Ma ce avite fatto caso? ‘O Napule l’anno ca è turnato in Europa dâ porta principale, sta facenno ‘nu mercato a ccosto zero! Cose ‘e pazze!!! E me spieco:
‘A primma rata ‘e Cavani è stata pavata cu ‘e sorde d’ ‘e vvarie cessioni fino a mmo fatte; Lucarelli è arrivato a ccosto zero; Sosa sarrà ‘ngaggiato cu ‘e sorde avute pe Denísso, Yebda, si venarrà (e ‘o vvoglio proprio vedé), venarrà a ccosto zero;’ndifesa (addó tenimmo ‘o guajo gruosso ‘e P. Cannavaro,e avessem’ ‘a risolvere subbéto ‘a situazzione…) avesse ‘a arrivà ‘nu difenzore meza cazetta a ccosto vascio assaje e si no niente ‘a fà!…..
Mi spiegate vuje addó vanno a ferní ‘e 50 meliune e cchiú d’ ‘e diritti TV, ‘e sorde d’’e sponsorre, chille ‘e ll’incasse, chille ca ce spremme ‘a pay per view,ecc…A cunte fatte ‘o Napule prubbabilmente chist’anno â fine fattura minimo, minimo 120 meliune d’evere e pirciò senza ‘nvestimenti p’ ‘o mercato, dint’â culonna ‘e ll’uscite ce stanno sulo ll’ingagge e ‘e spese varie: ‘e ttazze ‘e cafè, ‘e curnette, ‘e cappuccine ‘e sicarrette ‘e franchebbolle.. Tutto chesto che significa? Significa ca a ffine staggione ‘o signurino Dela se mette dint’â sacca minimo minimo 80 meliune d’evere!!! ‘Nzomma ‘o signurino Dela cuntinua a pigliarce pe ffesse! Quanno sta ‘ndifficultà tira fora ‘a parola fallimento pe farce fottere ‘e paura e farce stà cuïete cuïete !!! Chisto se penza overo ca nuje simmo tutte cretine, ma nun à capito ca oramaje s’ è gghiucato tutte ‘e ccarte, e mmo nun ‘o credimmo cchiú! Mo..cacciasse ‘e sorde e ‘e spennesse p’ ‘o Napule e nno pe ffà ‘e panettune a Natale!!! Ce accattasse a Barzagli o a n’atu bbuono centrale ggiovane e capace! ‘O signurino Dela fa sulo avvedé (pe farce fesse) ca è tifoso d’ ‘o Napule, mentre ‘mmece è tifoso d’ ‘a Roma e gode sulamente quanno vede ‘e ppaparelle e se ne strafotte d’ ‘o pallone napulitano!
Maje avesse suspettato ca quaccuno me facesse vení ‘a nustalgia ‘e Fiore e Ferlaino! Pure chesto êvo ‘a vedé!
Brak