Sto’ ancòra cu ‘o vveleno ‘mpont’ô musso e ancòra me chiagne ‘o core a penzà ca ê Mundiale africane so’ gghiute ‘nnanze ll’Olanda e ‘a Ccermania mentre Argentina e Bbrasile ne so’ state cacciate! Eppure cu tutto chesto voglio truvà ‘e pparole cchiú accunculelle pe ffà ll’augurie a Massimiliano nuosto e pe ringrazziarlo assaje assaje ‘e avé purtato annante ll’idea furmidabbile ‘e fà ‘stu ggiurnale/ sito pe ddà voce a tutt’ ‘e napulitane e â ggente napulitana ca (‘ncopp’ a ll’ati ggiurnale) ponno sulo lèggere chello ca scrivono ‘e ggiurnaliste patentate, ma nun tenono ‘o canzo ‘e fa sèntere ‘a vocia lloro. ‘Ncopp’ô ggiurnale/sito cultivato ‘a Massimiliano nuosto, ‘mmece tutte quante:ciucce e allitterate, (ca tutte tenono ‘o deritto ‘e dicere comme ‘a penzano) ponno fà sèntere tutto chello ca vonno,ditto però cu rispetto crianza e pulezzia.Se senteva ‘a mancanza ‘e ‘na cosa accussí addó abbasta essere perzone cu ‘nu core tanto,tifuse appassiunate, e essere annammurate, ‘a vicino o ‘a luntano, ‘e ‘na città comme a Nnapule ca pe quaccuno è mmamma, pe quacche ato matreja, ma è ‘a passione ‘e ttutte quante, e gguaje a cchi nce ‘a tocca! Bravo Massimilià che bbell’idea! Oh Ddio quacche asciuta pulitica a ppaparelle (comme a cchella ‘e te mettere dâ parte ‘e ‘nu bleffo comme a Saviano) ‘a tiéne pure tu, ma te se po’ perdunà, pecché nce miette sempe tanta passione e chesto è fundamentale! Auguri Massimilià, auguri! E sempe FORZA NAPOLI! CIUCCIO FA’ TU!
Raffaele Brak
