Tutto a pposto allora? Be’ sino a ‘nu certu punto pecché p’ arfuzzà (vincere) s’arfuzzaje (si vinse) ‘ma piglianno tre addaffe (reti) cosa ca nun me piacette
Eccuce cca guagliú; cumme ‘o Cielo à vuluto ajeressera àmmu veduto ca è accumminciato n’atu campiunato e, cumme sapite, pp’ ‘o Ciuccio accummunciaje mettennose ‘e tre ppunte dint’â sacca visto ca ascette dô Franchi ‘e Firenze doppo d’avé mazziato ‘e lucale pe cquatto a ttre, cosa ca lle permettette ‘e mantenere ‘o passo d’’a vecchia zoccola ca […e sse sapeva] ‘mmerz’ê sseje êva vattuto ‘o Parma p’uno a zzero cu n’addaffa signata pe scagno da Chiellini appustiato ‘ncopp’â linia d’’a matacarmína (area di porta) doppo ‘nu tozzi-tozzi ca lle mettette ‘a palla ‘mpont’ô pere.
Tutto a pposto allora? Be’ sino a ‘nu certu punto pecché p’ arfuzzà (vincere) s’arfuzzaje (si vinse) ‘ma piglianno tre addaffe (reti) cosa ca nun me piacette e ca nun me fa vedé niente ‘e pusitivo a ll’urizzonte datose ca ‘o campiunato se vence soprattutto nun piglianno stuche(gol) e mantenenno ‘a porta acrata (inviolata) e pp’’o mumento dico ca chisto è ‘o prubblema d’’o Napule d’’o Jancone [difennere ‘a porta e nun piglià addaffe (reti)]e isso à dda vedé ch’à dda fà pe mmigliurà ‘a facenna… e nun fósse sbagliato fà jucà a Ospina o ô creco Karnezis ‘mporta tenenno ô Lungagnone ‘mpanca. Mo cchiù dd’uno ‘e vuje me zompa ‘ncuollo… ‘o ssaccio, ma pacienza: chello ca penzo, chello dico.
E bbasta accussi; cuntentammoce d’’e tre ppunte e titammo ‘nnante.
Passammo ê ppaggelle:
MERET[‘O Lungagnone]5: M’aspettavo ca facesse meglio…’mmece chi t’’o ddà?! Lassammo stà ‘o ricore ca se facette spiazzà cumme si mo stesse ascenno da sott’ô mantesino, ma p’’o riesto fove chiammato a ffà coccosa pochi vvote e spisso se facette truvà ‘mpriparato cumme ‘nnaccasione d’’a siconna addaffa (rete) d’’e lucale quanno ce mettette troppu tiempo pe tentà ‘a parata. Pe mme, meglio fà jucà a Ospina o ô Creco!
DI LORENZO 6: Sufferette apprimma cu Cchiesa e ppo cu Rribery,ma riuscette a nun fà guaje e ccumplessivamente facette ‘na bbona mubbara (partita) facennose rispettà.
KOULIBALY[‘O Ggialante] 5.5: Me dispiace ma ajeressera ‘o ggialante cuano nun fove matàlo (perfetto): durante ô primmo ajone (tempo) fove troppo bbello, ma po venette meno proprio ‘int’ô chiuvo quanno se facette magnà ‘ncapa da Milenkovic(cio)’nnaccasione d’’o doje a ddoje. Peccato.
MANOLAS [Chitelassa]6:Bbona mubbara (partita) d’’o centrale creco ca nun facette fessarie e nun se facette spaventà dâ zureja (velocità) viola.
MARIO RUI 6 ‘A vacante i ‘a chiena: ‘ncopp’â fascia spisso se facette cartià da Sottil(le),ca attaccaje a ccapa sotto, però ricuperaje ddoje palle e da chelle nascettene ddoje addaffe (reti). [Dô 70’ GHOULAM 6’E stima]
ALLAN[‘O ‘Ncrifato] 5.5: Ajere nun fove troppo urdinato custretto spisso a ffà quacche carí(fallo). Avette ‘a vedersela cu Pulgar(re) e gghiette cchiú ‘e ‘na vota ‘int’ê chiavette.Po’ mmigliurà.
[dô 70’ELMAS 6: Nun se vedette troppo, ma purtaje arricietto (ordine) ‘mmiez’ô campo.]
ZIELINSKI 5.5: Miezu zifo (voto) mancante) pecché nun le pozzo perdunà d’avé dopo pochi minute rijalato ‘nu ricore â Fiorentina, sapenno ca Massa era ‘nu fissato d’’e rrevule; p’’o riesto facette bbona guardia a ll’armidanno (a centrocampo).
CALLEJON [Peppe ‘a ‘nguenta] 7: Troppo bbella ll’addaffa (rete) soja truvanno ‘o ‘squina (angolo) vascio pe ffottere a Dragowski. A zzuco ‘e caramella po ‘o missiddo (assist) pe Llorenzigno ‘nnaccasione d’’o quatto a tre; ‘nzomma ‘nu sibbacco (match) ‘e sustanza.
RUIZ [Anema longa] 6: Facette isso ‘a fatica cchiú sporca ‘int’ê ddoje maràle (fasi) dimustrannose ancòra ‘na vota pedina funnamentale p’’o juoco cuano.
INSIGNE [Lorenzigno] 7.5: Serata da tené a mmente: ‘o capitano d’’o Napule fove overamente scatenato:truvaje ddoje addaffe (reti) e ccunfezzionaje ‘nu missiddo (assist) cu sette parme ‘e saciccio, trascenanno ‘a scuadra soja â cunquista d’’e tre ppunte. Jucasse sempe accussí!
MERTENS [Ciruzzo] 7: Granna mubbara(partita) pure pe Cciruzzo ca signaje n’addaffa (rete) spiciale e ppo se jette a guadagnà ‘nu ricore da figlio ‘e coperativa e bbuono facette, nun ce scurdammo po ca fove isso a ffà partí ll’azziona d’’o 4 a 3.
[Da ll’83’HYSAJ[Meza Cucchiara]6 Facette ‘o ssujo]
all. ANCELOTTI[‘O Jancone] 6: ‘A scuadra cuana arfuzzaje (vinse), ma nun dètte certezze soprattutto arreto. Sinamparco ‘a railla (partenza) fove pusitiva pure si ‘e suoje sufferetteno assaje ‘a zureja d’’a Fiorentina.
Arb. MASSA 5 Siscaje a vienetenne sempe ‘ndanno d’’o Ciuccio soprattutto durante ô primmo ajone apprecanno ‘o revulamento a uocchie nchiuse però si ‘a facenna era a ffavore d’’e lucale! È overo ca ce dètte ‘nu ricore ca chilli scieme ‘e Sky dicetteno ca nun ce steva, ma lla fove custretto a ffarelo pecché a cchille d’‘a Var(ra) accussí era paruto. Pircò niscuno presiento!
E fermammoce cca cuntente ‘e cumme jette e soprattutto d’avé mantenuto ‘o passo d’’a vecchia zoccola. Mo ‘o Napule torna a gghiucà p’’o campiunato dummeneca ca vene,e ggià à dda jí a Tturino a vvedersela cu ‘a zoccola janca e nnera e ppirciò si dDi’ vo’ ce sentimmo p’’e doje ‘e settembre e spero ca ve pozzo cuntà ca ‘o Napule si nun à vinciuto n’ata vota allimmeno nun s’è fatta mazzià, sempe speranno ca ‘a chenca ‘e ll’arbitre nce lassano fà ‘o spezziale! Nun me voglio sbaglià. Staveti bbe’.
