Scucciate d’essere purtate p’ ‘e viche

Caro Tire e ttore e caro presidente, pe favore schijammo ‘e ccarte ‘nterra e parlammo chiaro: a comme se vede e a ccomme stanno ‘e ccose nfino a mmo ‘o Napule è stato fermo e ‘nchiummato pejo d’ ‘o culo ‘e Paolo Cannavaro… Niente niente nce mancassero ‘e sorde? Ma ‘e  guaragne cu ‘o merchandasing (se scrive accussí?? O no?) addó stanno, o che fine ànnu fatto??  E nun se tratta ‘e cicere e semmente: stammo parlanno ‘e meliune d’èvere (euro). E a proposito, i’ penzo ca cedere a  Denísso  è  stata ‘na granna fessaria!
Nun riesco assolutamente a capí comme se po’  boccià ‘nu jucatore ggiovane  ‘e 26 anne ca all’età ssoja   in Argentina êva signato ‘nu tummolo ‘e golle ;…vene a Nnapule ch’è ‘na  chiazza difficilissima assaje ..sia pe vvia d’ ‘e tifuse ca nun se cuntentano maje,  sia p’ ‘a mancanza ‘e pruffessionalità ‘e jurizio d’ ‘e pennarule  critici ca soffrono d’antipatie e simpatie, e vvène struncato pecché nun à maje avuto ‘a fiducia d’ ‘o  tecnico ‘e turno  (e spisso spisso avette metterse ‘ncuncurrenza cu chillu matarazzo allurdato e ‘mbuttunato ‘e ziccule: Zalayeta, chill’ex-juventino  ca so’ tre anne e nun riuscimmo a levarcelo definitivamente  ‘a tuorno!)  o d’ ‘a  diriggenza tranne Marino naturalmente…e ‘o povero Denísso  tutto summato à jucato pochissimo e sempe senza tranquillità… e cu tutto chesto tra ‘na cosa e n’ata  à signato 15 golle senza ricore..dimustranno attaccamento â maglia napulitana! E vvuje caro Tire e ttore e caro presidente v’ ‘o jate a vvennere e ppo all’Udinese: ‘na cuncurrente? E pe ve  piglià a cchi? P’accattà  o Acquafresca (ca fosse ‘o mmacare n’acqua ‘e senza o n’acqua ‘e mmummera o allimmeno ‘na cassosa…, ma è sulo acquafresca) o pe piglià a  Lucarelli (ca è vviecchio, gravante e cu ‘a mazza arreto p’ ‘o rejere allerta…) Caro Tire e ttore e caro presidente nun me pare ‘nu grann’affare!…Quale fosse po ‘a ponta ‘a 20 golle ca ‘o signurinopresidente ce à  prummiso? Ma addó sta??? ‘Stu Freddo arriva o nun arriva?Pure si a mme me piacesse Klose!!!
Cca tra poco se parte e nun se vede ‘e movere fronna…cu ‘e tante prubbleme ca ce stanno:1)Cannavaro in difesa ca è mmeglio si vene sostituito ‘a Bocchetti e mmannato a gghiucà cu ‘o frato ‘mmiezo ê beduine d’ ‘o deserto…
2)mancano dduje centrocampiste e uno à dda essere pe fforza Inler!
3) Ce avimm’ ‘a libberà definitivamente ‘e Blasi e Zalayeta ca so’ dduje allurdate ex-juventini  e ca pirciò  nun so’ ddegne ‘e tené ‘ncuollo ‘a maglia d’ ‘o Napule: ‘a ‘nguacchiano e ‘a cammarejano(<em>contaminano</em>)!).
Caro presidente fosse bbuono po  ca ‘a fernisseve ‘e dicere puttanate:  1)“Pazzini deve decidere lui !!!”
Addó, che ccosa e cquanno???
2) “Napoli x Toni sarà come una mamma”!!!
E menu male ca Toni ‘a mamma soja ll’à truvata a n’ata parte e nno cca…
Basta caro Tire e ttore e caro presidente!!!! Basta!!! Nuje aute  tifuse ce simmo scucciate d’essere purtate p’ ‘e viche! ‘Stu Freddo arriva o nun arriva? E Zuculini e Inler? Vulimmo sapé ‘a verità: Presidé ma vuje ce tenite overamente  ô Napule, oppure ‘sta situazzione ve serve sulo pe ffarve  ancòra cchiú pubblicità p’ ‘o cinematocrafo? Caro Tire e ttore e caro presidente onestamente a chistu   mumento ce sta  n’espressione ca  calza a penniello CCA NIUSCIUNO È  FESSO !!!!!!!

Brak

ilnapolista © riproduzione riservata