‘O ssaccio ca mo quaccuno diciarrà ca i’ so’ ppazzo e nun so’ maje cuntento, ma i’ spero che dduje o tre sarranno d’accordo cu mme quanno dico ca ‘a società e quacche pennarulo cumpiacente (chi sa’ po pecché…) stanno cercanno ‘e farce credere ca ‘sta campagna acquiste e vennete d’ ‘o Napule è stata sino a mmo eccezziunale overamente!…..Cheste so’ ccose ‘e pazze! Uno acquisto (Cavani), pavato ‘o ddoppio ‘e chello ca vale, acievero, ‘ncustante, duppione ‘e Quaglia e de Lavezzi….N’ato arrivo prummiso o minacciato (Lucarelli), viecchio,gravante, cu ‘a guallera, ‘e calle e ll’enfisema polmonare…ô posto ‘e ‘nu guaglione (Denis) chino ‘e forza salute e vuluntà. Paricchie ‘e jucature cedute (Datolo, Bogliacino, Contini, Rullo) quaccuno vennuto (Cigarini) ma no chille ca s’avessero avuto ‘a vennere (Blasi, Zalayeta, Cannavaro) . Ceduti jucature ‘e qualità (Cigarini) pe rrestà a ghiucà cu Blasi. Diciteme addó po’ arrivà ‘na squatra ca tra ‘e centrocampisti tene sulo Blasi, Amodio, Dalla Bona, Gargano. Ce starrà maje quaccuno capace ‘e fà ‘nu passaggio decente ‘e vinte metri? Tiranno ‘e ssomme: stanno cedenno ‘e jucature meno scarze e se stanno tenenno ‘e zappature a centrocampo, accattano ‘e duppiune in attacco, nun rinforzano ‘a difesa……ma comme se fa a dicere o parlà ‘e champions?
Si fernesce accussí ‘a campagna acquisti e vennete, fort’é si ce salvammo! FACIMMO CORNA!
Brak
