Milik ‘nu demmonio scatenato, finalmente Callejon

Le pagelle in lingua, Ancelotti? Se vincette i ancòra ‘na vota avette raggiona isso, Rocchi s’êtte passà ‘a mana p’’a cuscienza

Milik ‘nu demmonio scatenato, finalmente Callejon

Acqua e ànnese, fetè vuó vevere? E accussí ffove ajeressera guagliú quanno  ‘o Ciuccio ô san Paolo apprimma  avvelenaje ‘o pappavallo ‘e Lotito cu dduje mazze ‘e prutusino [34’ e 37’] e cquanno chillo sbattenno ‘a coda [65’]tentaje ‘e repigliarese… ‘o mettette a vvevere pecché a nnuje ce serveveno ‘e tre ppunte e nnun putevemo permettere ‘e perderne nisciuno.

‘na mubbara (partita) jucata cumme s’êv’ ‘a jucà

E nnun ne perdettemo guagliú…. mettennoce ‘e tre ppunte dint’â sacca doppo ‘na mubbara (partita) jucata cumme s’êv’ ‘a jucà cu  ‘a cegna (grinta), ll’ arcuia (forza), ll’archedebba  (impeto) nicessarie, senza maje mullà ‘e nu centimetro e ccu ‘o ggenio ‘e dedicarela ô Ggialante ca certamente rummanette cuntento d’’a nichemata (vittoria) cunquistata  ch’ êsse pututa essere cchiú ttonna nun sulo pe ccumme s’’a jucajeno, ma pure ll’accasione avute e mmancate ‘e poco  e soprattutte p’’e troppe pale pigliate (quatto!)

Napule sciso ‘ncampo cu ‘nu sustanziuso rutizzio

Però po, cumme jette e ccumme venette ‘a nichemata arrivaje contro a ‘na scuatra ca steva bbona  e avesse pututto metterce ‘ndifficultà… cosa ca però nun succedette â faccia ‘e chi ce vo’ male e d’’e troppi uocchie sicche ca ce meneno ‘a favetta, ma ca ajeressera s’êtten’’a fà ‘int’ô prozo pecché ‘o Napule, pure si sciso ‘ncampo cu ‘nu sustanziuso rutizzio (turn-over) pe bbia ‘e scualifiche  e dd’ arazabbie (infortunii) ‘e chisto o chillo dimustraje ‘e tené ‘na uarrada (rosa) tale da ggestiunà (gestire) a cciammiello tutte e ttre ‘e cumpetizioni  cumme succedette  ajeressera ca a ll’appello mancajeno dô primmo minuto ‘O Ggialante,Marekiaro, ‘o ‘Ncrifato e Llorenzigno e pparette  ca nun mancasse nisciuno, o quase si nun cuntammo ‘o mumento [65’] ‘e rallentamento quanno ‘O Masto,   ‘o ‘Ntontero i ‘o Tignuto nun riuscetteno a ffermà a Immobile ca ce futtette…. Poco male!

‘o Napule facette bboni ccose

Tutto summato  ajeressera ‘o Napule facette bboni ccose soprattutto durante ô primmo ajone (tempo); nurmale ca calasse ‘nu poco a ll’arrancua  e ca ce fósse quacche mumento ‘e difficultà ca s’êss’avut’’a gestiunà meglio, ma – cumme v’aggiu ditto – dimustrajemo ‘e tené granna qualità… e quanno ‘na scuatra dimostra ‘e tenerla nun ce ne sta pe nnisciuno! ‘A nichemata d’ajeressera ce facette vedé tre ccose ‘mpurtante:1) Peppe ‘a ‘nguenta turnato, finalmente a ttruvà ‘a porta i ‘o ffacette ô 34’ quanno arivvaje ‘e corza ‘int’â muntaca (area di rigore) e sservuto a cciammiello da Ciruzzo ‘e palla ‘a fravecaje ê spalle ‘e Strakoscia; 2)Anema Longa dimustraje, nun sulo ‘e tené ‘a stoffa d’’o riggista, ma ‘a saluta ‘e farese vinte vote ‘o campo ‘e corza dettanno ‘o juoco, prupunennose, nzertannose (inserendosi) e spaventanno ê purtiere…; 3) sant’Arcadio è ‘nu nassía (centravanti) cu ssette parme ‘e sacicce,capace ‘e jucà p’’a scuatrà turnanno pe ccercà palla  e ccupulià (dialogare) cu ‘e cumpagne e soprattutto truvà ‘a porta tiranno cresommole ca nun perdonano cumme succedette ajere quanno doppo d’avé centrato ‘e pale ddoje vote e ‘na vota ‘o rummanette scardato… arrivate ô 37’ se pigliaje ‘o spavo ‘ncerato ‘e tirà ‘na timmurría (punizione) dô lemmeto e facette partí ‘na cagliosa pricisa e pputente ca se ‘nfilaje lla addó  Strakoscia  nun putette arrivà. Cu cchisti jucature se po’ gghí luntano… e nnun ‘o ddico sul’i’.

