Songo ‘e quatto e vvinto (doppo miezujuorno) ‘e lunnerí 19 ‘e luglio 2010; ‘ncopp’ a Internetto, sto’ facenno spingule spingule tutt’ ‘e site ‘e pallone e d’ ‘a famosa prumessa ‘e De Laurentiis nisciuno ne sape niente… P’ ‘o mumento stammo ancòra ferme a Cavani. E parlammo chiaro: ll’arrivo ‘e Cavani ô Napule nun rappresenta certamente ‘nu zumpo ‘e qualità e Cavani nun è certamente chella prima ponta ca tutte s’aspettavano e ca tutte se sunnavano! Se fosse trattato ‘e Diego Forlàn (ca ‘mmece pare ca – manco a ddirlo – s’ ‘o piglia ‘a juventús), ‘a cosa era diverza, ma se tratta ‘e Cavani…ch’è ‘na meza ponta e addizziunanno tre meze ponte (Lavezzi Cavani e Quagliarella)nun se fa ‘na ponta e mmeza, ma manco ‘na ponta! Certo chello ca Cavani à fatto vedé sia a Palermo ca cu ‘a Nazziunale nun è proprio ‘a jettà dint’ ô cesso, ma nun è mmanco ‘a ‘ncurnicià pe ffarlo guardà ê figlie nuoste! Senza scurdarce po canun sta scritto a nisciuna parte ca Cavani è mmeglio ‘e Denísso, e i’ ….so’ sicuro ca si ‘o Tanque –tutt’ ‘e vvote ca à jucato – fosse stato servuto comme si deve….e nno cu ‘e soliti crosse abburtite…( Maggio e Campagnaro a pparte)…. avesse truvato cchiú spisso ‘a via d’ ‘o golle ….e so’ ssicuro ca a Udine farrà bbella fijura e ce ‘o chiagnarrimmo a tanto ‘e lacreme. Me ripeto: …Cavani non è malamente….ma non facitece credere ca è ‘na primma ponta ca po’ fà sfracielle!E soprattutto, primma ca se fa notte cacciate ‘a surpresa! A mmeno che nun se tratta ‘e ‘nu pesce ‘aprile ‘e contratiempo!
R.Bracale
