ilNapolista

‘Nu scunzulato russimmo (pareggio), ‘o Napule quase se cuntentaje

Granna atalossa (prestazione) e Malcuit, Fabian Ruiz ajeressera nun me piacette, Ciruzzo Mertens poco o niente. Doveri, dicisione a ccapa ‘e saciccio

‘Nu scunzulato russimmo (pareggio), ‘o Napule quase se cuntentaje

Acqua ca nun leva sete

Mannaggia ê cane ‘e canciello, guagliú. Ajeressera a san Ziro, sponna demmonio russo e nniro, nun fove pussibbile vencere e c’êttem’ ‘a cuntentà ‘e ‘nu scunzulato  russimmo (pareggio)  pe zzero a zzero  ca fove acqua ca nun leva sete e nnun fove chello ca ‘ntribbuna divano ce fóssemo aspettato vedenno ‘a furmazziona cattàla (battagliera) mannata ‘ncampo dô Jancone cu Lorenzigno, Ciruzzo e sant’Arcadio dô primmo minuto  e Ppeppe ‘a ‘nguenta pronto a ddà ‘na mana dâ linia d’armidanno (centrocampo) e mmece chi t’’o ddà?

t’ aspiette ‘e vedé  ‘nu Napule all’ujummo (attacco)

Pe ttutto ‘o primmo ajone (tempo) ‘o Ciuccio  êsse dato ‘na carocchia, ‘nu pàccaro, ‘na sputazzata ‘int’a n’uocchio a ll’avverzario… ‘Nzomma t’ aspiette ‘e vedé  ‘nu Napule all’ujummo (attacco), ma fove ‘a scuatra ‘e Gattuso a ttené   ‘e ccalidde  (redini) d’’o sibbacco  (match) dê primme minuti cu ‘e  muvimente ‘e Paquetà tra le  ‘nfra ê linie ca costrignetteno ‘a scuatra cuana (azzura) a rrummané vascia cu Cciruzzo e sant’Arcadio troppo abbandunate lla ‘nnante e  isulate senza puté dà penziero o mettere pavura a ll’avverzario e ccumplessivamente sulo pe scagno capitaje ca ‘a primma bbona accasione ll’avetteno ‘e nuoste  cu Ppeppe ‘a ‘nguenta ca saggiaje ‘a pruntezza  ‘e Donnarumma  cu ‘nu tiro andivinato azzicco ô palo vascio mancino   fermato dô purtiere ‘e Castiellammare! E ppe tutto ‘o primmo ajone nun se ne cacciaje ato e avettem’âspettà ll’arrancua pe vvedé finalmente ‘o Napule cercà ‘e fà ‘o spezziale  criscenno e affacciannose cchiú ‘e ‘na vota â muntaca  (area di rigore) rossa e nnera  cu Ddonnarumma chiammato a nazzafatallà  (disinnescare) apprimma ‘na durrea (girata) ‘e sant’Arcadio,po ‘na cagliosa a vvuolo  poi ‘e Zielinski, cuntrullata a ffatica.

‘o Napule quase se cuntentaje

Però po fenette lla: ‘o Napule quase se cuntentaje e nnun facette ato; naturale ca     ô 71’ Gattuso se jucasse ‘a carta  Piontecche e ghiette a ffení ca fove ‘o Napule a essere custretto a ddicere grazzie ô purtiere suĵo ca ô 79’, cu ‘nu zumpo ca se futtette ‘a pruntezza ‘e ‘na jatta riuscette a ffermà ‘na durrea (girata) sottomesura ‘e Musacchio miso ‘ncundizziona da Piontecche d’avé ll’accasione cchiú ppulita d’’o  sibbacco (match). E ppe grazzia d’’o cielo fenette cumme v’aggiu ditto cu ‘‘nu scunzulato  russimmo (pareggio)  pe zzero a zzero  ca fove acqua ca nun leva sete e nnun fove chello ca ‘ntribbuna divano ce fóssemo aspettato E nun ce piacette. ‘Nau poco ‘e pacienza! Quanno nun se sape vencere, nun se vence: nun ce stanno fóse da appennere!

Passammo ê ppaggelle:

OSPINA[Pastacrisciuta] 7  Miraculuso e ddicisivo, cumme v’aggiu ditto ‘ncopp’a   Mmusacchio…, p’’o riesto fove sempe  attiento ‘ncopp’ê cunchiusione d’’e demmonie ‘e Gattuso. Pure doppo ca s’era fatto male strignette ‘e riente e rrummanette ô pizzo suĵo.

MALCUIT[‘O Tignuto] 7   Granna atalossa (prestazione) d’’o marrucchino ancòra ‘na vota miso ô posto ‘e Meza Cucchiara. Fove sempe  attiento  a ll’epata difenziva (infase difensiva) e assaje periculuso a cchella uffenziva.

