Bravo a Mazzarri, sape guvernà ‘e situazzione

Guagliù, ‘a partita d’ajere a Bari s’êva ‘a vencere assolutamente, pe dduje bbuoni mutive:Uno, tené ‘o passo d’’a Roma ca oramaje lle rialano ttre ppunte â vota – Ddoje, levarce ‘a cuollo ‘a jastemma ‘e chella maglia bblu-savoia ca ‘ngenere porta ‘na jella nera!E pe grazzia ‘e dDio ce jette a cciammiello e cu ‘nu gollo pe ttiempo risulvettemo ‘a facenna piazzannoce sulo sule ô siconno posto a cquatto punte dô Milanno ca ajere a ttarde arricettaje pe ddoje a zzero ‘o Cesena. Passammo ê ppaggelle.

DE SANCTIS S.V.: Ajere comme ajere s’êsse pure pututo stà â casa. Maje chiammato seriamente ‘ncausa ‘a ll’attaccante d’ ‘o Bbari facette ‘o stesso ‘na bbona fijura chelli ppochi vvote ca avette ‘a spurcarse ‘e guante!
CAMPAGNARO 6,5: Fuje ‘o pantanguanguero majateco (il gran comandante) d’ ‘a zzona soja e annullaje a chiunque lle capitaje a ttiro.
CANNAVARO: 5,5 –Pigliaje ‘nu paro ‘e zzarre, ma pe ffurtuna puttanate grosse nun ne facette…
ARONICA 6: Partita attienta e pricisa senza vaviature (sbavature), controllaje a luntano, ‘nzieme a Zunica,e mettette ‘a musarola a Alvarezzo ca inutilmente arrutaje ‘e diente.
MAGGIO 6 +: êsse pututo fà coccosa ‘e cchiú quanno se trattaje ‘e smèstere (di spingere), ma quanno se trattaje ‘e difennere niente ‘a dicere! Accuntentammoce!
GARGANO 4,5: Nun me dicite niente, ma ll’aggiu miso poco pecché nun sulo ô ssolito facette ‘na partita cu troppi, troppi sbaglie ‘e mesura quanno passaje ‘o pallone, ma soprattutto pe mutive ‘e desceprina (motivi disciplinari.): overamente nun se po’ ggiustificà chella allebbreca ciamprosca (reazione sguaiata)avuta dô guaglione contro a Mazzarri, quanno chisto ( giustamente dich’i’) ‘o sostituette cu Sosa; pe furtuna ( giustamente dich’i’) Mazzarri ô facette ‘na cazziata e lle dicette ‘e starse zitto!
( dô37° st SOSA S.V.: Trasette justo judto pe guderse ‘a vittoria ‘nziem’ê cumpagne.)
PAZIENZA 6+: È overo ca sbagliaje quacche passaggio, ma ricuperaje ‘nu tummolo ‘e pallune! Qualche passaggio sbagliato, ma quanti palloni recuperaje. Sustanziale, fundamentale. Ch’aspettano a rinnuvarle ‘o cuntratto?
ZUNIGA 6-: Ll’aggiu sempe ditto ca farlo jucà ‘ncopp’â mancina è ‘na jastemma; ‘o ggiuvinotto soffre troppo dinto a cchella zzona ‘e campo ca nun ll’ appartene. Però ajere se facette cumunque apprezzà p’ ‘o senzo ‘e duvere danno sempe ‘na mana quanno e addó servesse.
HAMSIK 5,5: Ca nun fosse ‘a jurnata soja se vedette quase subbeto e forze Mazzarri ll’êsse ‘a avuto ‘a cagnà dâ mmità d’ ‘o primmo tempo quanno ‘o guaglione cu ‘a scusa ‘e se sacrificà p’ ‘a squatra se jette annascunnenno e nun se facette praticamente vedé!
(dô18° st YEBDA 6,5: Addiventaje subbeto ‘o punto ‘e riferimento d’ ‘a manovra a ccentrocampo. Fósse trasuto primma!)
LAVEZZI 8: ‘A fora d’ ‘o gollo, bellissimo, ‘o guaglione assicuraje spisso spisso ‘a superiorità nummereca cu ciento e uno dribblinghe e scatte: campísemo (incubo) custante pe Belmonte e cumpagne.
(Dô 43’st DUMITRU sv)
CAVANI 6+: Nun se vedette assaje a ll’attacco, ma ‘a fora d’ ‘o gollo (ca cumunque m’aspettavo e ce vuleva, visto ca Di Natale cuntinua a menarle dinto…) se sfelettiaje paricchio (sgobbò tantissimo) senza palla p’ ‘a squatra facennose nutà pure ‘ndifesa.
All. MAZZARRI 6.5:. ‘O Napule suĵo ajere dimustraje ‘e sapé guvernà ‘e situazzione facenno ‘e pprove ‘a granna squatra. Miezu punto ‘e cchiú p’avé cazziato a Gargano!
arbitro MAZZOLENI 4,5 ‘Na meza cazetta comme a ttutte ‘e culleghe suoje capitati ‘ncopp’â strata d’’o Napule. Chi sa’ addó piscaje ‘o recolamento d’ ‘o pallone ca prevedesse ca ‘a squatra ‘e casa, specie si pruvinciale – contro a ‘na squatra cchiú blasunata – à dda avé cchiú sische a ffavore. Divertente pure ‘o fatto ca uno d’ ‘e difenzure puglisi, avette dô sischetto bergamasco ‘na specie ‘e licenzia ‘e 007: guvetate e cauciune libberamente e a isso st’arbitro lle cunzentette ‘e stennere a Lavezzi senza siscà nè punizzione, nè ricore e senza menarlo fora: ‘o difenzore era ll’urdemo ommo (?) Ah, ‘o difenzore non fuje neanche ammunito. Pe carità: magari po ll’arbitro ll’avesse cundiziunato ‘o riesto d’ ‘a partita… Tutto,naturalmente, perfettamente ‘mbonafede. Ma nisciuno me leva ‘a capo ca (essenno bergamasco) ‘stu Mazzoleni è tifoso atalantino e juventino! È certamente (pure si ll’amico mio Federico dice ca no) n’arbitro scarzo. Forze pure ‘mperfetta… bonafede.Comunque ‘o Napule ll’à fatto rusecà a isso e â juventussa ‘nfaccia a ‘stu guveto!!!!
Si me passa ‘o catarro ce sentimmo ggiovedí e si no, cu ‘ajuto ‘e dDio, llunnerí ca vène!
R. Bracale Brak

ilnapolista © riproduzione riservata