ilNapolista

Che ce vulite fà? Simmo nate pe ssuffrí

Sàpato a ll’ora d’’a tiella se va a Rroma contro ê pecurare lucale e sperammo ca ll’ucummo (arbitro) nce fa fà ‘o spezziale

Che ce vulite fà? Simmo nate pe ssuffrí

No guagliú accussí nun va! ‘O Napule nunn’è ccacchio d’affuzzà (vincere) cchiú ‘na mubbara (partita) ch’êsse fa soja assulutamente…E cchesto succedette pure  ajere ‘mmerz’ê ssette ô san Paolo addó ‘o Ciuccio contro ll’Atalanta [scuatra assineja(satellite) d’’a vecchia zoccola] jettaje dint’ô cesso tre ppunte d’oro ca nsi’ a ll’85’ teneva dint’â sacca e ffenette ca ‘mmece d’affuzzà c’êttem’’a cuntentà ‘e russimà (pareggiare), cosa canun leva né mmette! È overo ca ajere chillu sacchetto ‘e ll’ummeto ‘e Giacomelli [3 e ppo ve dico] ce ajutaje p’’a scesa, ma si ‘o Ciuccio nunn’êsse sciupato ddoje o tre bboni accasione ‘e fatte fósseno jute ‘e n’ata manera e mmo nun stessemo cca a rrusecarce ‘o fecato. ‘Nzomma ‘o Napule ajere fove annezzato (scippato)‘e n’arnassa(vittoria) ca a ccunte fatte se fósse mmeretata e ttutto chesto  doppo ‘na mubbara (partita) ca vedette ‘o Ciuccio prutacunista pure si jette ddoje vote annante [16’ e 71’] e ddoje vote [41’ e 86’] se facette angappàe pperò si se jucasse ‘nu campiunato reculare addó ll’ucumme (arbitre) siscassero ô stesso a ttutte parte daTturino, Milano, Genova , Roma e Nnapule e nno, cumme ‘mmece capita ‘e ‘na manera da Turino a Rroma i ô ccuntrario a Nnapule o addó joca ‘o Napule… i allora nun fóssemo custrette a ppenzà ca è ll’ora p’’o Napule ‘e cercà ardafeja (ospitalità) ô campiunato creco o albanese, dàtose ca chillu tagliano nunn’è ‘nu campiunato serio!