Passammo ê ppaggelle:

MERET[‘O Lungagnone]: 7 Avevo sperato ca mantenesse ‘a porta acrata (inviolata), ma nun succedette; peccato, pecché p’’o riesto ‘o giuvinotto dimustraje d’essere ‘nu veru innio (campione) cu ‘nu taccullo (intervento) muzala  (prodigioso)’ncopp’a ‘na cabbesera (colpo di testa) ‘e Milinkoviccio-Saviccio e ‘ncopp’a ‘nu  tiro a bbotta sicura di Immobile. P’’o riesto fove attiento e ppriciso cu ‘e lanze e dètte ‘a dimustrazziona ‘e sapé sempe che ccosa fà; però nun putette fà niente ‘nnaccasione ‘e ll’addaffa (rete) d’Immobile, furtunato a ffà passà ‘a pallo sott’ê piere d’’o Masto ca nun fove aiutato nè dô ‘Ntantero, nè dô Tignuto.

MALCUIT[‘O Tignuto]: 6 Ah, si fsse stato cchiú vascio quanno Immobile se ‘nfilaje truvanno ll’addaffa (rete) d’’a speranzella… però nient’ato pozzo truvà ‘e sbagliato; ll’atalossa    prestazione soja fove overo ‘mpurtante dinto a ttutte e ddoje epate (fasi) ‘e juoco. Quanno allacciaje ‘o passo fove ‘nu spettaculo e mumazza   (ottima) ‘a  ’ntesa cu Peppe ‘a ‘nguenta.

ALBIOL[‘O Masto]: 6  Me dispiace ‘e nun puterle mettere ‘e cchiú, ma purtroppo se purtaje ‘ncopp’â cuscienza ll’avé fatto passà ‘o tiro d’Immobile ca ce custaje ll’addaffa (rete); è overo ca nè ‘o Tignuto, nè ‘o ‘Ntomntero lle detteno ‘na mana ma chillu fatto spurcaje l’atalossa (prestazione) soja carimma (generosa) pe bbia ca scennette ‘ncampo miez’acciaccato pe  ttampunà ‘a tauara (emergenza) d’’a trasera (difesa). P’’o riesto voglio ricurdà ‘nu taccullo (intervento) fatto  a ll’uso d’’o Ggialante, ca se chiammaje ll’applavuso.

MAKSIMOVIC[‘O ‘Ntontero]: 6- Certo jucà ô posto d’’o Ggialante nunn’è ccosa ‘e pochi mumente e isso facette ‘o ppoco ca sape fà: bbuono ‘e capa e cquanno ascette palla ô pere; ‘nu sfregazzo (sbavatura) sulo, ma ‘mpurtante: quanno lassaje sulo ô Masto a vvederesela cu Immobile. 

MARIO RUI: 6,5.  Bbona atalossa (prestazione): partette a ccapa sotto currenno e appressuranno (spingendo) sempe  e sfurnaje jusaide mumazze  ( assist ottimi) cumme a cchillo ca, recuoveto a vvuolo da sant’Arcadio, poco mancaje e nun spezzasse ll’afachía.P’’o riesto nun sbagliaje quase niente e ffove priciso cu ‘e pasiglie (passaggi).

DIAWARA: 6,5 Tene ‘e cqualità e ppoco â vota veneno fora; ajere cumme a ‘nu mutore a nnafta ce mettette ‘nu poco ‘e tiempo pe gghí ‘mpressione, po criscette migliaranno pe ccumme ggestiunaje (gestí) palla e pe ccumme tampunaje  À dda sulo  crescere mentalmente [Dô 71′ VERDI: 6  Facette ‘o ssuojo:servette a llevà pressiona ê suoje quanno ‘a Lazzio tentaje ll’urdemi ccose e ajutaje  a ttèné luntano ‘o pallone dâ porta nosta.]

