Juventus-Napoli, le anti-pagelle in lingua: una serata indimenticabile a Torino, allora tutti vengono premiati con il massimo dei voti.
Juventus-Napoli 0-1, – ‘A vedette accussì
Alleluja, alleluja! Piatte, ‘rancasce, putipú, scetavajasse,triccabballacche, trezziole, bbiancale, fuja-fuje, e bbotte a mmuro, guagliú ! Chiagne ‘a vecchia zoccola e ccanta Napule, Napule cuntento e surisfatto visto ca ‘o Ciuccio ajeressera jette a tTurino dint’ô cesso d’’a vecchia zoccola i ‘a jette a vvattere ô nuvantesimo mettennolo a ppitoffio nun sulo â zoccola janca e nnera, ma pure a ttutta ‘a mmescafrancesca ‘e diriggenza targata Agnelli, a cchillu sacchetto ‘e ll’ummeto ‘e bBuffòn(ne), a cchella zompaperete d’’a cummara soja i a ttutt’’e cestarielle ca ajeressera nun ce putetteno niente, dàtose ca ‘o Ciuccio jucaje ‘nu sibbacco (match) quase (perfetto) contro a ‘na scuatra ca jucaje cumme a ‘na pruvinciale ‘e seria B sempe cu ddiece perzone arreto â linia d’’a palla senza riuscí maje a ddà penziere a rReina e ccu cchella lota d’‘o cainno (traditore) ca aizava porvera strignuto dint’â morza d’’o Masto e d’’o gGialante ca ‘o cassajeno dô campo….
E accussí ‘nfra ‘na cosa e n’ata [cumpresa n’addaffa (rete) ‘e Lorenzigno, ca ll’arbitro Rocchi (4) annullaje pe n’attasallulo (fuorigioco), ca, pe mme, se ‘mmentaje ] doppo ‘na mubbara (partita) passata a attaccà cercanno ‘e superà ‘o muraglione janco e nniro fove naturale, overo bbello e ccunzulante ca, arrivate ô 90’ ‘o gGialante zumpanno ‘mparaviso ‘ncopp’ a ‘nu sistimato tiro ‘e squina ‘e Peppe ‘a ‘nguenta, cu ‘na granna, preputente cabbesera (colpo di testa) casticasse definitivamente [e ssenza ca ll’arbitro putesse dicere niente…] ô sacchetto ‘e ll’ummeto cunzignannoce ‘nu rijalo ‘ncartato a ffesta.
E ffove accussí ca ‘o Napule,cu ‘e tre ppunte d’ajeressera s’è purtato a ‘nu passo da chillu suonno ca si quacche gghiuorno fa pareva ‘mpussibbile, mo è ppussibbile ancòra. Visto ca ‘e cuane nunn’ànno maje mullato e a tTurino, sponna janca e nnera, ànno truvato ‘e tre ppunte cchiú ‘mpurtante d’’a tempurata (stagione) pure pecché ajeressera dimustrajeno ca ‘a zoccola nunn’è cchiú ssicura ‘e chello ca se fire ‘e fà e sentenno ‘o sciato d’’o Ciuccio ‘ncopp’ô cuollo se sta cacanno sotto cu ‘nu calannario ca accummencia a essere ‘mpignativo avennose da scuntrà a sSan Siro contro a ll’Inter(re) e a ll’Ulimpico ‘e Roma contr’ê pecurare lucale, ddoje scuatre a ccaccia ‘e punte p’’a cualificazzione ‘nCiampionsa, e ttutto po’ succerere!
A ‘stu punto êsse’a fà ‘e ppaggelle, ma tengo ‘o core dint’ô zzuccaro, me sento bbuono ‘e core e ppe cchello ca ànnu fatto ajeressera mecco 10 a ttutte quante pure ê cchiú scarzulille, mentre, me perdunate?, ô bbatallo (eroe) d’’a serata: Koulibalý mecco diece e ‘nu vaso ‘mmocca!
E ffermammoce cca speranno ‘e puté fistiggià pure st’ati quatto mubbare (partite) ca nce aspettano accummincianno da chella ‘e dummeneca ca vene contr’â Fiorentina. Si dDi’ vo’ ve ne parlo llunnerí trenta abbrille. Staveti bbe’.