Turnammo ô sibbacco (match) d’ajere e ddicimmo ca ‘o Napule accumminciaje a ccapa sotto pure si perdette quase súbbeto ô ‘Ncrifato ca se facette male e avette trasíZielinski; accumminciaje ‘o Ggialante ca ‘e capa ‘mpignaje a  Ggollini; súbbeto doppo Sant’Arcadio se muvette pe rrecogliere da Di Lorenzo,ma tiraje  troppo ‘ncuollo ô purtiere ca doppo poco fermaje ‘na cunchiusiona ‘e Peppe ‘a ‘nguenta ca ‘mmece ‘e aizà ‘a palla tiraje ‘nchiana terraperò, finalmente ô 17’ arrivaje  ‘o meizo (vantaggio) cuano (azzurro): Lorenzigno piscaje a Ppeppe ‘a ‘nguenta ‘ncopp’â ferza ‘e dritta i ‘o spagnuolo pittaje ‘nu jabbro  (cross) matalo(perfetto) p’’a capa d’’o Ntontero ca ce purtaje ‘ncopp’a ll’uno a zzero. Cumminte ‘e nuoste attaccajeno ancòra, Gollini non trattenette ‘nu mancino d’Anema Longa  e  Sant’Arcadio, sfurtunato,  cugliette ‘o paolo ‘e capa; se cuntinuaje cu ‘o Napule padrone d’’o campo e ccu ll’atalantisi ca nunn accucchiaveno ‘nu saciccio  e ppirciò fove ‘nu tuono ‘e marzo ‘o russimmo (pareggio) atalantiso ô 41’ arrivato doppo n’ artelitta(triangolazione) Ilicic(cio)-Toloi-Freuler(ro) cu ‘o sguizzaro ca ancercanno (anticipando) ‘o tiro ‘o facette passà [vuje capite!] ‘mmiez’ê ccosce d’’o Lungagnone, respunzabbile ‘e ll’addaffa (rete) ‘ncassata. Cchiú mutavazzinnata (equilibrata) ll’arrancua (ripresa) cu ll’Atalanta ca cercava ‘e fà coccosa mo cu  Ppasalic(cio), mo cu Gosens(o), mo cu  Hateboer(ro) ‘O Jancone finalmente capette d’avé sbagliato a ffà jucà a Llozano e s’’o chiammaje ‘mpanca mettenno a Cciruzzo ca appena trasuto  dette ‘na granna palla a Llorenzigno ca però ‘a sciupaje tiranno auto; ce pruvaje allora sant’Arcadio ca cu n’arcasía (punizione) ‘e mancino cugliette ‘o pizzo ‘e ll’afachía (traversa). Che peccato! Però doppo poco ‘o pulaccone cunfezzionaje n’atu meizo (vantaggio) ô 71’ quanno, lanzato da Anema Longa, se futtette tutto ll’armidanno (centrocampo) atalantiso, zumpaje  a Ggollini asciuto inutilmente e mmettette ‘a palla ‘mporta;Gasperini si se jucaje ll’urdemi minute ‘e sibbacco (match)cu Muriel(le) ô posto ‘e Gomez(ze) e ô ssolito fove furtunato; ‘o Napule facette ‘a stessa fessaria fatta a Tturino ‘ncopp’ô tre a ttre: ‘mmece ‘e annasconnere ‘a palla, menarla fora e pperdere tiempo cuntinuaje a gghiucà sguarnenno ll’armidanno (centrocampo), Anema Longa, lanzato da Lorenzigno Fallette ‘o tre a uno  i ‘o Napule pavaje caro ll’arcatta (eerore)e a ll’86’ Toloi facette culà ( filtrare)‘na palla a mmestire pe  Ilicic(cio) ca aiutato dô pusizziunamento sballato d’’a trasera (difesa),futtette ô Lungagnone ca, ‘sta vota, nun tenette itimme (colpe).Nun ce scurdammo però ca ‘nu minuto primma Giacomelli êva ‘nchiuso uocchie, recchie e ati pertóse pe nnun vedé n’atalantiso, ca ‘ncopp’a ‘nu jabbro (cross)se nn’era strafuttuto d’’a palla e avutatose s’era menato a ccuorpo muorto ‘ncuollo ô Spetaccusocarriannolo ‘nterra [e cce ne vo’!] dint’â muntaca (area di rigore) bercamasca. A nniente servetteno ‘e ppruteste d’’e cuane (azzurri) ca facetteno curnute e mmazziate! E accussí doppo ‘nu ricupero d’otto minute c’êttem’’a chiejà a llibbretto ‘nu russimmo (pareggio)  troppo fauzo p’essere overo! Che ce vulite fà? Simmo nate pe ssuffrí e âmm’’a vedé n’ucummo (arbitro) ca a Turino cuncede â vecchia zoccola ‘nu ricore ca nun ce sta e n’at’ ucummo (arbitro) ca ammezziato da chi sa chi a Nnapule nun dà ê cuane (azzurri) ‘nu ricore ca ce stà. Che schifo!

Passammo ê ppaggelle:

MERET[‘O Lungagnone] 5:

Bella ‘a parata ‘ncopp’a  Ilicic(cio)  ô bbedajo (all’inizio) d’’o primmo ajone(primo tempo), ma po che ffessaria farese passà ‘a palla ‘mmiez’ê ccosce  ‘nnaccasione ‘e ll’uno a uno.

DI LORENZO 7: Bbella atalossa (prestazione) ‘e ll’udè (terzino) ‘e mancina ca ‘nzieme a Ppeppe a ‘nguenta mannajeno ô manicomio â easera (difesa) bercamasca

KOULIBALY [‘O Ggialante] 5,5: Me dispiace ma ll’attocca miezu zifo (voto) mancante  pecché si fove priciso ancercanno (anticipando) i ‘e capa, smarrunaje, facennose ‘nfilà ‘nnaccasione ‘e ll’uno a uno  e d’’o doje a ddoje

MAKSIMOVIC[‘O Ntontero] 6,5:

stranamente fove isso a essere ‘o meglio d’’e duje centrale priciso e ssicuro nchiudenno  e mmettenno a ffrutto ‘a palla ‘e Ppeppe a ‘nguenta ‘nnaccasione ‘e ll’uno a zzero.

LUPERTO 5,5:

Pure a isso miezu zifo (voto) mancante pecché facette sí bboni ccose, ma pure quacche fessaria.

CALLEJON[Peppe ‘a ‘nguenta ] 7:

Bbella mubbara (partita) ‘nterpetrata a mmestiere dô spagnuolo ca s’accentraje o s’allargaje mannanno ô manicomio ‘a trasera(difesa) d’’e bercamasche; peccato ca nun signaj, ma furnette ‘nu missiddo (assist) a zzuco ‘e caramella pe ll’uno a zzero.

ALLAN[‘O ‘Ncrifato] 6 ‘e stima:

Sfurtunato ‘o cane ‘e presa cuano(azzurro), se facette male doppo sulo seje minute e avette ‘ascí minuti.

