‘A furtuna nosta è sant’Arcadio

Ancelotti ll’êva raccumanato a ttutte ‘e nun penzà a vittoria pe ttre a zzero ‘e sette juorne fa, ‘mmece ‘o ffacetteno sí e nno pe ‘nu quarto d’ora

‘A furtuna nosta è sant’Arcadio

Che nnervatura

No, guagliú, accussí no! Che nnervatura e cche ggiramiento ‘e palluccelle a vvedé ‘o Napule d’ajeressera  ‘ncopp’ô campo d’’o Salisburgo addó nun fove isso e addó fove mazziato pe ttre a uno e nnun me venite a ddicere ca ‘o ‘mpurtante ajere era ‘e passà ‘o turno apprudanno ê quarte d’’a d’’a cuppetta  airupea…. pecché p’apprudà s’apprudaje, ma abbuscanno pe ttre a uno e cchesto nun ce piacette ‘ntribbuna-divano, pecché nun ce piace ‘e tiffiddà (perdere) maje e ajere nun s’êsse avuto tiffiddà (perdere) pure pecché

‘o Jancone ll’êva raccumanato a ttutte ‘e nun penzà a ll’arnassa  (vittoria) pe ttre a zzero ‘e sette juorne fa ô san Paolo, e dde jucà cumme sanno fà…. ‘mmece ‘o ffacetteno sí e nno pe ‘nu quarto d’ora, justo ‘o tiempo ca sant’Arcadio mettesse ‘e ccose ‘nchiaro signanno [13’] ll’addaffa (rete) ca ce mettette ‘int’ê tranquille pecché a cchillu punto ‘o Salisburgo pe passà isso êsse avut’ ’arfuzzà (vincere)pe ccinche a uno.

A cchillu punto ‘o Napule s’assettaje e nnun ghiucaje cchiú pe ttutt’’o sibbacco (match) zumpettianno pe ttutto ‘o campo senza zuco nè ccunnimma. Ce mettettemo scuorno pe cchello ca ‘o Ciuccio steva facenno vedé a ll’ Airupa: ‘na scuatra senza ggenio, senza juoco e  ssenza fficre (idee) ch’aspettava sulo d’arrivà a ll’urdemu minuto e llevarese ‘o ‘mpiccio.

Naturale pirciò ca ‘o  Napule abbuscasse ‘ncopp’ô campo  d’’o  Salisburgo i ‘a furtuna nosta ca sant’Arcadio cu ll’addaffa (rete) soja nc’êva mise ô ssicuro, ma ll’atalossa   (prestazione) nosta fove ‘na vera schifezza forze pure pecché se sentette ‘a mancanza d’’e duje centrale estebbadde  (squalificati): d’‘o ‘Ntontero, ma soprattutto d’’o Ggialante… e, pe gghionta ‘e ruotolo ce se mettette pure ‘o zumpòro (infortunio) d’’o Vampiro custreto a dd’ascí ô 78’. Che v’aggi’’a dicere guagliú: a nnuje ‘a malasciorta ce accumpagna spisso. Pacienza e ttirammo annante!

Passammo ê ppaggelle

MERET[‘O Lungagnone] 6  Cercaje ‘e dà ammanna (sicurezza) â sezziona (al reparto) dimustrannose taminno  (sicuro) e ppriciso quanno ascette,ma nun ce putette fà niente ‘ncopp’a nnisciuna ‘e ll’addaffe (reti) pigliate. ‘nzomma cumplessivamente dicimmo ca ‘e mmuccabbe (parate) soje ô san Paolo cuntajeno paricchio p’’a cunquista d’’e quarte.

HYSAJ[Meza Cucchiara] 5  ‘Nu zifo (voto) mancante pecché nun ce piacette proprio dàtose ca fove assaje poco mascullo (brillante) soprattutto quanno passaje centrale e sufferette ‘a  zzurea (velocità) ‘e arcagge (esterni) d’’o Salisburgo, facennose fottere spisso….

CHIRICHES[‘O Vampiro] 6  Atalossa (prestazione) tutto summato pusitiva fatta ‘e teggebbeja  (d’esperienza) ca cercaje ‘e fà ‘a parte d’‘o ‘Ntontero, ma soprattutto d’’o Ggialante; jellato se facette male e avette ‘ascí; unu sfregazzo (sbavatura) ô 24’ ‘ncopp’â primma addaffa (rete) d’’o Salisburgo quanno s’ammuccaje ‘a ‘nfenta ‘e Dabbur(ro) e s’accuvaje ‘nterra. Peccato. [Dô 78′ MALCUIT [‘O Tignuto] 5,5 Me dispiace, ma miezu zifo (voto) mancante pure a isso ca trasenno nun facette chello ca ce s’apettava a uno cumme a isso ca pe gghionta ‘e ruoto ‘ncopp’ô tre a uno rummanette ‘ncopp’ô palo senz’ascí ‘ncopp’ô tiro  ‘e Leitgeb(be) facenno ‘nu rijalo ô Salisburgo.]

