‘Sta squatra accussí malamente nun ‘a veco

Guagliú, p’ ‘e juorne passate quacche bbuono amico me diceva: Càlmate Rafè, ‘e cunte se fanno sott’ô lampione… Beh! Mo simmo arrivate sott’ô lampione… e tiranno ‘e ssomme veco ca se vennute Cigarini,Datolo, Bogliacino, (ggente cu ‘e piede bbuone); Quagliarella e Rinaudo addirittura so’ gghiute â juventús, e tutto chesto pe ppiglià ggente ca p’ ‘o mumento nun è nisciuno… Parlanno ‘e chilli vennute:uno (Cigarini) è stato sùbbeto chiammato dint’ â nazzionale e dduje so’ gghiute â juventús, ca si à pigliato ‘o pacco cu Quagliarella, pigliannose a Rinaudo e lassannoce a Culo-‘e-chiummo-cannavaro ce ll’à miso a cchillu servizzio senza vasellina!
Mo parlammo ‘e ll’affare ca âmmo fatto cu ‘o mercato a ppiglià:Yebda è ‘nu mediano d’attacco ‘mpiegato ‘nFrancia come primmo attaccante ‘e centrocampo e nun è ccerto chillo ca po’ sostituí a Pazienza… Sosa nun tène ‘nu ruolo: è uno che po’ trasí sulo pe cercà ‘o colpo vincente. Ato ca vice Marekiaro! Guagliú,pure i’ so’ nnato e crisciuto bastantamente sott’ô Vesuvio e forze pe cchesto me volle ‘o sanco vedenno ‘a campagna ‘e mantenimento d’ ‘o Napulo e ‘o mercato ‘e ll’ati squatre(soprattutto d’‘a juventús ca s’è accattato ‘nu tummulo ‘e ggente e nun ce à fatta a se piglià pure a Borriello forze pecché ‘o guaglione à capito ca nun se puteva pure isso jí a ‘nchiaccà e allurdarse cu ‘a maglietta janca e nnera!…); si po penzo a tutte ‘e ccose che Dela ce fa pavà me ‘ncazzo malamente… Epperò doppo tutto chesto ch’è sacrosanto, me attocca ‘e dicere ca ll’attaccamente p’ ‘o Ciuccio napulitano à dda valè a prescindere dê jucature accattate o vennute e da ‘nu presidente ca quase certamente penza sulo ê cazze suje.
E cercanno ‘e raggiunà senza fà ‘e tifuse v’aggi’ ‘a dicere ca cumunque i’ ‘sta squatra accussí malamente nun ‘a veco: ‘e Sosa, i tecnici d’ ‘o pallone, nun sulo ne parlano bbuono , ma diceno addirittura ca Nnapule po’ addeventà ‘nu fuoriclasse: sperammo ca ànno raggione lloro e nno i’ ca nun ‘o veco comme vice-Marekiaro; Yebda m’’o ricordo dduje anni fa ca correva e mmazzuliava a mmeglio a mmeglio comme a ‘nu pazzo ‘mmiez’ô campo, ma si se dà ‘na calmata po’ essere ‘nu mediano ca difenne e cuntrattacca; Cavani sinceramente nun me credevo ca se fosse ‘nzerito súbbeto accussí bbuono dint’ê schemi ‘e Mazzarri; Lucarelli, si ‘a guallera e ‘e calle rejono, cu ll’esperienza ca tene, forze dint’ ê minuti finale ce risulvarà quacche partita, e ppo ce sta ggiovane Dimitru ca si Mazzarri tenarrà ‘o curaggio ‘e farlo jucà tene bboni pussibilità ‘e fà vedè chello ca vale pe forza, velocità e putenza! È overo ca avimmo perduto a Quagliarella ma è ppure overo ca Quaglia ll’anno ch’è ppassato è stato decisivo sulo dinto a ppochi partite, mentre dinto a tant’ate è stato sí decisivo, ma negativamente e tutto summato penzo ca ce âmmo dato ‘o pacco â juventús. Resta, è overo ‘o prubblema ‘e Culo-‘e-chiummo-cannavaro e spero ca Cribari ‘na vota piazzatosi a ccentro d’ ‘a difesa, nun ‘o farrà maje cchiú tuccà ‘o pallone, e Mazzarri se cunviciarrà a mmannarlo a pulezzà ‘e ciesse d’ ‘o San Paolo… in maniera definitiva, tanto ‘ncaso d’infortunio ‘e Cribari ce sta sempe Aronica! Allora dico, sí pigliammuncella cu Dela ca ce fa pavà pure si ce sciusciammo ‘o naso, ma stammo vicino a ‘sti guagliune ca pe mme se ll’ammeretano ‘nu poco ‘e fiducia! Brak

ilnapolista © riproduzione riservata