[Dô 10’ ZIELINSKI 6,5 Trasette a ffriddo ma scarfatose se dette da fà cuncentrato e chino ‘e cegna (grinta) facennose apprezzà, però êsse avut’’a cercà ‘a porta e nnun ‘o ffacette.]

FABIAN RUIZ[Anema Longa] 7,5:

Gestiunaje (gestí) cu ggranna  ‘nteliggenza ll’ajazzo (possesso) palla e cu ‘na perna d’’e ssoje mannaje ‘mporta a ssant’Arcadio ‘nnaccasione d’’o doje a uno.

INSIGNE [Lorenzigno] 6,5:

Se  sacrificaje p’’a scuatra dànno spettaculo cu bbelli ghiucate e bbelli lanze p’’e cumpagne; peccato ca mancaje ‘e cercà ‘a porta quanno lle capitaje ll’accasiona.

LOZANO 4,5: Nunn’azzecaje una bbona; troppo eguista nun cercaje ‘e cumpagne nè riuscette a ccercà e ttruvà ‘a porta.‘O Jancone, pentuto ll’êtte ‘a cagnà.[ Dô 58’MERTENS[Ciruzzo]  6,5: Mettette sempe ‘ndifficultà ll’avverzarie rennennose sempe periculuso da súbbeto cupulianno (dialogando) cu Llorenzigno.]

MILIK 8: Nun sulo jucaje p’’a scuatra avasciannose pe ffarela saglí, e cunchiudette nunn’ appena vedeva ‘a porta; sfurtunato cugliette dduje pale, ma signaje ll’addaffa (rete) d’’o doje a uno. [ Da ll’82’LLORENTE[‘O Spetaccuso] 5,5]: Trasuto pe ffà arrepusà Sant’Arcadio, mammuoccelo cumm’è se facette carrià ‘nterra dint’â muntaca (area di rigore) bercamasca, prucurannose ‘nu ricore ca ll’ucummo (arbitro) nun lle dètte.

all. ANCELOTTI 6:

Tutto summato facette  ‘a fessaria ‘e fà jucà dô primmo minuto a Llozano ca nun facette ‘nu saciccio; p’’o riesto fove   custretto a mmettere ‘na difesa arrangiata e nnun raffurzaje ‘a linia d’’a mediana. ‘O ciuccio però jucaje ‘na bbona mubbara (partita) duminanno, signanno ddoje addaffe (reti)  cugliette dduje pale, custruette tanti ppalle periculose, perdette quacche accasione e avette subbí ‘o russimmo pe ‘na dicisiona a ccapa ‘e cacchio ‘e ll’ucummo (arbitro).

arb. GIACOMELLI 3  Aggiu ggià ditto tutto cca e lla ‘e ‘stu sacchetto ‘e ll’ummeto triestino venuto cca ‘mmezziato a spezzarce ‘e passe e a rromperce ‘o saciccio; ca ‘o jesseno a ppiglià dint’ô prozo isso e cchi ‘o mannaje (Rizzoli e Nnicchi)!

E fermammoce cc; primma però ricurdammoce  ‘na cosa ‘mpurtante: nun se po’ mmettere a pparacone o Napule d’’o campiunato e cchillo d’’a Ciampionsa, pecché ‘na cosa è gghiucà ‘nu sibbacco (match) ‘nnAiuropa addó cchiú o meno tutte ‘e scuatre jocano pe vvencere e n’ata cosa è gghiucà ‘na mubbara (partita) ‘ncampiunato addó grosse o piccerelle, si jocano cu ‘o Napule metteno ‘nu paro ‘e pulmanne ‘nnant’â porta primma cercanno ‘e nun perdere  e ppo, si càpita sfruttà ‘o cuntrattacco (contropiedi) p’affuzzà. Pirciò è nnurmale ca ‘o Napule ‘e Ciampionsa piace ‘e cchiú e ddà cchiú ssuddisfazzione i è sbagliato lamentarese d’’o Napule visto ‘ncampiunato soprattutto quanno ‘o Jancone se ‘nfessisce a nnun fa jucà allimmeno uno auto annante capace d’ausà ‘a capa pe ddà palla ê piccerille p’’e ffà signà. Ditto chesto, dàmmoce appuntamento, si ‘o Cielo ‘o vvo’ a ddummeneca ca vene doppo ca sàpato a ll’ora d’’a tiella se va a Rroma contro ê pecurare lucale e sperammo ca ll’ucummo (arbitro) nce fa fà ‘o spezziale.

Staveti bbe’. R.Bracale Brak

 

ilnapolista © riproduzione riservata