‘Nu gramo punticiello

Che fetenzia guagliú, stongo avveluto pe cchello ca ce  facetteno vedé ajeressera ô san Paolo addó ‘o Ciuccio nun fove cacchio ‘e vattere ‘o Ggenoa cu ttutto ca se jucaje dô prazzo (fine) unnece contro a ddiece pe bbia ca chillu scarparo ‘e Sturaro se facette jettà fora doppo ‘na trasuta da craparo, cu ‘o piere a mmartiello, ‘ncopp’â zampa d’’o ‘Ncrifato dê spalle! Vuje capite?  E nnun me venite a ddicere ca ‘e jucature nuoste steveno ggià cu ‘a capa a ggioverí p’’a tarra (sfida)cu ll’Arzenale pecché pure tenenno ‘a capa a n’atu pizzo, ‘na scuatra ca joca ‘ncasa cu n’ommo ‘e cchiú pe cchiú ‘e n’ora contro a ‘na meza cazetta d’avverzario capace sî e nno ‘e piazzà ‘nu pulmanno ô lemmeto d’’a muntaca (area di rigore)… à dda mettere ‘e mmane pure dint’â custodia, ma à dd’ affurzà… nun po’ pperdere dduje punte ‘ncasa! ‘Mmece chi t’’o ddà? E chi, cumme a nnujaute ‘ntribbuna-divano,  se fósse  aspettato  ‘nu  Napule muscicco (brillante) e ppronto a ffance scurdà ‘a fijurella marrò fatta a Empoli, rummanette chebbammello(deluso) datose ca ‘e nuoste nun riuscetteno  a mmetterese dint’â sacca ca ‘nu gramo punticiello, chillo ‘e ‘nu russimmo (pareggio) scartellato Troppo poco! Nun ve pare?

Passammo ê ppaggelle:

KARNEZIS [‘O Creco]:7 E s’’o mmeretaje tutto pecché  Facette tre granni tacculle (interventi) guadagnannose  ‘a pagnotta  e scanzannoce dô periculo ‘e abbuscà, ma nun ce putette fà niente ‘ncopp’â catara  (diagonale) vulante ‘e Lazovic(cio) lassato sulo da Ghoulam(me) 

HYSAJ[Meza Cucchiara]:6 Tutto summato ajere nun facette grossi fessarie, ma s’à dda levà ‘o vizzio ‘e passà sempe ‘a pallo areto! [Da ll’87’  OUNAS:5 ‘Nu zifo (voto mancante pecché facette overamente poco, ma trasette pure troppo, troppo tarde!]

MAKSIMOVIC:5,5 Miezu zifo (voto) mancante pecché pure si fove sempe lèuto (pulito)tacatammanno (anticipando), nun lle riuscette ‘e ‘mpedí a Ppandev(ve) ‘e mettere chella ggioja ‘e palla pe Llazovic(cio) ca futtette ô Creco.

KOULIBALY[‘O Ggialante]:6,5 Ô ssolito sempe tuosto pusitivo e zzincatejo (incisivo) arreto se facette vedé pure annate e ppe ‘nu niente sfresaje (sfiorò) ll’addaffa (rete).

GHOULAM: 5  Me dispiace mas ll’aggi’’a mettere ‘nu zifo (voto) mancante pecché nunn’ è ancòra  isso e sse vedette: quanno ‘mpurraje (accompagnò) ll’azziona ‘ncopp’â ferza mancina, ‘o ffacette senza zuco sbaglianno cchiú ‘u jabbro (cross) e ppiezzo e ppejo facette arreto purtannose ‘ncopp’â cuscienza ll’addaffa (rete) ‘e Lazovic(cio), lassato sulo pe gghí cercanno accunte ‘ngiro senza guardà nè ppalla, nè avverzario ‘ncopp’ a cchella palla a zzuco ‘ecaramella ‘ePandev(ve). E cche saciccio!

[Dô76’ MARIO RUI 6: Trasette bbuono  ‘ncampo e ghiette assaje meglio d’’o culleca,  facennoce sperà p’’o sibbacco  (match) cu ll’Arzenale ‘e gioverí ca vene.]