FABIAN RUIZ[Anema Longa]: 7,5. Cumme v’aggiu ditto, n’atalossa (prestazione) d’innio (campione) cu ggiumetrie, ficre (idee), cegna (grinta) e ccorza; sulo ll’afachia (traversa) fermaje  ‘nu tiro destinato ô funno d’’o sacco…. peccato! Bravo pure a sciascà   (schermare) ‘a trasera (difesa.)

CALLEJON[Peppe ‘a ‘nguenta]: 7 Finalmente truvaje ‘a porta,magnannose ‘a muntaca (area di rigore) e cculpenno cu pricisione ‘a palla avuta da Ciruzzo. Mumazza (ottima) ‘a ‘ntesa cu ‘o Tignuto! Benturnato! [Da ll’87’ HYSAJ[Meza Cucchiara]:6 Pochi minute pe ttené ‘o natiggia (risultato)facette ‘o mestiere suĵo: ògne taccullo (intervento) fove ‘nu matone p’aizà ‘nu muro ‘nnante â porta nosta.]

ZIELINSKI: 6 ‘ O ttene e sse vedette: jucaje tanti pallune primma ‘ncopp’â curzia e ppo strignenno a ccentro sempe pronto a lluttà i a bbattaglià. Dette ‘na granna palla a sant’Arcadio ca però ‘e capa truvaje ‘a rispinta d’’o purtiere. Po’ ccrescere ancòra ‘e cchiú i ‘o Jancone ‘o ssape! MERTENS[Ciruzzo]: 6,5 Cumme ô Masto pur’isso acciaccatiello nun fove ancòra isso e sse vedete però rispunnette prisente e rijalaje cca e lla  quacche pernezzolla cumme chella palla pricisa i a ttiempo ca Peppe ‘a ‘Nguenta facette addivintà ll’uno a zzero. [Da ll’82’ OUNAS: 6. Facette ‘o ssuĵo cumme a  ‘nu ggiuculiere mannanno ô manicomio ‘e lazziale; dduje stuche (gol) sfresate (sfiorati): uno cu n’azziona perzunale, ll’ato cu ‘nu tiro a vvuolo.] 

MILIK[sant’Arcadio]:8  M’êsse’a ripetere dicenno chello ch’aggiu già ditto, ma cca dico sulo ca p’‘o primmo ajone suĵo lle ce fosseno vuluto ‘e catenielle dint’ô naso: ‘nu demmonio scatenato: dduje pale: ‘nu tiro a vvuolo cu ll’afachia (traversa) ca ll’êtten’’a mmerecà  e  ‘na taraja  (tuffo) ‘e capa ca custrinette ‘o purtiere a appujà palla ô palo; po ô 37’ chella cagliosa cu ‘nu tiro ‘e timmuria (punizione) ca nun perdunaje.Nurmale ca a ll’arrancua calasse ‘nu poco.

All. ANCELOTTI [‘O Jancone]: 6,5 Se vincette i ancòra ‘na vota avette raggiona isso ca ggestiunaje (gestí) a cciammiello ‘a tauara  (emergenza) d’’o Napule,sciglienno e truvanno ‘e piezze adatte ca lle detteno ‘e risposte vulute. Avesse fatto ‘nu miraculo si êsse pututo pure evità ca a ll’arrancua ‘a scuatra rallentasse cunzentenno ll’addaffa (rete) d’ Immobile. Prò meglio nun cercà ‘o pilo ‘int’a ll’uovo.

Arb. ROCCHI 6  Fove mannato pe rromperce ‘e passe  cumme ati vvote p’’o passato, ma ajere se vede ca s’êtte passà ‘a mana p’’a cuscienza e ffetenzie nun ce ne facette. Meglio accussí.

E ffermammoce cca. Mo ‘o Napule joca sapato ca vene e sse va a Mmilano addó ce aspetta n’ato accunto scamuso: ‘a scuatra ‘e Gattuso. Facenno corna spero ca dummeneca ca vène, si ‘o Cielo ‘o vvo’ ve pozzo cuntà bboni ccose. Staveti bbe’! R.Bracale Brak

ilnapolista © riproduzione riservata