LUPERTO 6  Sfurnaje n’atalossa (prestazione) tutto summato pusitiva cercanno ‘e nzerrà ògne chesema (varco), ma êsse avut’’a fà partí ll’azziona dâ trasera (difesa) e nnun ‘o ffacette. Peccato.

MARIO RUI 5,5 Miezu zifo (voto) mancante pecché fove poco periculoso quanno s’attaccaje e ssufferette, cumm’ô culleca ‘e dritta, ‘a zzurea (velocità) ‘e chille d’’o Salisburgo.

FABIAN RUIZ [Anema Longa] 6  Qualità e cquantità pp’o spasgnuolo ca, jellato, cugliette ‘o palo e nnun ce dètte ‘a ggija ‘e n’ata addaffa (rete). Che peccato!

ALLAN[‘O ‘Ncrifato] 5 ‘Nu zifo (voto) mancante e ll’aggiu trattato  pecché ajere ‘o bbrasiliano nun fove isso: o steva fatto a vvino o penzava a ato cert’è ca facette ‘na mubbara (partita) da scurdarese: apprimma sbagliaje ‘nu stuco (gol) facile ch’êsse pututo essere chillo d’’o doje a zzero e ppo, piezzo e ppejo, ô 24’ facette  ‘na granna strunzata  rijalanno palla ô Salisburgo poco fora dâ muntaca (area di rigore) nosta cu ‘nu pasiglio alaffío (orizzontale) ca nun s’êsse avuto maje fà, cosa ca sape chi accummencia a gghiucà ô pallone! Cose ‘e pazze! Pe ttutt’’o riesto d’’o sibbacco (match) po nun facette ‘nu saciccio e chi sa’ pecché ‘o Jancone nun s’’o chiammaje ‘mpanca. 

ZIELINSKI 6,5  Tutto summato uno d’’e poche ca se salvaje, muvennose ‘ncopp’â curzia cuntinuamente. [dô 74′ DIAWARA 5,5  Miezu zifo (voto) mancante pure a isso ca nun riuscette a ddà qualità ô juoco d’’e cuane (azzurri) e ttuccaje pochi pallune.

CALLEJON [Peppe ‘a ‘nguenta] 6  Se dètte da fà cercanno   cumm’ô ssolito ‘int’ê ddoje epate (fasi), ma purtroppo nun ne cacciaje zuco.

MERTENS[Ciruzzo] 5 Me dispiace ma ll’attocca ‘nu zifo (voto) mancante  pecché proprio nun me piacette: facette pochi gghiucate e nnun ne cacciaje ‘nu saciccio! Chi sa’ che lle succede: so’ ppenziere o femmene? Nunn’è cchiú isso e ‘o Jancone à dda vedé ‘e fà coccosa pe ffarelo turnà ‘nsé! [ da ll’88′ YOUNES [‘O Mmerecato] sv Che pputeva fà cu ppochi minute  ddispusizziona?]

Milik [Sant’Arcadio] 7  Isso facette ‘o duvere suĵo. Signanno súbbeto â primma accasiona ch’avette…, po cuntinuaje jucanno p’’a scuatra e mme dispiace ca po cchiú nnisciuno d’’e cumpagne ll’accurdaje o cercaje ‘int’â muntaca (area di rigore).

all. ANCELLOTTI (‘O Jancone) 5 Me dispiace ma ll’attocca pure a isso ‘nu zifo (voto) mancante  pecché quanno se perde ‘o primmo respunzabbile è ‘o mutarribbo (allenatore): êsse avut’’a fà ‘e bbuche ‘ncapo ê jucature  p’’e ffà scurdà ‘o tre a zzero d’’o san Paolo e ggestiunà (gestire) meglio ‘e cagne.

arb. DEL CERRO GRANDE 5  Nun ce facette fetenzie, ma ê vvote vedette i ê vvote cecaje!

E ffermammoce cca nun dico cuntente, ma allimmeno suddisfatte , tutto summato, d’avé passato ‘o turno  e pp’’o mumento tturnammo a ppenzà ô campiunato pe nun perdere cchiú ppunte e ddummeneca ca a ll’ora d’’e ppastarelle ce vene a ttruvà ll’Udinese, vedimmo ‘e turnà a metterce  ‘e tre ppunte dint’â sacca. Accussí sperammo e ssi ‘o Cielo ‘o  vvo’ ve ne parlo llunnerí ca vène.

Staveti bbe’.

ilnapolista © riproduzione riservata