o sibbacco (match) ô san Paolo cu ‘a Sampedoria. Staveti bbe’.
