Cu tutt’ ‘o rispetto p’ ‘o prufessore Trombetti, ma chello ca à scritto (ca cioè Sivori è stato ‘o meglio jucatore ca à tenuto ‘o Napule…) nun me trova d’accordo pe nniente! E me spieco.
Pe mme nun se po’ dicere ‘na cosa ‘e chesta! Sivori è stato ‘o meglio? E allora a Maradona addó ‘o vulimmo mettere?…
Pe sapé: ma Sivori ô Napule che ll’à fatto vencere?
E ppo ‘o prufessore s’è scurdato ddoje cose ‘mpurtante assaje.
Mazzeca e uno: quanno Sivori venette a Nnapule ‘o pallone se jucava a ddoje, tre all’ora, ‘e difensore nun erano ancòra chilli figlie ‘e ‘ndrocchia d’ ‘e tiempe ‘e Maradona quanno ‘o pallone se jucava, comme a mmo, a ciento all’ora e Diego Armando faceva tutto currenno comme a ‘nu treno, scanzanno cauce e mazzate e nno passianno comme faceva Sivori…ca se puteva permettere ‘o lusso ‘e fa ‘o nnacchennello chianu chiano senza ca nisciuno ‘o guardasse manco stuorto!
Mazzeca e ddoje ca po è ‘a cchiú ‘mpurtante: qualunque jucatore fosse ‘o cchiú mmeglio d’ ‘o munno quanno à purtato ‘ncuollo (fosse pure pe n’anno, pe dduje mise o ‘na partita sola ) ‘a maglietta janca e nnera d’ ‘a juventús, ne rummane ‘nchiaccato, allurdato pe tutt’ ‘a vita e nun è ddegno ‘e se mettere ‘a maglietta d’ ‘o Napule… e si s’ ‘a mette ‘a po’ sulo ‘nfettà ‘e lebbra e comunque nun sarrà maje ‘o meglio nè d’ ‘o Napule, nè ‘e niente! E chesto vale pure ô ccuntrario pe tutt’ ‘e traditure (Zoff, Ferrara, F. Cannavaro e chiunche ato ca nun m’arricordo) ca avenno jucato cu Napule, se so’ ghiute a ‘nfettà jucanno cu ‘a juventús.
Pe ccuie ‘o Napule nun se sunnasse maje cchiú ‘e dà jucature â juventús o ‘e se piglià ‘nu jucatore d’ ‘a juventús (Zlayeta, Blasi o quacche ato purpo: De Ceglie, Iaquinta ca quacche vvota se ne parla…). Chi à avuto ‘a faccia tosta ‘e se mettere chella schifosa maglietta janca e nnera s’à dda mettere scuorno e ss’ à dda jí sulo ânnasconnere e nun po’ sperà ‘e se mettere ‘a maglia sacra e gluriosa d’ ‘o Napule!
Vi stringo la mano; bbona salute e ca ‘o Signore onnipotente nce perdunasse e benedicesse a tutte quante!
Raffaele Bracale (linguista)
