Insigne facette coccosa, ma troppo poco; ce fossemo aspettate assaje ‘e cchiú dô capitano! Che bbella ‘ntessa chella di Anguissa cu Anemalonga e cche qualità e cquantità ‘mmiez’ô campo!
ROMA -NAPOLI [24.10.21] 0 A 0 ‘A VEDETTE ACCUSSÍ
Assaffa (purtroppo) nun se po’ affuzzà (vincere) sempr guagliú! Quacche vvota ce s’à dda cuntentà ‘e russimà (pareggiare). E cchesto succedette ajere mmerz’ê sseje quanno ‘o Ciuccio s’’a jette a gghiucà a Rroma cu ‘e pecurare lucale e assaffa se trattaje ‘e ‘nu sibbacco (match) cumpricato,apierto e cumbattuto cu n’ucummo (arbitro) ca nun fove a ll’ardezza [e ppo ve dico] e ccu ‘na Roma ca jucaje cu ‘o sanco a ll’uocchie e riuscette a nchiudere a ttiempo ògne curzèa, ògne curreture… cusicché jette a ffení ca se fermaje a otto ‘a ferza d’arnasse (vittorie) e mmo ‘o primmo posto ‘ncrassifica nce ll’âmm’’a spàrtere cu diavule milanise. Pacienza, che ce vulite fà? Assaffa (purtroppo) dint’ô palazzo nun cuntammo ancòra ‘nu saciccio e nn’âmm’’a magnà furne ‘e pane primma ca ll’ucumme (gli arbitri) nce portano crianza!
Passammo ê ppaggelle:
OSPINA [Ecchesepastacrisciuta] 7 Fove chiammato a ffà suli pochi tacculle (interventi), ma nun sbagliaje niente risultanno curaggiuso, priciso, armunasibbo (tempestivo) e dachicco(puntuale) trasmettenno ammanna (sicurezza) ê cumpagne.
DI LORENZO 6 Attiento e ppronto sapette sempe chello ch’êva ‘a fà i ‘a Roma nun riuscette maje a ppassà dâ parta soja.
RRAHMANI 6,5 Nun sbagliaje ‘nu taccullo (intervento); ‘a ‘ntesa cu ‘o Ggialante se sentette e ‘o guaglione furnette n’atalossa (prestazione) pusitiva!
KOULIBALY [‘O Ggialante] 7 Ata atalossa (prestazione) assaje ‘mpurtante d’’o sinicalese ca nunn’ ‘a facette bbona a nnisciuno scupanno o tajennanno (impostando).
Mario RUI 6 Facette tutto ‘o duvere suĵo ‘ncopp’â ferza mancina mo scagnanno pusizziona cu ‘o capitano, mo mettenno quacche bbuonu ppallone ‘mmiez’â muntaca (area di rigore) rumanese.
ANGUISSA [‘O ‘Ntussecuso] 6,5 Che bbella ‘ntessa chella cu Anemalonga e cche qualità e cquantità e qualità lla ‘mmiez’ô campo!
RUIZ [Anemalonga] 7 ‘Nteliggente cumm’è tuccaje tanti pallune i ‘e gestiunaje (li gestì) cu pricisione lammaja (brillante) cumme chillu pallone p’’o dderitto ca facette nascere ‘o palo cuoveto da Caromecosta.
POLITANO 6 Uno d’’e cchiú friccecarielle ô primmo ajone (nel primo tempo) po se jette annascunnenno, ma furnette a Ccaromecosta ‘a palla-stuco (palla-gol) cchiú muimma (importante).
[dô 71 LOZANO 5 ‘Ncampo pe cchiú ‘emez’ora aizaje sulo porvera. Peccato.
OSIMHEN [Caromecosta] 6,5 – Partette buono ma po se ‘ncartaje spellicciannose cu Mancini. All’arrancua (nella ripresa) ce mettette cchiú ccegna(grinta) : cugliette ‘nu palo, accarezzajr ‘a parte auta ‘e ll’afachia (traversa) signaje pure n’addaffa (una rete), ma s’’a vedette aramarrà (annullare) pe bbia ca steva ‘nnattasallulo ( in fuorigioco). Peccato.
INSIGNE 5,5 – Facette coccosa, ma troppo poco; ce fossemo aspettate assaje ‘e cchiú dô capitano!
[da ll’81’ MERTENS [Ciruzzo] s.z. Trasette troppo tade pe ffarese apprezzà.
all.: SPALLETTI 6 ‘A scuatra jucaje ‘nu sibbacco (match) ‘E sustanza, ma s’êtte accuntentà ‘e sulo ‘nu punticiello pure si cummannaje ‘o juoco pe pparicchiu tiempo, senza però maje truvà ‘o sistema d’affuzzà (vincere) e s’êtte piglià ‘nu russimmo (pareggio) doppo otto arnasse (vittorie) cunzecutive. Però se po’ tturnà a dd’adffuzzà ggià da ggioverí ca vene!
arb. MASSA 4,5 Nun fove a ll’ardezza d’’o sibbacco (match), siscaje senza criterio partiggianno, cu ‘na faccia ‘e zoccola, p’’e lucale; lle perdunaje cchiú ‘e ‘na fetenzia, senza tirà fora troppi cartelline jalizze (gialli) cosa ca spragnaje ê rumanise allimmeno ‘na tadda (un’espulsione) chella di Abraham(me), ca cu gghiuoco periculoso centraje ‘a capa ‘e Zielinski: ‘o ‘ngrese ggià nutizziato (ammonito) êsse avut’’a essere jettato fora…, pe nnun dicere d’’o ricore ca nun ce dette quanno Anguissa fove arrunzato e stiso ‘nterra.
E bbasta accussí dàmmoce ‘nu pizzeco ‘ncopp’â panza e gghiammo annante. E ssi ‘o Cielo ‘o ppermette ce sentimmo viernarí ca vene pe pparlà d’’o sibbacco (match) ‘e Campiunato ‘e ggioverí a ssera ô Maradona contr’ô Bbulogna.
‘E cchiú, ‘e cchiú ‘e cchiú Ciuccio fa’ tu!
Staveti bbe’