ALBIOL[‘O Masto] 5,5  Me dispiace ma ll’attocca miezu zifo (voto) mancante pecché ‘o vedette ‘nsufferenzia apprimma cu Cuutrone, po ci Ppiontecche ch’êtt’’a fermà cu ‘e triste.

KOULIBALY[‘O Ggialante] 6  ‘Nzerraje ògne chesema  (varco) arreto, ma fove poco mascullo (lucido) quanno tajennaje (impostò) partenno da ll’arcalafie (dalle retrovie.)

MARIO RUI 5,5  Pure a isso ll’attocca miezu zifo (voto) mancante pecché ‘o vedette ‘ndifficultà cu Suso, ca ‘o zumpaje sempe jenno ‘ncopp’ô funno e turnanno ‘ncopp’ô pere mancino. [Dô 72’ GHOULAM 6   Tuccaje pochi pallune, ma ce pruvaje cu cquacche bbuonu jabbro (cross).]

ZIELINSKI 6,5  Currette mettennoce tacnía (tecnica) cegna (grinta) e ttanta quantità; cumplessivamente fove ‘o cchiú ppericuluso d’’e cuane (azzurri) cu cchiú ‘e ‘na cunchiusiona ‘nteressante.

FABIANRUIZ [Anema Longa] 5 Me dispiace ma ll’attocca ‘nu zifo (voto) mancante pecché ajeressera nun me piacette; doppo d’’a granna atalossa (prestazione) contr’â  â Lazzio, m’aspettavo ‘e vederelo a ll’opera, ‘mmece ‘o   lo spagnuolo fove ‘o peggio ‘ncampo cu troppi pasiglie (passaggi) sballate  e ssenza maje mettere ‘mpenziero Donnarumma. Pe gghionta ‘e ruotolo, pure si nun s’’o ffósse mmeretato…, se facette jettà fora. 

CALLEJON[Peppe ‘a ‘nguenta] 6Nun sulo  finalmente cercaje ‘a porta ‘mpignanno a Ddonnarumma, po dètte ‘na granna mana  arreto cu cchiú ‘e ‘na càtara difenziva  (diagonale difensiva).

MERTENS[Ciruzzo] 5,5 Me dispiace ma ll’attocca miezu zifo (voto) mancante pecché cumplessivamente facette poco o niente e ttentaje quacche cusarella sulo ô bbedajo (all’inizio)  ‘e ll’arrancua (ripresa). Troppo poco![da ll’ 80’ VERDI sv Trasuto troppo tarde pe ffà coccosa!)

INSIGNE[Lorenzigno] 5 Me dispiace ma ll’attocca ‘nu zifo (voto) mancante pecché  proprio nun me piacette; anze è ggià quacche mubbara (partita) ca nun me piace; pure ajere, cumme ati vvote, currette,  s’affannaje, se facette ‘nu mazzo tanto, ma cunchiurette poco e nniente e nun fove mmaje periculoso quanno partette palla ô pere. ![da ll’ 88’ OUNAS sv Trasuto troppo tarde pe ffà coccosa!)

MILIK[Sant’Arcadio] 5,5 Me dispiace ma ll’attocca miezu zifo (voto) mancante pecché cumplessivamente facette poco o niente e llassato sulo i abbandunato lla nnante nun fove nè ccercato nè aiutato dê cumpagne: ‘int’a tutta ‘a mubbara (partita) lle deteno una palla decente da jucà!

All. ANCELOTTI 5 Me dispiace ma ll’attocca nu  zifo (voto) mancante pecché nun riuscette a uttené chello ch’êsse vuluto dê suĵe

Arbitro: DOVERI  4 Chisto ce porta bbuono, ma è scemo i ‘o ddimustraje cchiú ‘e ‘na vota ajeressera cu  cchella dicisione a ccapa ‘e saciccio ‘e jettà fora a  Anena Longa ca nunn’aveva fatto niente.  ‘E cchiú nun ce scurdammo ca ô Napule lle fósse attuccato ‘nu ricore a ffavore  pe bbia d’’ ‘o carí (fallo) ‘e Bakayokò ‘ncuollo a Llorenzigno  ca nè st’arbitro rumanese, nè chilli ‘ntontere d’’a varra ca lle cunzola â sora  cecajeno a vvedé!

E ccu cchesto ve saluto, fermannoce cca e ddànnoce appuntamento, si dDi’ vo’, a mmiercurí ca vene doppo d’’a tarra (sfida)’e Coppa Itaglia ‘e marterí a ssera sempe a  san Paolo contro ô demmnio russo e nniro. Speranno ‘e putereve cuntà ca fósse juta meglio! Staveti bbe’. R.Bracale Brak

ilnapolista © riproduzione riservata