CALLEJON[Peppe ‘a ‘nguenta] 5,5: Miezu zifo (voto) mancante pecché si facette, senza sbaglià pasiglie (passaggi)  curte e ppricisi, quanno  ô 43’ lle capitaje ‘na palla d’oro da fravecà ‘mporta, ‘a sbagliaje e dduje minute doppo ‘e Crifune russimajeno (pareggiarono)!

ALLAN[‘O ‘Ncrifato] 5,5: Miezu zifo (voto) mancante pecché me fósse aspettato ‘e cchiú dô bbrasiliano, ca fove sí ‘o solitu luttatore, ma annante se vedette poco e nniente.

[Dô 67’INSIGNE,6: Facette chello ca putette i ‘o purtiere d’’e crifune cacciaje ‘a scienza fermannole ‘na bbona cunchiusione.]

FABIAN RUIZ[Anema Longa]6: Durante ô primmo ajone (tempo)passaje, periculosamente, pe nnuje, ‘na palla arreto, ma passanno ‘o tiempo migliuraje.   

ZIELINSKI5,5:Me dispiace ma ll’attocca miezu zifo (voto) mancante pe bbia ca nun facette ato ca fà passà ‘a palla ‘nfra ‘e llinie. Êsse avut’’a fà ‘e cchiú!

MERTENS[Ciruzzo] 7: E ss’’o mmereta tutto visto ca ‘ncamma (in zona) d’attacco fove sempe presente e ô 34’ ssignaje ‘nu bbellu stuco (gol)! 

MILIK [Sant’Arcadio]6 : Cumme avette tanto ‘e spazzio a ddispusizzione ce pruvaje specie ‘e capa, ma ‘o purtiere d’’e Crifune fove ‘nserata ‘e miracule. Peccato!

all. ANCELOTTI[‘O JANCONE]:5 Tanto ll’aggi’’a mettere pecché mannaje ‘ncampo ‘nu  Ghoulam(me) nun n’ancòra pronto e ca nun se putette vedé, nè se ‘mmentaje coccosa pe ffance affurzà (vincere) ‘na mubbara (partita) ca s’êsse avuto a fforza affurzà (vincere) presentanno ‘na scuatra appena appena asiffa (discreta), ca – pe gghionta ‘e ruotelo nun ce stette cu ‘a capa!   

arb. Pasqua  5  Scadente. Grossi fetenzie nun ce ne facette, ma siscaje a bbienetenne dànno ‘a ‘mpressione ‘e passià p’’o campo senza sapé che ce facesse lla ‘mmiezo e ppecché se truvasse lla, tant’è overo ca pe ghiettà fora a cchillu chianchiere ‘e Sturaro êtte aspettà ca ce ‘o ddicesseno chille d’’a varra… ca lle cunzola ‘a zia monaca! 

A ‘stu punto, sempe speranno ca (nun facenno ati fessarie [cumme a cchelle d’ajere e dd’’a semmana passata…]) ‘ncampiunato riuscimmo a mmantenere ‘o siconno posto ‘ncrassifica, ‘nvista d’’e duje sibbacche (match) ‘e Cuppetta airupea cu ll’Arzenale  ô Napule nicessita ‘e ‘na bbona serenga ‘e coccosa ca ll’acconcia ‘e ccerevelle facennolo cagnà passo!

E bbasta accussí, fermammoce cca. Certo ce fósse piaciuto ‘e vencere senza piglià ll’addaffa (rete)d’’o russimmo o ô mmacare facennone quacche ata ma jette cumme jette e ddamoce n’atu pizzeco ‘ncopp’â panza  e gghiammo annante.

Ve saluto e ssi a dDio piace ce sentimmo viernarí doppo d’’o scontro ‘e cuppetta airupea cu ll’Arzenale â casa lloro sempe speranno ca ve pozzo cuntà ca allimmeno  nunn’ avimmo  fatto ‘na bbrutta fijura. Staveti bbe’!