ilNapolista

Su Paolo bravo presidè
Udine e Genoa poco serie

Si ce sta ‘na cosa ca nun me piace  d’ ‘o presidente  De Laurentiis,songo cierte ssoje asciute a ppaparelle (esternazioni), ‘nu  poco esaggerate! Ma ‘ncopp’ô fatto ‘e  P. Cannavaro tene mille vote raggione. Dopo chello ca <em>Culo ‘e chiummo </em> à cumbinato, dopo tutte ‘e partite che ce à  arruvinato praticamente ‘a sulo, st’avventuriero ciràulo (mercenario) jesse truvanno  pure ‘nu contratto luongo e miliunario! Ma allora è ‘nu vizzio ‘e famiglia! Se penza ca ce simmo scurdato chello ca facette ‘o frato Fabbio cu ‘a Juventús  e che ccosa sta facenno ancòra mo? E stammo parlanno, pe Pauluccio, ‘e ‘nu  napulitano ca dice d’essere (a chiacchiere!)attaccato â maglia napulitana!!! Si se ne va (e ‘o facesse ca mme fa ‘nu favore!), male ca va, ne putimmo truvà  n’ato scadente comme a isso (pure si è difficile!), ma ca allimmeno nun scassarrà ‘o pasticciotto   pe purtà  ‘a maglia d’ ‘o Napule .’O frato Fabbio, allimmeno,  primma ‘e addeventà ‘na scarpa vecchia,  è stato ‘nu campione! Isso,quacche partita bunarella, ll’à jucata  in serie B!!! Bravo Presidè, applause!

Cundivido  ‘npieno ‘e  parole voste ,e si pe ccaso Pauluccio volesse jí a Dubbaje a gghiucà cu ‘e bbeduine ‘mmiez’â rena d’ ‘o deserto e vuje nun tenisseve disponibbilità, e avisseve bisogno…, faccio ‘nu mutuo  ‘e ‘o pòzzo fà accumpagnà i’ a spese  meje! Sentite a mme Presidè, cacciatene a Pauluccio e …dammo ‘a fascia ‘e capitano  a Grava o a  Quagliarella,che attualmente so’  ll’unice quase napulitane ca  veramente so’ ddegne d’ ‘a purtà!…E chisto è ‘o cunto a gghí!

Mo però aggi’ ‘a dicere ô signurino Dela ca ce sta ‘na cosa ca proprio nun capisco e ‘a vulesse essere spiecata:  Mazzarri vo’ a n’ommo ‘e  fiducia dint’ô spogliatoio (Lucarelli, 34 anne!) Ma pe  ffà che?Simmo sicure ca Lucarelli sape fà ‘o ccafè o scupà ‘nterra?

Mazzarri  ne fa jí Datolo, Cigarini Bogliacino, gente cioè  cu ‘e  piedi buone e vo’ jucà cu ‘e  varie Blasi(!!), Pazienza, Gargano,sí e nno  buone a correre e a ffà muro, ma tutte cu ‘e piede fucilate. M’a ddimanno: Presidè, ma Mazzarri quali idee tène p’ ‘o centrocampo? ‘A difesa po’ cu Santacroce eternamente rutto, cu Cannavaro ca rompe ‘o pasticciotto e fa puttanate nun po’ assicurarce  ll’alta classifica! Allimmeno nun avisseve mannato a Contini!…Ma siccomme ll’avite fatto, mo avite correre ê ripare: mannatene a Cannavaro e pigliate a Bocchetti e Kolarov o Britos.E soprattutto nun ne mannate pure a Rinaudo e p’ ‘o centrocampo nun ne mannate pure  Cigarini , e pigliate finalmente a  Inler, e a  Zuculini si no addó jammo? A Muntevergene o â Madonna ‘e ll’Arco?! Presidè, cunvincite po Mazzarri a ffà jucà ‘e guagliune comme a Ciano e quacche ato! E pe ferní Presidè dammoce  ‘na regolata e nun facciamo ‘e ccose a mità! S’ànno ‘a taglià ‘e ponte cu Pozzo, Prezioni e ati suocce  poco serie e s’ànn’ ‘a jí a spennere a ati puteche (esclusa ‘a juventús!)

Presidè, NUJE SIMMO ‘O NAPULE, nun v’ ‘o scurdate!!

Brak

ilnapolista © riproduzione riservata